ଜୁନ ୨୦ ତାରିଖ ଏୟାର ଇଣ୍ଡିଆ ତା'ର ୮ ଟି ଉଡ଼ାଣ ବାତିଲ କରିଥିଲା। ଏଥିରେ ୪ ଟି ଆନ୍ତର୍ଜାତୀୟ ଏବଂ ୪ ଟି ଘରୋଇ ଉଡ଼ାଣ ଅନ୍ତର୍ଭୁକ୍ତ ଥିଲା। ଅହମ୍ମଦାବାଦର ମେଘାଣୀନଗର ଠାରେ ବିମାନ ଦୁର୍ଘଟଣା ହେବା ପରଠାରୁ, ପ୍ରତିଦିନ ଏୟାର ଇଣ୍ଡିଆର ଉଡ଼ାଣ ବାତିଲ କରାଯାଉଛି। ଏହା ସହିତ, ଯାନ୍ତ୍ରିକ ତ୍ରୁଟି ଯୋଗୁ ଅନେକ ଉଡ଼ାଣକୁ ଫେରାଇ ନେବାକୁ ପଡ଼ିଛି କିମ୍ବା ଜରୁରୀକାଳୀନ ଅବତରଣ କରିବାକୁ ପଡ଼ିଛି। ତଥାପି, ବିମାନବନ୍ଦରରେ ରକ୍ଷଣାବେକ୍ଷଣ ଏବଂ ପରିଚାଳନାଗତ କାରଣରୁ ଶୁକ୍ରବାର ବାତିଲ ହୋଇଥିବା ଉଡ଼ାଣଗୁଡ଼ିକୁ ବାତିଲ କରାଯାଇଛି।

ଆଜି ପର୍ଯ୍ୟନ୍ତ ଲୋକଙ୍କ ମନରୁ ଯାଉନି ଏହି ଭୟଙ୍କର ଦୁର୍ଘଟଣା। ଭୁଲ ଯାହାର ବି ଥାଉନା କାହିଁକି ବିନା କୌଣସି ଭୁଲରେ ବହୁ ନିରୀହ ଜୀବନ ଚାଲିଗଲା। ଯେଉଁମାନେ ସେହି ଫ୍ଲାଇଟରେ ଟିକେଟ କରିଥିଲେ ସେହି ଯାତ୍ରୀ ମାନେ ସେମାନଙ୍କର ଭବିଷ୍ୟତକୁ ନେଇ ବହୁ ସ୍ବପ୍ନ ଦେଖିଥିଲେ। କିନ୍ତୁ ୩୨ ସେକେଣ୍ଡ ମଧ୍ୟରେ ବହୁ ନିରୀହ ଜୀବନ ଜଳିଯାଇଥିଲା। କୌଣସି କ୍ଷତିପୂରଣ ସେହି ପରିବାରର କ୍ଷତିକୁ ଭରି ପାରିବନି। ଇଣ୍ଡିଆନ୍ ଆସୋସିଏସନ୍ ଅଫ୍ ଟୁର୍ ଅପରେଟର୍ସ (IATO) ସଭାପତି ରବି ଗୋସାଇଁ ସୂଚନା ଦେଇଛନ୍ତି, ଏୟାର ଇଣ୍ଡିଆ ଦୁର୍ଘଟଣା ପରେ, ବିଶେଷକରି ଅନ୍ତର୍ଜାତୀୟ ରୁଟ୍ ପାଇଁ ବୁକିଂରେ ହ୍ରାସ ଘଟିଛି।

ଅନ୍ତର୍ଜାତୀୟ ସ୍ତରରେ ୧୮ରୁ ୨୨ ପ୍ରତିଶତ ଏବଂ ଘରୋଇ ସ୍ତରରେ ୧୦ରୁ ୧୨ ପ୍ରତିଶତ ହ୍ରାସ ପାଇଛି। ଏୟାର ଇଣ୍ଡିଆ ଯେଉଁ ଘରୋଇ ରୁଟରେ ଉଡ଼ାଣ ବାତିଲ କରିଛି ସେଥିରେ ପୁଣେରୁ ଦିଲ୍ଲୀ ଯାଉଥିବା ବିମାନ AI874, ଅହମଦାବାଦରୁ ଦିଲ୍ଲୀ ଯାଉଥିବା AI456 ବିମାନ, ହାଇଦ୍ରାବାଦରୁ ମୁମ୍ବାଇ ଯାଉଥିବା AI2872 ଏବଂ ଚେନ୍ନାଇରୁ ମୁମ୍ବାଇ ଯାଉଥିବା AI571 ବିମାନ ସାମିଲ ଅଛି। ଶୁକ୍ରବାର ପାଇଁ ଏୟାର ଇଣ୍ଡିଆ ଦ୍ୱାରା ବାତିଲ କରାଯାଇଥିବା ଆନ୍ତର୍ଜାତୀୟ ଉଡ଼ାଣଗୁଡ଼ିକ ମଧ୍ୟରେ ଦୁବାଇରୁ ଚେନ୍ନାଇ ଉଡ଼ାଣ AI906, ଦିଲ୍ଲୀରୁ ମେଲବୋର୍ଣ୍ଣ ଉଡ଼ାଣ AI308, ମେଲବୋର୍ଣ୍ଣରୁ ଦିଲ୍ଲୀ ଉଡ଼ାଣ AI309 ଏବଂ ଦୁବାଇରୁ ହାଇଦ୍ରାବାଦ ଉଡ଼ାଣ AI2204 ଅନ୍ତର୍ଭୁକ୍ତ। ଗତ ଜୁନ ୧୨ ତାରିଖରେ ଅହମ୍ମଦାବାଦରୁ ଲଣ୍ଡନ ଯାଉଥିବା ଏୟାର ଇଣ୍ଡିଆର ଏକ ବିମାନ ଉଡ଼ାଣ ଭରିବାର କିଛି ସମୟ ମଧ୍ୟରେ ହିଁ ଅହମଦାବାଦର ଏକ ମେଡିକାଲ କଲେଜର ବିଲ୍ଡିଙ୍ଗ ଉପରେ ବିମାନଟି ଖସିପଡ଼ିଥିଲା।

ଏହି ବିମାନରେ ୨୪୨ ଜଣ ଯାତ୍ରୀ ଏବଂ କ୍ରୁ ସଦସ୍ୟ ଥିଲେ। ଜଣେ ବଞ୍ଚି ଯାଇଥିବାବେଳେ ଅନ୍ୟ ୨୪୧ ଜଣ ପ୍ରାଣ ହରାଇଥିଲେ। ଏହି ଦୁର୍ଘଟଣାରେ ମେଡିକାଲ କଲେଜର ଅନେକ ଛାତ୍ର ଏବଂ ହଷ୍ଟେଲରେ ଥିବା ଲୋକମାନେ ମଧ୍ୟ ପ୍ରାଣ ହରାଇଛନ୍ତି। ଅହମ୍ମଦାବାଦ ବିମାନ ଦୁର୍ଘଟଣା ପରେ, ୮ଦିନ ମଧ୍ୟରେ ବିଭିନ୍ନ କାରଣରୁ ଏପର୍ଯ୍ୟନ୍ତ ମୋଟ ୮୪ଟି ଉଡ଼ାଣ ବାତିଲ କରାଯାଇଛି। ଏହା ସହିତ, ପ୍ରତ୍ୟେକ ବିମାନବନ୍ଦରରେ ବିମାନର କାର୍ଯ୍ୟକ୍ଷମ ଯାଞ୍ଚ ସମ୍ପର୍କରେ ମଧ୍ୟ କଡ଼ାକଡ଼ି ପାଳନ କରାଯାଉଛି। ପୂର୍ବରୁ ଗୁରୁବାର ଅର୍ଥାତ୍‌ ୧୯ ଜୁନରେ ଏୟାର ଇଣ୍ଡିଆ ୪ଟି ଉଡ଼ାଣ ବାତିଲ କରିଥିଲା। ଏହା ସହିତ, ଦିଲ୍ଲୀରୁ ଭିଏତନାମ ଯାଉଥିବା ଏୟାର ଇଣ୍ଡିଆର ବିମାନ AI388 କୁ ମଝି ରାସ୍ତାରେ ଫେରାଇ ନେବାକୁ ପଡିଥିଲା।

ଏହି ଉଡ଼ାଣରେ ମୋଟ ୧୩୦ ଜଣ ଯାତ୍ରୀ ଥିଲେ। କୁହାଯାଉଛି ଯେ ବିମାନରେ ଯାନ୍ତ୍ରିକ ତ୍ରୁଟି ଜଣାପଡିବା ପରେ ଏହାକୁ ଦିଲ୍ଲୀ ଫେରାଇବାକୁ ପଡିଥିଲା। ଏହା ବ୍ୟତୀତ, ଗୁରୁବାର ଗୁଆହାଟିରୁ ଚେନ୍ନାଇ ଯାଉଥିବା ଏକ ଇଣ୍ଡିଗୋ ଏୟାରଲାଇନ୍ସର ଏକ ବିମାନକୁ ବେଙ୍ଗାଲୁରୁରେ ଅବତରଣ କରିବାକୁ ପଡିଥିଲା। ତେବେ ଫୁଏଲ ଅଭାବରୁ ବିମାନଟି ବେଙ୍ଗାଲୁରୁରେ ଅବତରଣ କରାଯାଇଥିଲା। ଏହି ବିମାନରେ ମୋଟ ୧୬୮ ଜଣ ଯାତ୍ରୀ ଥିଲେ। ଫୁଏଲ ଭର୍ତ୍ତି କରିବା ପରେ, ଏହି ବିମାନଟି ପୁଣି ଚେନ୍ନାଇ ପାଇଁ ଉଡ଼ାଣ କରିଥିଲା। ଏମିତି ଉଡାଣ ରଦ୍ଦ ହେବା ଫଳରେ ଏୟାର ଇଣ୍ଡିଆ କୋଟି କୋଟି ଟଙ୍କା କ୍ଷତି ସହୁଥିବା କୁହାଯାଉଛି।