Vehicle Rules / ରାଜଧାନୀରେ ପେଟ୍ରୋଲ-ଡିଜେଲ-CNG ଗାଡ଼ିକୁ 'ବ୍ରେକ୍'

ନୁଆଦିଲ୍ଲୀ,୨୦/୦୮: ଦିଲ୍ଲୀ-ଏନସିଆରରେ ବୃଦ୍ଧିପାଉଥିବା ପ୍ରଦୂଷଣକୁ ରୋକିବା ପାଇଁ ଆୟୋଗ ଫର୍ ଏୟାର କ୍ୱାଲିଟି ମ୍ୟାନେଜମେଣ୍ଟ ଏକ ବଡ଼ ଏବଂ କଡ଼ା ପଦକ୍ଷେପ ଗ୍ରହଣ କରିଛି। ବାୟୁ ଗୁଣବତ୍ତାକୁ ସୁଧାରିବା ତଥା ପରିବହନ ଜନିତ ପ୍ରଦୂଷଣକୁ ହ୍ରାସ କରିବା ଉଦ୍ଦେଶ୍ୟରେ N1 ଏବଂ N2 ବର୍ଗର ମାଲବାହୀ ଯାନଗୁଡ଼ିକ ପାଇଁ ନୂତନ ପଞ୍ଜୀକରଣ କଟକଣା ପାଇଁ ଘୋଷଣା କରାଯାଇଛି। ଆଗାମୀ ଦିନରେ ଏହି ଅଞ୍ଚଳରେ କେବଳ ବୈଦ୍ୟୁତିକ ଯାନ (EV) ଗୁଡ଼ିକୁ ମାଲବାହୀ ଯାନ ଭାବରେ ଅନୁମତି ଦିଆଯିବ।

ଛୋଟ ମାଲବାହୀ ଯାନ ପାଇଁ ନୂତନ ନିୟମ
ସାଢ଼େ ତିନି ଟନ୍ ପର୍ଯ୍ୟନ୍ତ ଓଜନ ବିଶିଷ୍ଟ ଛୋଟ ମାଲବାହୀ ଯାନଗୁଡ଼ିକୁ N1 ବର୍ଗରେ ଅନ୍ତର୍ଭୁକ୍ତ କରାଯାଇଛି। ଦିଲ୍ଲୀରେ କଟକଣା: ଆସନ୍ତା ଜାନୁଆରୀ  ୨୦୨୭ ରୁ ଦିଲ୍ଲୀରେ ଡିଜେଲ, ପେଟ୍ରୋଲ ଏବଂ CNG ଦ୍ୱାରା ଚାଳିତ ନୂତନ N1 ବର୍ଗର ମାଲବାହୀ ଯାନ ପଞ୍ଜୀକରଣ ସମ୍ପୁର୍ଣ୍ଣ  ବନ୍ଦ ହୋଇଯିବ। ଏହାପରେ କେବଳ ଇଲେକ୍ଟ୍ରିକ (EV) ଯାନଗୁଡ଼ିକୁ ହିଁ ପଞ୍ଜୀକୃତ କରାଯିବ।
ଏନସିଆରର ଅନ୍ୟାନ୍ୟ ଅଞ୍ଚଳ ଯଥା  ଗୁରୁଗ୍ରାମ, ଫରିଦାବାଦ, ସୋନିପତ, ଗାଜିଆବାଦ ଏବଂ ଗୌତମବୁଦ୍ଧ ନଗର ଭଳି ଅଧିକ ଯାନବାହାନ ଘନତା ଥିବା ଅଞ୍ଚଳଗୁଡ଼ିକରେ ଏହି ନିୟମ ୧ ଜୁଲାଇ, ୨୦୨୭ ଠାରୁ ଲାଗୁ ହେବ। NCRର ଅନ୍ୟାନ୍ୟ ଜିଲ୍ଲାଗୁଡ଼ିକରେ ୧ ଜାନୁଆରୀ, ୨୦୨୮ରୁ ଡିଜେଲ ଏବଂ ପେଟ୍ରୋଲ N1 ଯାନର ପଞ୍ଜୀକରଣ ବନ୍ଦ ହେବ

ବଡ଼ ମାଲବାହୀ ଯାନ ପାଇଁ କଟକଣା
ସାଢ଼େ ତିନି ଟନ୍ ରୁ ସାଢ଼େ ସାତ ଟନ୍ ମଧ୍ୟରେ ଓଜନ ଥିବା ଯାନଗୁଡ଼ିକୁ N2 ବର୍ଗରେ ରଖାଯାଇଛି। ଏହି ବଡ଼ ଗାଡ଼ିଗୁଡ଼ିକ ପାଇଁ ମଧ୍ୟ ପର୍ଯ୍ୟାୟକ୍ରମେ କଟକଣା ଘୋଷଣା କରାଯାଇଛି। ଦିଲ୍ଲୀ: ଜାନୁଆରୀ ୧, ୨୦୨୮ ରୁ ଦିଲ୍ଲୀରେ ଡିଜେଲ, ପେଟ୍ରୋଲ ଏବଂ CNG ଦ୍ୱାରା ଚାଳିତ N2 ଯାନର ପଞ୍ଜୀକରଣ ବନ୍ଦ ହେବ। ପ୍ରମୁଖ ସହର: ଗୁରୁଗ୍ରାମ, ଫରିଦାବାଦ, ସୋନିପତ, ଗାଜିଆବାଦ ଏବଂ ଗୌତମ ବୁଦ୍ଧ ନଗରରେ ଏହି ନିଷେଧାଦେଶ ୧ ଜୁଲାଇ, ୨୦୨୮ ରୁ କାର୍ଯ୍ୟକାରୀ ହେବ। ସେହିପରି ଅନ୍ୟାନ୍ୟ ଜିଲ୍ଲା: ଜାନୁଆରୀ ୧, ୨୦୨୯ ରୁ NCRର ଅବଶିଷ୍ଟ ଜିଲ୍ଲାଗୁଡ଼ିକରେ ଡିଜେଲ ଏବଂ ପେଟ୍ରୋଲ N2 ଯାନ ପଞ୍ଜୀକରଣ ବନ୍ଦ ହୋଇଯିବ।

ପଢନ୍ତୁ ଏହି ଖବର: ଶସ୍ତା ହେଲା ସୁନା -ରୁପା, ଆପଣଙ୍କ ସହରରେ ସୁନା - ରୂପାର ମୂଲ୍ୟ କେତେ?

CNGକୁ ବନ୍ଦ କରିବାର କାରଣ
ବିଶେଷଜ୍ଞ କମିଟିର ରିପୋର୍ଟ ଅନୁଯାୟୀ, ପରିବହନ କ୍ଷେତ୍ର ଶୀତଦିନେ PM ୨୫ ପ୍ରଦୂଷଣର ପ୍ରାୟ ୨୩ ପ୍ରତିଶତ ଏବଂ ଗ୍ରୀଷ୍ମଦିନେ ପ୍ରାୟ ୧୮ ପ୍ରତିଶତ ବାୟୁ ପ୍ରଦୂଷଣ ପାଇଁ ଦାୟୀ। ଏନସିଆରରେ ମୋଟ ସକ୍ରିୟ ଯାନର ମାତ୍ର ୧.୨ ପ୍ରତିଶତ ଛୋଟ ମାଲବାହୀ ଯାନ ଥିଲେ ହେଁ, PM2.5 ନିର୍ଗମନରେ ଏମାନଙ୍କ ଅଂଶ ପ୍ରାୟ ୩.୩ ପ୍ରତିଶତ ଅଟେ।

ARAI ତଥ୍ୟ ଅନୁଯାୟୀ, BS-6 CNG ମାଲବାହୀ ଯାନଗୁଡ଼ିକ ସାଧାରଣ BS-6 CNG କାର ଅପେକ୍ଷା ୫୭ ଗୁଣ ଏବଂ BS-6 ଡିଜେଲ ମାଲବାହୀ ଯାନ ପ୍ରାୟ ୧୩୦ ଗୁଣ ଅଧିକ PM2.5 ନିର୍ଗତ କରିଥାନ୍ତି। ଅନ୍ୟପକ୍ଷରେ, CNG କଣିକା ପଦାର୍ଥକୁ କିଛି ମାତ୍ରାରେ ହ୍ରାସ କଲେ ମଧ୍ୟ ଏହା ନାଇଟ୍ରୋଜେନ୍ ଅକ୍ସାଇଡ୍ (NOx) ନିର୍ଗମନକୁ ସମ୍ପୂର୍ଣ୍ଣ ରୂପେ ଦୂର କରିପାରେ ନାହିଁ, ଯାହା ବାୟୁରେ ମିଶି ଦ୍ୱିତୀୟକ PM2.5 ସୃଷ୍ଟି କରିଥାଏ।

ବୈଦ୍ୟୁତିକ ଯାନ (EV) ପ୍ରସ୍ତୁତି ଏବଂ ଦାୟିତ୍ୱ
୨୦୨୫ ମସିହାରେ ଦିଲ୍ଲୀ-NCRରେ ନୂତନ ଛୋଟ ମାଲବାହୀ ଯାନ ପଞ୍ଜିକରଣର ୭୦ ପ୍ରତିଶତରୁ ଅଧିକ (ଦିଲ୍ଲୀରେ ୯୦% ରୁ ଅଧିକ) CNG ଯାନ ଥିବାବେଳେ ଇଭି ଯାନର ଅଂଶମାତ୍ର ୭ ପ୍ରତିଶତ ଥିଲା। ତଥାପି, ବର୍ତ୍ତମାନ ବଜାରରେ N1 ବର୍ଗରେ ୯ଟି କମ୍ପାନୀର ୨୦ଟି ଇଭି ମଡେଲ୍ ଉପଲବ୍ଧ ରହିଛି। ଅନ୍ୟପକ୍ଷରେ N2 ବର୍ଗରେ ଇଭି ଉପଲବ୍ଧତା ନଥିବାରୁ ଏହାକୁ ଅଧିକ ସମୟ ଦିଆଯାଇଛି। ଦିଲ୍ଲୀ ସରକାରଙ୍କ ଇଭି ନିତିକୁ ଆଧାର କରି CAQ ର ଏହି ନିର୍ଦ୍ଦେଶକୁ କାର୍ଯ୍ୟକାରୀ କରିବା ପାଇଁ ଦିଲ୍ଲୀ ସରକାର ଏବଂ ସମ୍ପୃକ୍ତ ରାଜ୍ୟଗୁଡ଼ିକୁ ପୂର୍ଣ୍ଣ ଦାୟିତ୍ୱ ଦିଆଯାଇଛି।

ଏହି ନିୟମଗୁଡ଼ିକ କାର୍ଯ୍ୟକାରୀ ହେବା ଦ୍ୱାରା ଆଗାମୀ ଦିନରେ ଦିଲ୍ଲୀ-ଏନସିଆରର ବାୟୁ ପ୍ରଦୂଷଣ ସ୍ତରରେ ବଡ଼ଧରଣର ସୁଧାର ଆସିବ ବୋଲି ଆଶା କରାଯାଉଛି।