Digital Payment / ୧୬ ଅକ୍ଟୋବରରୁ ୨,୦୦୦ରୁ ଅଧିକ UPI ପେମେଣ୍ଟ ନେବେ ନାହିଁ ପେଟ୍ରୋଲ ପମ୍ପ ଡିଲର

ମଧ୍ୟପ୍ରଦେଶ ଓ ପଞ୍ଜାବର ପେଟ୍ରୋଲ ପମ୍ପ ଡିଲରମାନେ ଆସନ୍ତା ୧୬ ଅକ୍ଟୋବରରୁ ୨,୦୦୦ରୁ ଅଧିକ ମୂଲ୍ୟର UPI ପେମେଣ୍ଟ ଗ୍ରହଣ ନକରିବାକୁ ନିଷ୍ପତ୍ତି ନେଇଛନ୍ତି । ପ୍ରସ୍ତାବିତ ୦.୪ ପ୍ରତିଶତ MDR (Merchant Discount Rate) ଶୁଳ୍କକୁ ଏହି ନିଷ୍ପତ୍ତିର ମୁଖ୍ୟ କାରଣ ବୋଲି ଡିଲରମାନେ କହିଛନ୍ତି ।

ଡିଲରମାନଙ୍କ ମତରେ, ପେଟ୍ରୋଲ ପମ୍ପ ବ୍ୟବସାୟରେ ଲାଭ ମାର୍ଜିନ୍ ବହୁତ କମ୍ ଥିବାରୁ ଅତିରିକ୍ତ MDR ଖର୍ଚ୍ଚ ବହନ କରିବା ସେମାନଙ୍କ ପାଇଁ କଷ୍ଟକର । ତେଣୁ UPI ନେଣଦେଣକୁ ମଧ୍ୟ ଡେବିଟ୍ ଓ କ୍ରେଡିଟ୍ କାର୍ଡ ପେମେଣ୍ଟ ଭଳି MDR ଛାଡ଼ ଦେବାକୁ ସେମାନେ ସରକାରଙ୍କୁ ଅନୁରୋଧ କରିଛନ୍ତି । ଦିନକୁ ପ୍ରାୟ ୫୯୦ ଟଙ୍କା କ୍ଷତି ହେବ ଡିଲର ସଂଘ କହିଛନ୍ତି ।

ମଧ୍ୟପ୍ରଦେଶ ପେଟ୍ରୋଲିୟମ ଡିଲର୍ସ ଆସୋସିଏସନ୍‌ର ଅଧ୍ୟକ୍ଷ ଅଜୟ ସିଂହଙ୍କ କହିବା ଅନୁଯାୟୀ, ପ୍ରସ୍ତାବିତ MDR ବ୍ୟବସ୍ଥା ଘୋଷଣା ପରେ ଏହି ନିଷ୍ପତ୍ତି ନିଆଯାଇଛି । ତାଙ୍କ ଅନୁସାରେ, ପ୍ରତ୍ୟେକ ପେଟ୍ରୋଲ ପମ୍ପରେ ଦିନକୁ ହାରାହାରି ପ୍ରାୟ ୧୦୦ ଜଣ ଗ୍ରାହକ ୨,୦୦୦ରୁ ଅଧିକ UPI ନେଣଦେଣ କରନ୍ତି ।

ଏହି ନେଣଦେଣ ଉପରେ ୦.୪ ପ୍ରତିଶତ MDR ଲାଗୁ ହେଲେ ପ୍ରତ୍ୟେକ ପମ୍ପରେ ଦିନକୁ ପ୍ରାୟ ୫୯୦ ଟଙ୍କା ଏବଂ ମାସକୁ ପ୍ରାୟ ୧୭,୭୦୦ର ଅତିରିକ୍ତ ଖର୍ଚ୍ଚ ହେବ ବୋଲି ଡିଲର ସଂଘ ଦାବି କରିଛି । ଅଜୟ ସିଂହ କହିଛନ୍ତି ଯେ, ପେଟ୍ରୋଲ ପମ୍ପ ଡିଲରମାନଙ୍କ ଲାଭ ମାର୍ଜିନ୍ ପ୍ରାୟ ୦.୫ ପ୍ରତିଶତ ଥିବାରୁ ଏହି ଅତିରିକ୍ତ ଖର୍ଚ୍ଚ ଡିଲରମାନେ ବହନ କରିପାରିବେ ନାହିଁ ।

ତେବେ ଗ୍ରାହକମାନେ ଚାହିଁଲେ କ୍ରେଡିଟ୍ କିମ୍ବା ଡେବିଟ୍ କାର୍ଡରେ ଯଥାବତ୍‌ ପେମେଣ୍ଟ କରିପାରିବେ । ଏହି କାର୍ଡ ପେମେଣ୍ଟ ଉପରେ କୌଣସି ସୀମା ରହିବ ନାହିଁ ବୋଲି ଡିଲର ସଂଘ ପକ୍ଷରୁ କୁହାଯାଇଛି ।

UPIକୁ ମଧ୍ୟ MDR ଛାଡ଼ ଦାବି
ଡିଲରମାନଙ୍କ କହିବା ଅନୁଯାୟୀ, ପେଟ୍ରୋଲ ପମ୍ପଗୁଡ଼ିକୁ କ୍ରେଡିଟ୍ ଓ ଡେବିଟ୍ କାର୍ଡ ଲେନଦେନରେ MDR ଶୁଳ୍କରୁ ଛାଡ଼ ମିଳିଛି। ସମାନ ଭାବରେ UPI ଲେନଦେନ ପାଇଁ ମଧ୍ୟ ଛାଡ଼ ପ୍ରଦାନ କରିବାକୁ ସେମାନେ ସରକାରଙ୍କୁ ଅନୁରୋଧ କରିଛନ୍ତି ।

ପଞ୍ଜାବରେ ମଧ୍ୟ ସମାନ ନିଷ୍ପତ୍ତି
ପଞ୍ଜାବର ପେଟ୍ରୋଲ ପମ୍ପ ଡିଲରମାନେ ମଧ୍ୟ ୧୬ ଅକ୍ଟୋବରରୁ ୨,୦୦୦ରୁ ଅଧିକ UPI ପେମେଣ୍ଟ ଗ୍ରହଣ ନକରିବାକୁ ନିଷ୍ପତ୍ତି ନେଇଛନ୍ତି । ପଞ୍ଜାବ ପେଟ୍ରୋଲିୟମ ଡିଲର୍ସ ଆସୋସିଏସନ୍‌ର ଅଧ୍ୟକ୍ଷ ପରମଜିତ ସିଂହ ଦୋଆବାଙ୍କ କହିବା ଅନୁଯାୟୀ, ପ୍ରସ୍ତାବିତ UPI ଟ୍ରାନ୍ଜାକ୍ସନ୍ ଚାର୍ଜ ବହନ କରିବା ପେଟ୍ରୋଲ ପମ୍ପ ଡିଲରମାନଙ୍କ ପାଇଁ ସମ୍ଭବ ନୁହେଁ । କମ୍ ମାର୍ଜିନ୍ ଯୋଗୁଁ ଏବେଠାରୁ ଅପରେସନାଲ୍ ଖର୍ଚ୍ଚ ପରିଚାଳନା କରିବାରେ ସମସ୍ୟା ହେଉଥିବା ସେ କହିଛନ୍ତି ।

ଗ୍ରାହକଙ୍କ ସୁବିଧା ପାଇଁ ଡେବିଟ୍ ଓ କ୍ରେଡିଟ୍ କାର୍ଡ ପେମେଣ୍ଟର ବିକଳ୍ପ ଜାରି ରହିବ ବୋଲି ସେ ସ୍ପଷ୍ଟ କରିଛନ୍ତି । ଏହି ପ୍ରସଙ୍ଗରେ ପରମଜିତ ସିଂହ ଦୋଆବା ସମ୍ପର୍କିତ ମନ୍ତ୍ରଣାଳୟ ସହିତ ଇଣ୍ଡିଆନ୍ ଅଏଲ୍ (IOCL), ଭାରତ ପେଟ୍ରୋଲିୟମ (BPCL) ଏବଂ ହିନ୍ଦୁସ୍ତାନ ପେଟ୍ରୋଲିୟମ (HPCL)କୁ ମଧ୍ୟ ଚିଠି ଲେଖିଥିବା ଜଣାପଡ଼ିଛି ।