ବଦଳୁଛି ଭାରତ । ବାଣିଜ୍ୟକୁ ନେଇ ସାରା ବିଶ୍ବରେ ତୀବ୍ର ପ୍ରତିଯୋଗିତା ଚାଲିଥିବାବେଳେ ଦେଶବାସୀଙ୍କୁ ବିଦେଶୀ ସାମଗ୍ରୀ ବର୍ଜନ କରିବାକୁ ଆହ୍ବାନ ଦେଇଛନ୍ତି ପ୍ରଧାନମନ୍ତ୍ରୀ ମୋଦି । ଗୁଜରାଟରେ ଜନସଭାକୁ ସମ୍ବୋଧିତ କରିବା ଅବସରରେ ଯେତେ କ୍ଷତି ସହିଲେ ବି ‌ବିଦେଶୀ ଜିନିଷ କ୍ରୟ କରିବା ଅନୁଚିତ କହି ସ୍ଥାନୀୟ ଉତ୍ପାଦକୁ ଗୁରୁତ୍ବ ଦେଇଛନ୍ତି ମୋଦି । ଭାରତକୁ ଆତ୍ମନିର୍ଭର ଓ ଶକ୍ତିଶାଳୀ ରାଷ୍ଟ୍ର ଭାବେ ଗଢ଼ିବାକୁ ସର୍ବପ୍ରଥମେ ଆମଦାନୀ ସାମଗ୍ରୀ ଉପରୁ ନିର୍ଭରଶୀଳତା କମାଇବାକୁ ଅପିଲ୍ କରିଛନ୍ତି ପ୍ରଧାନମନ୍ତ୍ରୀ । 2020ରୁ ଆତ୍ମନିର୍ଭର ଭାରତ ଅଭିଯାନ ଦେଶରେ ନୂଆ ଉଦ୍ୟୋଗୀଙ୍କୁ ସଶକ୍ତ ବାଣିଜ୍ୟ ଭିତ୍ତିଭୂମି ଯୋଗାଇ ଦେଇଛି । ନିମ୍ନମାନର ଶସ୍ତା ବିଦେଶୀ ସାମଗ୍ରୀ ବଦଳରେ ସ୍ଥାନୀୟ ଉଦ୍ୟୋଗରୁ ଉଚ୍ଚମାନର ସାମଗ୍ରୀ ଉତ୍ପାଦନ ପାଇଁ Make in India ମାଧ୍ୟମରେ ଗତ 10 ବର୍ଷ ମଧ୍ୟରେ ଭାରତୀୟ ଉଦ୍ୟୋଗୀଙ୍କୁ ସଫଳ କରିଛି । ଦେଶବାସୀ ସମୟର ଏହି ଆହ୍ବାନକୁ ଗ୍ରହଣ କରିବାକୁ ଅପିଲ କରିଛନ୍ତି ପ୍ରଧାନମନ୍ତ୍ରୀ ମୋଦି ।

ପାରମ୍ପରିକ ପର୍ବପର୍ବାଣୀ ସମୟରେ ବିଦେଶୀ ସାମଗ୍ରୀ ଉପରେ ନିର୍ଭରଶୀଳତା କମ କରିବା ଜରୁରୀ । ବିଶେଷ କରି ହୋଲି, ଦୀପାବଳି ଓ ଗଣେଶ ପୂଜା ଭଳି ପର୍ବପର୍ବାଣୀ ସମୟରେ ଦେଶରେ ତିଆରି ଜିନିଷ କିଣିଲେ ସ୍ଥାନୀୟ ଉଦ୍ୟୋଗୀଙ୍କୁ ବଳ ମିଳିବା ସହ ଦେଶର ଆର୍ଥିକ ବିକାଶ ତ୍ବରାନ୍ବିତ ହେବ ବୋଲି କହିଛନ୍ତି ମୋଦି । ପାର୍ବଣ ସମୟରେ ଦେଶରେ ଭର୍ତ୍ତି ହୋଇଯାଉଥିବା ନିମ୍ନ ମାନର ବିଦେଶୀ ଉତ୍ପାଦକୁ ଟାର୍ଗେ‌ଟ୍‌ କରିଛନ୍ତି ପ୍ରଧାନମନ୍ତ୍ରୀ । ବାହାରୁ ଆସୁଥବା ଗଣେଶ ମୂର୍ତ୍ତି ଗୁଡ଼ିକରେ ଆଖି ଏତେ ଛୋଟ ଯେ ତାହା ଠିକ୍ ଭାବେ ଖୋଲୁନାହିଁ ବୋଲି ପରୋକ୍ଷରେ ଚୀନ ସାମଗ୍ରୀ ବର୍ଜନ କରିବାକୁ ଆହ୍ବାନ ଦେଇଛନ୍ତି ମୋଦି । ହୋଲିରେ ରାସାୟନିକ ରଙ୍ଗ, ଦୀପାବଳିରେ ବିଦେଶରୁ ଆସୁଥିବା ସାମଗ୍ରୀ କ୍ରୟକୁ ଅତ୍ୟନ୍ତ ଦୁର୍ଭାଗ୍ୟର ବିଷୟ ବୋଲି କହିଛନ୍ତି ମୋଦି । ବିଦେଶୀ ସାମଗ୍ରୀ ଯୋଗୁଁ ପ୍ରଭାବିତ ହେଉଛନ୍ତି ସ୍ଥାନୀୟ କାରିଗର । ସ୍ବଦେଶୀ ସାମଗ୍ରୀର ବିକ୍ରି ବଢିବା ସହ ସ୍ଥାନୀୟ ଅର୍ଥନୀତି ମଧ୍ୟ ଦୃଢ଼ ହେବ ବୋଲି କହିଛଥନ୍ତି ।

କେବଳ ଗତବର୍ଷ ଦୀପାବଳି ସମୟରେ ଭାରତ ବଜାରରେ ଚୀନର ବ୍ୟବସାୟ 1.25 ଲକ୍ଷ କୋଟି ହ୍ରାସ ପାଇଛି । ସେହିପରି ହୋଲି ସମୟରେ 10 ହଜାର କୋଟିର କ୍ଷତି ସହିଛି ଚୀନ । ଗତ 5 ବର୍ଷ ମଧ୍ୟରେ ଭାରତରେ ପର୍ବପର୍ବାଣୀ ସମୟରେ ଚୀନର ବ୍ୟବସାୟ କ୍ରମାଗତ ଦ୍ରୁତଗତିରେ କମୁଛି । ଏହାସହିତ FMCG ଉତ୍ପାଦ, ସୌଖିନ ସାମଗ୍ରୀ,ଘରୋଇ ବ୍ୟବହାର ସାମଗ୍ରୀ, ଫ୍ୟାବ୍ରିକ, ଖେଳନା ସାମଗ୍ରୀରେ ସ୍ବଦେଶୀ ଉତ୍ପାଦର ଚାହିଦା ବଢୁଛି । ଭାରତ ବନୁଛି ଆତ୍ମନିର୍ଭର ।