SCO Summit 2026 / SCO ସମ୍ମିଳନୀ ପୂର୍ବରୁ ଭାରତର ରୋଡମ୍ୟାପ୍ ସେୟାର କଲେ ପ୍ରଧାନମନ୍ତ୍ରୀ ମୋଦି

ନୂଆଦିଲ୍ଲୀ,୨୯/୦୮: କିର୍ଗିଜସ୍ତାନର ରାଜଧାନୀ ବିଶକେକରେ ଅନୁଷ୍ଠିତ ୨୬ତମ ସାଂଘାଇ ସହଯୋଗ ସଂଗଠନ (SCO) ଶିଖର ସମ୍ମିଳନୀ ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭାରତର ରୋଡମ୍ୟାପ୍ ପ୍ରକାଶ କରିଛନ୍ତି। ସେ କହିଛନ୍ତି ଯେ ଆତଙ୍କବାଦକୁ ସମ୍ପୂର୍ଣ୍ଣ ଭାବରେ ମୂଳୋତ୍ପାଟନ କରିବାକୁ ପଡିବ।

ପ୍ରଧାନମନ୍ତ୍ରୀ ମୋଦୀ ଆଜି ଠାରୁ ସେପ୍ଟେମ୍ବର ୧ ତାରିଖ ପର୍ଯ୍ୟନ୍ତ ଉଜବେକିସ୍ତାନ ଏବଂ କିର୍ଗିଜସ୍ତାନ ଗସ୍ତ କରିଛନ୍ତତି। ଏହି ଗସ୍ତ ସମୟରେ, ସେ ଉଜବେକିସ୍ତାନ ରାଷ୍ଟ୍ରପତି ଶଭକତ ମିର୍ଜିୟୋୟେଭଙ୍କ ନିମନ୍ତ୍ରଣରେ ତାସକେଣ୍ଟକୁ ଏକ ସରକାରୀ ଗସ୍ତ କରିବେ ଏବଂ ତା'ପରେ SCO ଶିଖର ସମ୍ମିଳନୀ ଅନୁଷ୍ଠିତ ହେବ। ତାଙ୍କ ଗସ୍ତ ପୂର୍ବରୁ, ପ୍ରଧାନମନ୍ତ୍ରୀ କହିଛନ୍ତି ଯେ ଏହି ଗସ୍ତ ମଧ୍ୟ ଏସିଆ ସହିତ ଭାରତର ରଣନୈତିକ ସମ୍ପର୍କକୁ ଆହୁରି ମଜବୁତ କରିବା ଏବଂ ବାଣିଜ୍ୟ, ନିବେଶ, ଡିଜିଟାଲ ସଂଯୋଗୀକରଣ, ପ୍ରତିରକ୍ଷା ଏବଂ ଶକ୍ତି ସମେତ ବିଭିନ୍ନ କ୍ଷେତ୍ରରେ ସହଯୋଗ ବିସ୍ତାର କରିବା ଉପରେ ଧ୍ୟାନ ଦେବ।


ଆଜି ଓ ଆସନ୍ତା କାଲି ତାସକେଣ୍ଟ ଗସ୍ତ

ପ୍ରଧାନମନ୍ତ୍ରୀ ମୋଦି ଅଗଷ୍ଟ ୨୯ ଓ ୩୦ ତାରିଖରେ ଉଜବେକିସ୍ତାନର ରାଜଧାନୀ ତାସକେଣ୍ଟରେ ରହିବେ। ଉଜବେକିସ୍ତାନ ରାଷ୍ଟ୍ରପତି ଶାଭକତ ମିର୍ଜିୟୋୟେଭଙ୍କ ନିମନ୍ତ୍ରଣରେ ସେ ଏହି ସରକାରୀ ଗସ୍ତ କରୁଛନ୍ତି। ଗତ କିଛି ବର୍ଷ ମଧ୍ୟରେ ଭାରତ ଓ ଉଜବେକିସ୍ତାନ ମଧ୍ୟରେ ରଣନୈତିକ ସହଭାଗୀତାରେ ଉଲ୍ଲେଖନୀୟ ଅଗ୍ରଗତି ହୋଇଥିବା ପ୍ରଧାନମନ୍ତ୍ରୀ କହିଛନ୍ତି। ଏହି ଗସ୍ତ ସମୟରେ ଦୁଇ ଦେଶର ଶୀର୍ଷ ନେତୃତ୍ୱ ମଧ୍ୟରେ ବାଣିଜ୍ୟ ଓ ନିବେଶ, ଡିଜିଟାଲ ସଂଯୋଗୀକରଣ, ପ୍ରତିରକ୍ଷା, ଶକ୍ତି ଏବଂ ଅନ୍ୟାନ୍ୟ ପ୍ରମୁଖ କ୍ଷେତ୍ରରେ ସହଯୋଗ ବୃଦ୍ଧି ନେଇ ଆଲୋଚନା ହେବ। ମଧ୍ୟ ଏସିଆ ସହିତ ଭାରତର ଆର୍ଥିକ ଓ ରଣନୈତିକ ସମ୍ପର୍କକୁ ନୂଆ ଦିଗ ଦେବା ଏହି ଗସ୍ତର ଅନ୍ୟତମ ପ୍ରମୁଖ ଲକ୍ଷ୍ୟ।

ପଢନ୍ତୁ ଏହି ଖବର:  'ଭାରତ କୌଣସି ଧର୍ମଶାଳା ନୁହେଁ; ଯିଏ ନାହଁ ସିଏ ଏଠାକୁ ଚାଲି ଆସିବ'

ଶାସ୍ତ୍ରୀ ସ୍ମାରକୀ ଓ ଗାନ୍ଧୀ କେନ୍ଦ୍ର ପରିଦର୍ଶନ

ତାସକେଣ୍ଟ ଗସ୍ତ ସମୟରେ ପ୍ରଧାନମନ୍ତ୍ରୀ ତାସକେଣ୍ଟ ଷ୍ଟେଟ୍ ୟୁନିଭରସିଟି ଅଫ୍ ଓରିଏଣ୍ଟାଲ ଷ୍ଟଡିଜ୍‌ରେ ଥିବା ଶାସ୍ତ୍ରୀ ସ୍ମାରକୀ ଏବଂ ମହାତ୍ମା ଗାନ୍ଧୀ କେନ୍ଦ୍ର ପରିଦର୍ଶନ କରିବାର କାର୍ଯ୍ୟକ୍ରମ ରହିଛି। ଏହି ସ୍ଥାନଗୁଡ଼ିକ ଭାରତ ଓ ଉଜବେକିସ୍ତାନ ମଧ୍ୟରେ ଥିବା ଗଭୀର ସାଂସ୍କୃତିକ ଏବଂ ଲୋକ-ସାଧାରଣ ସମ୍ପର୍କର ପ୍ରତୀକ ବୋଲି କୁହାଯାଉଛି।

ଭାରତ ଓ ଉଜବେକିସ୍ତାନ ମଧ୍ୟରେ ଦୀର୍ଘଦିନର ସଭ୍ୟତାଗତ ସମ୍ପର୍କ ରହିଛି। ଐତିହାସିକ, ସାଂସ୍କୃତିକ ଓ ଲୋକ-ସମ୍ପର୍କକୁ ଆଧାର କରି ଦୁଇ ଦେଶ ମଧ୍ୟରେ ସହଯୋଗକୁ ଆହୁରି ମଜବୁତ କରିବା ଉପରେ ମୋଦିଙ୍କ ଗସ୍ତ ସମୟରେ ବିଶେଷ ଗୁରୁତ୍ୱ ଦିଆଯିବ।

ବିଶକେକରେ SCO ଶିଖର ସମ୍ମିଳନୀ

ତାସକେଣ୍ଟ ଗସ୍ତ ପରେ ପ୍ରଧାନମନ୍ତ୍ରୀ ମୋଦି କିର୍ଗିଜସ୍ତାନର ରାଜଧାନୀ ବିଶକେକ ଯାତ୍ରା କରିବେ। କିର୍ଗିଜସ୍ତାନ ରାଷ୍ଟ୍ରପତି ସାଦ୍ୟାର ଜାପାରୋଭଙ୍କ ନିମନ୍ତ୍ରଣରେ ସେ ୨୬ତମ SCO ଶିଖର ସମ୍ମିଳନୀରେ ଯୋଗଦେବେ। ଏହି ସମ୍ମିଳନୀ SCOର ୨୫ତମ ବାର୍ଷିକୀ ସହ ମେଳ ଖାଉଥିବାରୁ ଏହାକୁ ବିଶେଷ ଗୁରୁତ୍ୱ ଦିଆଯାଉଛି। ଭାରତ ୨୦୧୭ ମସିହାରୁ SCOର ଏକ ସକ୍ରିୟ ଏବଂ ଗଠନମୂଳକ ସଦସ୍ୟ ଭାବେ ରହିଆସିଛି। ପ୍ରଧାନମନ୍ତ୍ରୀ ମୋଦି କହିଛନ୍ତି ଯେ ସୁରକ୍ଷା, ସଂଯୋଗୀକରଣ ଓ ସୁଯୋଗକୁ ଆଧାର କରି ଏହି ଅଞ୍ଚଳ ପାଇଁ ଭାରତର ଦୃଷ୍ଟିକୋଣକୁ ସେ ଆଗକୁ ବଢ଼ାଇବେ।

ଆତଙ୍କବାଦ ବିରୋଧରେ ଏକଜୁଟ ହୋଇ ଲଢ଼େଇ

SCO ସମ୍ମିଳନୀରେ ଆତଙ୍କବାଦ ବିରୋଧୀ ଲଢ଼େଇ ଭାରତର ପ୍ରମୁଖ ପ୍ରସଙ୍ଗ ହେବ ବୋଲି ସଙ୍କେତ ମିଳିଛି। ମୋଦି କହିଛନ୍ତି ଯେ ଭାରତ ଆତଙ୍କବାଦ, ବିଚ୍ଛିନ୍ନତାବାଦ ଓ ଉଗ୍ରବାଦ ମୁକ୍ତ ଏକ ଅଞ୍ଚଳ ଗଠନ ପାଇଁ ଅନ୍ୟ SCO ସଦସ୍ୟ ରାଷ୍ଟ୍ରମାନଙ୍କ ସହ ମିଳିତ ଭାବେ କାମ କରିବାକୁ ଚାହୁଁଛି`।  ଏହି ଚ୍ୟାଲେଞ୍ଜଗୁଡ଼ିକ କେବଳ ଭାରତ ପାଇଁ ନୁହେଁ, ବରଂ ସମଗ୍ର ଅଞ୍ଚଳର ଶାନ୍ତି ଓ ସ୍ଥିରତା ପାଇଁ ବଡ଼ ବିପଦ ସୃଷ୍ଟି କରୁଛି। ତେଣୁ ଆତଙ୍କବାଦକୁ ସମ୍ପୂର୍ଣ୍ଣ ଭାବରେ ମୂଳୋତ୍ପାଟନ କରିବା ଏବଂ ଏହା ବିରୋଧରେ ଅନ୍ତର୍ଜାତୀୟ ସହଯୋଗ ବଢ଼ାଇବା ଆବଶ୍ୟକ।

ମୋଟାମୋଟି ଭାବେ, ପ୍ରଧାନମନ୍ତ୍ରୀ ମୋଦିଙ୍କ ଏହି ମଧ୍ୟ ଏସିଆ ଗସ୍ତକୁ କୂଟନୈତିକ ଓ ରଣନୈତିକ ଦୃଷ୍ଟିରୁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ଦେଖାଯାଉଛି। ଗୋଟିଏ ପଟେ ଉଜବେକିସ୍ତାନ ସହିତ ଦ୍ୱିପାକ୍ଷିକ ସମ୍ପର୍କକୁ ନୂଆ ଶକ୍ତି ଦେବା, ଅନ୍ୟପଟେ SCO ମଞ୍ଚରେ ଆତଙ୍କବାଦ ବିରୋଧୀ ଲଢ଼େଇ, ଆଞ୍ଚଳିକ ସୁରକ୍ଷା ଓ ସଂଯୋଗୀକରଣ ନେଇ ଭାରତର ସ୍ପଷ୍ଟ ଦୃଷ୍ଟିକୋଣ ଉପସ୍ଥାପନ କରିବା ଏହି ଗସ୍ତର ପ୍ରମୁଖ ଉଦ୍ଦେଶ୍ୟ ରହିଛି।