ରାମନବମୀରେ ପ୍ରଧାନମନ୍ତ୍ରୀ ମୋଦିଙ୍କ ବଡ଼ ଉପହାର । ଦେଶର ପ୍ରଥମ ଭର୍ଟିକାଲ୍ ଲିଫ୍ଟ ସମୁଦ୍ର ବ୍ରିଜର ଉଦଘାଟନ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ନୂଆ ପମ୍ବନ ବ୍ରିଜର ଲମ୍ବ ୨.୦୮ କିଲୋମିଟର । ଏହି ବ୍ରିଜ୍ ୫ ମିନିଟ୍‌ରେ ୨୨ ମିଟର ଉପରକୁ ଉଠିବ । ଏହା ଏସିଆର ପ୍ରଥମ ଭର୍ଟିକାଲ୍ ଲିଫ୍ଟ ସ୍ପାନ ରେଲୱେ ବ୍ରିଜ୍ । ଯାହାର ଭିତ୍ତିପ୍ରସ୍ତର ସ୍ଥାପନ ୨୦୧୯ରେ କରିଥିଲେ ପ୍ରଧାନମନ୍ତ୍ରୀ ମୋଦି ।

ଏହି ବ୍ରିଜ୍‌ଟି ରାମେଶ୍ଵରମ (ପମ୍ବନ ଦ୍ଵୀପ)କୁ ତାମିଲନାଡ଼ୁର ମଣ୍ଡପମ ସହ ଯୋଡ଼ିବ । ଭବିଷ୍ୟତକୁ ଦୃଷ୍ଟିରେ ରଖି ଏହାକୁ ଡବଲ୍ ଟ୍ରାକ୍ ଓ ହାଇ ସ୍ପିଡ୍ ଟ୍ରେନ୍ ପାଇଁ ଡିଜାଇନ୍ କରାଯାଇଛି । ଷ୍ଟିଲ୍‌ରେ ତିଆରି ଏହି ବ୍ରିଜ୍‌ରେ ପଲିସିଲୋକ୍ସେନ୍ କୋଟିଂ ଦିଆଯାଇଛି । ଯାହାକି ବ୍ରିଜ୍‌କୁ ଜଙ୍କ୍ ସହ ସମୁଦ୍ରର ଲୁଣି ପାଣିରୁ ରକ୍ଷା କରିବ । ପୁରୁଣା ପୋଲକୁ ୨୦୨୨ରେ ଜଙ୍କ୍ ଲାଗିବା ଲାଗି ବନ୍ଦ କରି ଦିଆ ଯାଇଥିଲା । ଏହା ପରେ ରାମେଶ୍ଵରମ ଓ ମଣ୍ଡପମ ମଧ୍ୟରେ ରେଳ ଚଳାଚଳ ବନ୍ଦ ହୋଇ ଯାଇଥିଲା ।

ରାମାୟଣ ଅନୁସାରେ, ରାମସେତୁ ନିର୍ମାଣ ରାମେଶ୍ଵରମ ନିକଟ ଧନୁଷକୋଡିରୁ ଆରମ୍ଭ ହୋଇଥିଲା । ଏଥିପାଇଁ ଆସ୍ଥା ଦୃଷ୍ଟିରୁ ଏହି ସ୍ଥାନ ମହତ୍ତ୍ଵପୂର୍ଣ୍ଣ । ଏହାଛଡ଼ା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ତାମିଲନାଡ଼ୁରେ ୮୩୦୦ କୋଟି ଟଙ୍କାର ବିଭିନ୍ନ ରେଳ ଓ ସଡ଼କ ପ୍ରକଳ୍ପର ଶିଳାନ୍ୟାସ ଓ ଉଦଘାଟନ କରିଛନ୍ତି ।

ନୂଆ ପମ୍ବନ ବ୍ରିଜ୍ ୧୦୦ଟି ଅଂଶକୁ ମିଶାଇ ତିଆରି କରାଯାଇଛି । ସମୁଦ୍ରରେ ଯେତେବେଳେ ଜାହାଜ ଯିବ ତ ଏହି ନ୍ୟାଭିଗେସନ୍ ବ୍ରିଜର ମଝି ଅଂଶ ଉପରକୁ ଉଠିଯିବ । ଏହା ଇଲେକ୍ଟ୍ରୋ-ମେକେନିକାଲ୍ ସିଷ୍ଟମରେ କାମ କରିବ । ବ୍ରିଜ୍‌ର ମଝି ଅଂଶ ମାତ୍ର ୫ ମିନିଟ୍‌ରେ ୨୨ ମିଟର ପର୍ଯ୍ୟନ୍ତ ଉପରକୁ ଉଠି ପାରିବ । ଆଉ ଏଥିପାଇଁ ମାତ୍ର ଜଣେ କର୍ମଚାରୀଙ୍କ ଆବଶ୍ୟକତା ରହିବ ।

ପୁରୁଣା ବ୍ରିଜ୍ କ୍ୟାଣ୍ଟିଲିଭର ପୋଲ ଥିଲା । ତେଣୁ ତାହାକୁ ଲିବର ଜରିଆରେ ଖୋଲା ଯାଉଥିଲା । ଯେଉଁଥିପାଇଁ ୧୪ ଲୋକଙ୍କ ଆବଶ୍ୟକତା ରହୁଥିଲା । ଏବେ ହୋଇଥିବା ନୂଆ ବ୍ରିଜ୍‌ରେ ସମୁଦ୍ର ପବନର ବେଗ ଘଣ୍ଟାପ୍ରତି ୫୮ କିମିରୁ ଅଧିକ ହେଲେ ଭର୍ଟିକାଲ୍ ସିଷ୍ଟମ କାମ କରିବ ନାହିଁ । ସ୍ଵୟଂଚାଳିତ ଭାବେ ରେଡ୍ ସିଗନାଲ୍ ଆସିବ । ଆଉ ପବନ କମିବା ପର୍ଯ୍ୟନ୍ତ ଟ୍ରେନ୍ ଚଳାଚଳ ବନ୍ଦ ରହିବ । ଏ ସ୍ଥିତି ମୁଖ୍ୟତଃ ଅକ୍ଟୋବରରୁ ଫେବ୍ରୁଆରୀ ଯାଏଁ ରହିବ ।