ଭାରତ-ମରିସସ୍ ସମ୍ପର୍କରେ ଯୋଡ଼ି ହେଲା ନୂଆ ଅଧ୍ୟାୟ, ସ୍ଥାନୀୟ ମୁଦ୍ରାରେ ବ୍ୟବସାୟ ପାଇଁ ଆଲୋଚନା

ନୂଆଦିଲ୍ଲୀ: ଆଧ୍ୟାତ୍ମିକ ସହର କାଶୀରେ ମରିସସ୍ ପ୍ରଧାନମନ୍ତ୍ରୀଙ୍କ ସହ ପ୍ରଧାନମନ୍ତ୍ରୀ ମୋଦିଙ୍କ ଗୁରୁତ୍ବପୂର୍ଣ୍ଣ ଆଲୋଚନା । ମରିସସ୍ ପାଇଁ ଭାରତ ସରକାରଙ୍କ ପକ୍ଷରୁ ୨୧୫ ମିଲିୟନ୍ ଡଲାରର ସହାୟତା ଘୋଷଣା କରାଯାଇଛି । କିନ୍ତୁ ଏହା ସହାୟତା ନୁହେଁ, ମରିସସରେ ଭାରତରେ ବଡ଼ ପୁଞ୍ଜି ନିବେଶ । ଆଗାମୀ ଦିନରେ ଏହାର ସୁଫଳ ମିଳିବ । ଭାରତ ଓ ମରିସସ୍ ଦୁଇଟି ଦେଶ ହେଲେ ମଧ୍ୟ ଗୋଟିଏ ସ୍ଵପ୍ନ ଓ ଲକ୍ଷ୍ୟ ରହିଥିବା କହିଛନ୍ତି ପ୍ରଧାନମନ୍ତ୍ରୀ ମୋଦି ।

ବିଜ୍ଞାନ ଓ ପ୍ରଯୁକ୍ତି, ବରିଷ୍ଠ ଅଧିକାରୀଙ୍କୁ ତାଲିମ୍ କ୍ଷେତ୍ରରେ ସ୍ଵାକ୍ଷରିତ ହୋଇଛି ରାଜିନାମା । ଶକ୍ତି ସୁରକ୍ଷା ହେଉଛି ଦ୍ଵିପାକ୍ଷିକ ସମ୍ପର୍କର ଏକ ଅଭିନ୍ନ ଅଙ୍ଗ । ପ୍ରଥମଥର ପାଇଁ ଭାରତ ବାହାରେ ମରିସସରେ ଜନ ଔଷଧୀ କେନ୍ଦ୍ର ଖୋଲାଯିବ । ଆଇଆଇଟି ମାଦ୍ରାସ, ଇଣ୍ଡିଆନ୍ ଇନଷ୍ଟିଚ୍ୟୁଟ୍ ଅଫ୍ ପ୍ଲାଣ୍ଟେସନ ମ୍ୟାନେଜମେଣ୍ଟ ପକ୍ଷରୁ ୟୁନିଭର୍ସିଟି ଅଫ୍ ମରିସସ୍ ସହ ସ୍ଵାକ୍ଷରିତ ହୋଇଛି ରାଜିନାମା ।

ପୂର୍ବରୁ ନୂଆଦିଲ୍ଲୀରେ ବିଭିନ୍ନ ଦେଶର ରାଷ୍ଟ୍ରମୁଖ୍ୟଙ୍କ ସହ ଆଲୋଚନା ହେଉଥିବା ବେଳେ ପ୍ରଥମଥର ପାଇଁ ଆଧ୍ୟାତ୍ମିକ ସହର କାଶୀରେ ମରିସସ୍ ପ୍ରଧାନମନ୍ତ୍ରୀଙ୍କୁ ଭେଟିଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ବାରାଣସୀ ହେଉଛି ଭାରତୀୟ ସଭ୍ୟତା ଓ ସଂସ୍କୃତିର ଆତ୍ମା । ନିଜର ନିର୍ବାଚନ ମଣ୍ଡଳୀ ବାରାଣସୀରେ ନଭିଚନ୍ଦ୍ର ରାମଗୁଲାମଙ୍କୁ ଅତିଥି ଭାବେ ପାଇ ସେ ଅତ୍ୟନ୍ତ ଗର୍ବିତ ବୋଲି କହିଛନ୍ତି । ଦୁଇ ଦେଶ ମଧ୍ୟରେ ସ୍ଥାନୀୟ ମୁଦ୍ରାରେ ବ୍ୟବସାୟ ପାଇଁ ମଧ୍ୟ ହୋଇଛି ଆଲୋଚନା ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତାଙ୍କ ନିର୍ବାଚନ ମଣ୍ଡଳୀ ବାରାଣସୀରେ ପହଞ୍ଚିବା ପରେ ତାଙ୍କୁ ଅଭୂତପୂର୍ବ ସମ୍ବର୍ଦ୍ଧନା ମିଳିଥିଲା । ରାସ୍ତାର ଦୁଇ ପାର୍ଶ୍ଵରେ ହଜାର ହଜାର ଜନତା ଛିଡ଼ା ହୋଇ ତାଙ୍କୁ ସ୍ବାଗତ କରିଥିଲେ । ବେଦମନ୍ତ୍ର ଉଚ୍ଚାରଣ ସହ ସାଧୁସନ୍ଥମାନେ ମଧ୍ୟ ପ୍ରଧାନମନ୍ତ୍ରୀଙ୍କୁ ସ୍ବାଗତ କରିଥିଲେ ।