ସୋମନାଥ ମନ୍ଦିରରେ ବାରମ୍ବାର ଆକ୍ରମଣ ଓ ଲୁଣ୍ଠନ ହୋଇଛି । ପ୍ରଥମେ ୧୦୨୬ ଖ୍ରୀଷ୍ଟାବ୍ଦରେ ଆକ୍ରମଣ କରିଥିଲା ଗଜନୀର ମାମୁଦ । ସେହି କଳଙ୍କିତ ଅଧ୍ୟାୟକୁ ହଜାରେ ବର୍ଷ ପୂରିଥିବା ବେଳେ ପ୍ରକାଶ ପାଇଛି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଆଲେଖ୍ୟ । ମୋଦି ବର୍ଣ୍ଣନା କରିଛନ୍ତି- 'ସୋମନାଥ ମନ୍ଦିର ଭାରତୀୟ ସଭ୍ୟତାର ଅଦମ୍ୟ ଆତ୍ମା'। ବାରମ୍ବାର ଆକ୍ରମଣ ସତ୍ବେ ଧ୍ବଂସ ସ୍ତୂପ ତଳୁ ପୁଣି ମୁଣ୍ଡ ଟେକି ଉଠିଛି ସୋମନାଥ ମନ୍ଦିର । ଆଗାମୀ ୧୧ ତାରିଖରେ 'ସୋମନାଥ ସ୍ବାଭିମାନ ପର୍ବ'ରେ ସାମିଲ ହେବାକୁ ଗୁଜରାଟ ଯିବେ ପ୍ରଧାନମନ୍ତ୍ରୀ । ୮ରୁ ୧୧ ତାରିଖ ଯାଏଁ ତିନିଦିନ ଧରି ବିଭିନ୍ନ ଆଧ୍ୟାତ୍ମିକ କାର୍ଯ୍ୟକ୍ରମ ସ୍ଥିର କରାଯାଇଛି ।

ପ୍ରଭୁ ସୋମନାଥଙ୍କ ପରମ ଭକ୍ତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଗୁଜରାଟରେ ଥିବା ସୋମନାଥ ଜ୍ୟୋତିର୍ଲିଙ୍ଗଙ୍କ ଦର୍ଶନ ପାଇଁ ବାରମ୍ବାର ଯାଇଛନ୍ତି ପ୍ରଧାନମନ୍ତ୍ରୀ । ସୋମନାଥ ମନ୍ଦିର ଭବ୍ୟତାର ସୁରକ୍ଷା ପାଇଁ ଏକାଧିକ ପ୍ରକଳ୍ପ ହାତକୁ ନେଇଛନ୍ତି କେନ୍ଦ୍ର ସରକାର । ସୋମନାଥ ମନ୍ଦିର ଉପରେ ପ୍ରଥମ ଆକ୍ରମଣକୁ ପୂରିଛି ହଜାରେ ବର୍ଷ । ଏହି ଅବସରରେ ସୋମନାଥ ମନ୍ଦିର ସଂପର୍କରେ ପ୍ରକାଶ ପାଇଛି ପ୍ରଧାନମନ୍ତ୍ରୀ ମୋଦିଙ୍କ ଆଲେଖ୍ୟ ।

ପ୍ରଧାନମନ୍ତ୍ରୀ ଲେଖିଛନ୍ତି ୧୦୨୬ ଖ୍ରୀଷ୍ଟାବ୍ଦରେ ସୋମନାଥ ମନ୍ଦିର ଉପରେ ପ୍ରଥମ ଆକ୍ରମଣ ହୋଇଥିଲା । ଏହି ନଗରୀର ଲୋକଙ୍କ ଉପରେ ନିଷ୍ଠୁର ଆକ୍ରମଣ ସହ ମନ୍ଦିରକୁ ବିଭତ୍ସ ଭାବରେ ଧ୍ବଂସ କରାଯାଇଥିଲା । ଏହାର ବିସ୍ତୃତ ବର୍ଣ୍ଣନା ବିଭିନ୍ନ ଐତିହାସିକ ଗ୍ରନ୍ଥାଗାରରେ ଲିପିବଦ୍ଧ ରହିଛି । ମଧ୍ୟଯୁଗୀୟ ବର୍ବରତା ପରବର୍ତ୍ତୀ ସମୟରେ ବାରମ୍ବାର ଆକ୍ରମଣ କରିବାକୁ ପ୍ରେରଣା ଦେଇଥିଲା । ହେଲେ ପ୍ରତ୍ୟେକ ଥର ଏହାକୁ ସୁରକ୍ଷା ଦେବା ପାଇଁ ଆମ ଦେଶରେ ବୀର ଓ ବୀରାଙ୍ଗନା ଉପଲବ୍ଧ ଥିଲେ । ପିଢ଼ି ପରେ ପିଢ଼ି ଏହି ମହାନ ସଭ୍ୟତାର ସୁରକ୍ଷା ପାଇଁ ଲୋକମାନେ ଆକ୍ରମଣକାରୀଙ୍କ ଆଗରେ ଠିଆ ହୋଇଥିଲେ । ଧ୍ବଂସସ୍ତୂପରେ ପରିଣତ ହୋଇଥିବା ମନ୍ଦିରର ପୁନର୍ଗଠନ କରି ପୁଣି ଠିଆ କରାଇଥିଲେ ।

୧୯୪୭ ଦୀପାବଳିରେ ସର୍ଦ୍ଦାର ବଲ୍ଲଭଭାଇ ପଟେଲ ସୋମନାଥ ମନ୍ଦିରର ଧ୍ବଂସାବଶେଷ ଦେଖି ମ୍ରିୟମାଣ ହେବା ସହ, ଏହାର ପୁନଃନିର୍ମାଣ ପାଇଁ ନିର୍ଦ୍ଦେଶ ଦେଇଥିଲେ । ୧୯୫୧ ମସିହା ମେ' ୧୧ ତାରିଖରେ ଭବ୍ୟ ସୋମନାଥ ମନ୍ଦିର ନିର୍ମାଣ ହୋଇ ଶ୍ରଦ୍ଧାଳୁଙ୍କ ପାଇଁ ଦ୍ବାର ଖୋଲି ଦିଆଗଲା । ତତକାଳୀନ ପ୍ରଧାନମନ୍ତ୍ରୀ ଜବାହାରଲାଲ ନେହରୁ ଏଭଳି ଘଟଣାକ୍ରମରେ ବିଶେଷ ଖୁସି ନଥିଲେ ବୋଲି ପ୍ରଧାନମନ୍ତ୍ରୀ ଲେଖିଛନ୍ତି । ବାରମ୍ବାର ଆକ୍ରମଣ ସତ୍ବେ ଧ୍ବଂସସ୍ତୂପ ଭିତରୁ ପୁଣି ମୁଣ୍ଡ ଟେକିଛି ସୋମନାଥ ମନ୍ଦିର । ତେଣୁ 'ସୋମନାଥ ମନ୍ଦିର ଭାରତୀୟ ସଭ୍ୟତାର ଅଦମ୍ୟ ଆତ୍ମା' ବୋଲି ପ୍ରଧାନମନ୍ତ୍ରୀ ତାଙ୍କ ଆଲେଖ୍ୟରେ ସୂଚନା ଦେଇଛନ୍ତି ।

ସୋମନାଥ ସ୍ବାଭିମାନ ପର୍ବରେ ସାମିଲ ହେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଏଥିପାଇଁ ଆଗାମୀ ୧୧ ତାରିଖରେ ଗୁଜରାଟ ଗସ୍ତ କରିବେ ବୋଲି ଜଣାପଡିଛି । ଏହି ଅବସରରେ ୮ରୁ ୧୧ ତାରିଖ ଯାଏଁ ବିଭିନ୍ନ ସାମାଜିକ ଓ ଆଧ୍ୟାତ୍ମିକ କାର୍ଯ୍ୟକ୍ରମ ସ୍ଥିର କରାଯାଇଛି ।

ଶହଶ୍ରାବ୍ଦିର ଉତ୍ଥାନ-ପତ୍ତନ ଭିତରେ ସୋମନାଥ ଭାରତୀୟ ଆଧ୍ୟାତ୍ମିକ ସ୍ମୁତି ଓ ସାମୁହିକ ସଂକଳ୍ପକୁ ନିରନ୍ତର ସୁଦୃଢ଼ କରିଆସିଛି । ସୋମନାଥ ମନ୍ଦିରକୁ ନେଇ ପ୍ରଧାନମନ୍ତ୍ରୀଙ୍କ ଆଲେଖ୍ୟ ପ୍ରକାଶ ପାଇବା ପରେ ସୋସିଆଲ ମିଡିଆ ଏକ୍ସରେ ଏନେଇ ପୋଷ୍ଟ କରିଛନ୍ତି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।