ହର ହର ମହାଦେବ ମନ୍ତ୍ରରେ କମ୍ପିଲା ପରିବେଶ । ସବୁଠି ପାଳନ ହେଲା ସୋମନାଥ ସ୍ୱାଭିମାନ ପର୍ବ । ଗାଁଠୁ ସହର ସବୁ ଶୈବପୀଠରେ ଜଳିଲା ଦୀପ, ମହାଦେବଙ୍କୁ କରାଗଲା ଆରାଧନା । ଗୁଜରାଟର ସୋମନାଥ ମନ୍ଦିର ଉପରେ ମହମୁଦ ଗଜନୀର ପ୍ରଥମ ଆକ୍ରମଣର ହଜାରେ ବର୍ଷ ପୂର୍ତ୍ତି ଅବସରରେ ଭାରତୀୟ ସଭ୍ୟତାର ଅଦମ୍ୟ ସାହସ ଓ ନିରନ୍ତରତାକୁ ସ୍ମରଣ ପାଇଁ ସାରା ଦେଶରେ ପାଳନ ହେଉଛି ସୋମନାଥ ସ୍ବାଭିମାନ ପର୍ବ ।

ଗୁଜରାଟର ପ୍ରସିଦ୍ଧ ସୋମନାଥ ମନ୍ଦିର ଉପରେ ପ୍ରଥମ ଆକ୍ରମଣର ହଜାରେ ବର୍ଷ ପୂର୍ତ୍ତି ଅବସରରେ ସାରା ରାଜ୍ୟରେ କରାଯାଇଛି ମହାଦେବଙ୍କୁ ପୂଜାର୍ଚ୍ଚନା । ଆଧ୍ୟାତ୍ମିକ, ଦିବ୍ୟ ଓ ଭବ୍ୟ ପରିବେଶ ଭିତରେ ଶୈବପୀଠରେ ମହାଦେବଙ୍କୁ କରାଯାଇଛି ଆରାଧନା । ସମ୍ବଲପୁରଠୁ ରାଜଧାନୀ, ଝାରସୁଗୁଡ଼ାରୁ କେନ୍ଦ୍ରାପଡ଼ା ସବୁଠି ଶୁଭିଲା ମହାଦେବଙ୍କ ମହାମନ୍ତ୍ର ।

ସମ୍ବଲପୁର ମାଆ ସମଲେଶ୍ବରୀଙ୍କ ପୀଠରେ ଥିବା ଶିବ ମନ୍ଦିରରେ ପୂଜାର୍ଚ୍ଚନା କରିଥିଲେ ମୁଖ୍ୟମନ୍ତ୍ରୀ ମୋହନ ମାଝୀ । ରାଜଧାନୀ ଭୁବନେଶ୍ବରରେ ସୋମନାଥ ସ୍ୱାଭିମାନ ପର୍ବ ପାଇଁ ଜଳିଲା ହଜାରେ ଦୀପ । ପ୍ରଭୁ ଲିଙ୍ଗରାଜଙ୍କ ମନ୍ଦିରରେ ଏହି ଅବସରରେ ସାମିଲ ହୋଇଥିଲେ ରାଜ୍ୟ ବିଜେପି ସଭାପତି ମନମୋହନ ସାମଲ, ସମୀର ମହାନ୍ତି, ଏକାମ୍ର ବିଧାୟକ ବାବୁ ସିଂ, ସ୍ୱାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗଙ୍କ ସମେତ ବହୁ କର୍ମକର୍ତ୍ତା ।

ସେହିପରି ଝାରସୁଗୁଡ଼ା ସ୍ଥିତ ବାବା ଝାଡେଶ୍ୱର ଶୈବପୀଠରେ ପୂଜାର୍ଚ୍ଚନା ସହ ଦୀପ ପ୍ରଜ୍ଜ୍ୱଳନ କରି ସୋମନାଥ ସ୍ୱାଭିମାନ ପର୍ବ ପାଳନ କରିଥିଲେ ଝାରସୁଗୁଡ଼ା ବିଧାୟକ ଟଙ୍କଧର ତ୍ରିପାଠୀ ।

କେନ୍ଦ୍ରାପଡାର ବିଭିନ୍ନ ଶୈବପୀଠରେ ହୋଇଥିଲା ସ୍ଵତନ୍ତ୍ର ପୂଜାର୍ଚ୍ଚନା । କଜଳା ସ୍ଥିତ ବେଲେଶ୍ଵର ମନ୍ଦିରରେ ଜିଲ୍ଲା ବିଜେପି ପକ୍ଷରୁ ମହାଦେବଙ୍କୁ ଆରାଧନା କରାଯାଇଥିଲା । କେବଳ କେନ୍ଦ୍ରାପଡ଼ା ନୁହେଁ ବରଗଡ ଜିଲ୍ଲାର ପ୍ରସିଦ୍ଧ ଅଷ୍ଟଶମ୍ଭୁ ଶୈବ ପୀଠରେ ପୂଜାର୍ଚ୍ଚନା କରିଥିଲେ ଅତାବିରା ବିଧାୟକ ନିହାର ମହାନନ୍ଦ। ନବରଙ୍ଗପୁରର ପ୍ରତି ବ୍ଲକରେ ଥିବା ଶିବ ମନ୍ଦିରରେ ହୋଇଥିଲା ଦୀପ ଦାନ । ମହମୁଦ ଗଜନୀଙ୍କ ହଜାରେ ବର୍ଷ ତଳେ ଗୁଜରାଟର ସୋମନାଥ ମନ୍ଦିର ଉପରେ ପ୍ରଥମେ କରିଥିଲା ଆକ୍ରମଣ। ଭାରତୀୟ ସଭ୍ୟତାର ଅଦମ୍ୟ ସାହସ ଓ ନିରନ୍ତରତାକୁ ସ୍ମରଣ ପାଇଁ ସାରା ଦେଶରେ ପାଳନ ହେଉଛି ସୋମନାଥ ସ୍ୱାଭିମାନ ପର୍ବ।