ମୌନୀ ଅମାବାସ୍ୟାରେ ପ୍ରୟାଗରାଜ ତ୍ରିବେଣୀ ସଙ୍ଗମ ପାଲଟିଲା ଜନସମୁଦ୍ର
ଅର୍ଗସ ବ୍ୟୁରୋ: ମୌନୀ ଅମାବାସ୍ୟାରେ ଅମୃତ ସ୍ନାନ । ନାଗାସାଧୁଙ୍କ ସହ ବୁଡ଼ ପକାଇଛନ୍ତି କୋଟି କୋଟି ଭକ୍ତ । ସାହି ସ୍ନାନ କରିଛନ୍ତି 13ଟି ଆଖଡ଼ାର ସାଧୁ ସନ୍ଥ। ପାରମ୍ପରିକ ରୀତିନୀତି ପରେ ତ୍ରିବେଣୀ ସଂଗମ ମୁହାଁ ହେଲେ ବିଭିନ୍ନ ଆଖଡ଼ା । ହଜାର ହଜାର ନାଗାସାଧୁଙ୍କ ଶୋଭାଯାତ୍ରା ଯୋଗୁଁ ଜନସମୁଦ୍ର ପାଲଟିଲା ପ୍ରୟାଗରାଜ ରାସ୍ତା । ଆଖଡ଼ା ଗୁଡ଼ିକର ପଟୁଆର ଯିବାବେଳେ ଆକାଶମାର୍ଗରୁ କରାଗଲା ପୁଷ୍ପ ବୃଷ୍ଟି । ମୌନୀ ଅମାବାସ୍ୟାର ମହାର୍ଘ୍ୟ ବେଳାରେ ବୁଡ ପକାଇବା ପାଇଁ ବିଳମ୍ବିତ ରାତିରୁ ଆରମ୍ଭ ହୋଇଥିଲା ଶ୍ରଦ୍ଧାଳୁଙ୍କ ସମାଗମ। କିନ୍ତୁ ବ୍ରାହ୍ମମୁହୂର୍ତ୍ତରେ ଦଳାଚକଟା ଭଳି ସ୍ଥିତି ସୃଷ୍ଟି ହୋଇଥିବାରୁ ସାଧୁସନ୍ଥମାନେ ନିଜଆଡୁ ବୁଡ ପକାଇବା ବିଳମ୍ବ କରିଥିଲେ ।
ପ୍ରଥମେ ସାଧାରଣ ଲୋକଙ୍କୁ ଅମୃତ ସ୍ନାନ କରିବାକୁ ସୁଯୋଗ ଦେଇଥିଲେ। ମୌନୀ ଅମାବାସ୍ୟାରେ ଅମୃତ ସ୍ନାନ ପାଇଁ ବିଳମ୍ବିତ ରାତିରୁ ଜମିିଥିଲା ଶ୍ରଦ୍ଧାଳୁଙ୍କ ଭିଡ଼ । ତ୍ରିବେଣୀ ସଙ୍ଗମ ଆଡକୁ ମୁହାଁଇଥିଲେ କୋଟି କୋଟି ଭକ୍ତ । ସଙ୍ଗମସ୍ଥଳର ଏକ କିଲୋମଟର ଦୂରରୁ ହଠାତ୍ ବ୍ୟାରିକେଡ୍ ଭାଙ୍ଗି ଆଗକୁ ଯିବାକୁ ଚେଷ୍ଟା କରିଥିଲେ । ଏହି ସମୟରେ ସୃଷ୍ଟି ହୋଇଥିଲା ଦଳାଚକଟା ସ୍ଥିତି । ପେଲାଠେଲାରେ କିଛି ମହିଳା ଖସିପଡିବା ପରେ ଶ୍ରଦ୍ଧାଳୁଙ୍କ ମନରେ ଛନକା ପଶିଯାଇଥିଲା। ଆହତଙ୍କୁ ତୁରନ୍ତ ମେଡିକାଲରେ ଭର୍ତ୍ତି କରାଇଥିଲା ପ୍ରଶାସନ । ପ୍ରଧାନମନ୍ତ୍ରୀ ପ୍ରଭାବିତଙ୍କ ପରିବାରକୁ ସମବେଦନା ଜଣାଇବା ସହ ସବୁପ୍ରକାର ସହାୟତା ଘୋଷଣା କରିଛନ୍ତି । ପ୍ରଧାନମନ୍ତ୍ରୀ ଓ କେନ୍ଦ୍ର ଗୃହମନ୍ତ୍ରୀ ୟୁପି ମୁଖ୍ୟମନ୍ତ୍ରୀଙ୍କ ସହ କଥା ହୋଇଛନ୍ତି। ଯୋଗୀ କହିଛନ୍ତି ପରିସ୍ଥିତି ନିୟନ୍ତ୍ରଣାଧୀନ ଅଛି। କୁମ୍ଭମେଳାରେ ଆଜି ସୁଦ୍ଧା ଦୁଇଟି ସାହି ସ୍ନାନ ହୋଇଥିବା ବେଳେ ବାକି ଅଛି ଆଉ ତିନିଟି ସାହିସ୍ନାନ । ଫେବୃଆରୀ ୩ ବସନ୍ତ ପଞ୍ଚମୀ, ଫେବୃଆରୀ ୧୨ ମାଘ ପୂର୍ଣ୍ଣିମା ଓ ଫେବୃଆରୀ ୨୬ ମହା ଶିବରାତ୍ରି ଅବସରରେ ସାହିସ୍ନାନ ହେବ । ୫ଟି ସାହିସ୍ନାନରେ ମୋଟ ୪୫କୋଟିରୁ ଅଧିକ ଶ୍ରଦ୍ଧାଳୁ ବୁଡ଼ ପକାଇବା ସମ୍ଭାବନା ରହିଛି ।
