ଅର୍ଗସ ବ୍ୟୁରୋ: ମହାରାଷ୍ଟ୍ରରେ ଜଣେ ଗର୍ଭବତୀ ମହିଳାଙ୍କ ପେଟରେ ଏମିତି କିଛି ଦେଖି ଡାକ୍ତର ଚକିତ ହୋଇଯାଇଛନ୍ତି। ଏହା ଏଭଳି ଏକ ଘଟଣା ଯାହା ଭାରତରେ ଏପର୍ଯ୍ୟନ୍ତ କେବଳ ୧୦-୧୨ ଥର ଘଟିଛି। ଆଜ୍ଞା ହଁ, ଆପଣ ବିଶ୍ୱାସ କରିପାରିବେ ନାହିଁ କିନ୍ତୁ ଏହା ସତ୍ୟ। ଜଣେ ମହିଳାଙ୍କ ଗର୍ଭରେ ଏକ ଭ୍ରୁଣ ମିଳିଛି। ଏହି ଦୃଶ୍ୟ ଦେଖି ଡାକ୍ତରମାନେ ମଧ୍ୟ ଆଶ୍ଚର୍ଯ୍ୟ ହୋଇଯାଇଛନ୍ତି। ଯେତେବେଳେ ଗର୍ଭବତୀ ମହିଳାଙ୍କ ଅଲଟ୍ରାସାଉଣ୍ଡ କରାଯାଇଥିଲା, ସେତେବେଳେ ଏହି ବାସ୍ତବତା ସାମ୍ନାକୁ ଆସିଥିଲା। ଏହି ଘଟଣାଟି ମହାରାଷ୍ଟ୍ରର ବୁଲଢାଣା ଜିଲାର। ମହିଳାଙ୍କ ବୟସ ୩୨ ବର୍ଷ। ତାଙ୍କ ଭ୍ରୁଣ ଭିତରେ ଏକ ଭ୍ରୁଣ ମିଳିଛି। ଏହା ଏକ ଅତ୍ୟନ୍ତ ବିରଳ ଘଟଣା। ଯେଉଁଥିରେ ଏକ ବିକୃତ ଭ୍ରୁଣ ଅନ୍ୟ ଏକ ଭ୍ରୁଣ ଭିତରେ ଅବସ୍ଥିତ। ମହିଳା ଜଣକ ତାଙ୍କ ନିୟମିତ ଗର୍ଭଧାରଣ ଯାଞ୍ଚ ପାଇଁ ବୁଲଢାଣା ଜିଲା ମହିଳା ହସ୍ପିଟାଲକୁ ଆସିଥିବା ବେଳେ ପରିସ୍ଥିତି ସ୍ପଷ୍ଟ ହୋଇଥିଲା।

ମହିଳା ଜଣକ ୩୫ ସପ୍ତାହର ଗର୍ଭବତୀ ଥିଲେ ଏବଂ ପରୀକ୍ଷା ସମୟରେ, ଡାକ୍ତରମାନେ ଅଲଟ୍ରାସାଉଣ୍ଡରେ ଏକ ଅସ୍ବାଭାବିକ ଗଠନ ଲକ୍ଷ୍ୟ କଲେ, ଯାହା ସେମାନଙ୍କୁ ଚକିତ କରିଦେଲା। ହସ୍ପିଟାଲର ପ୍ରସୂତି ଏବଂ ସ୍ତ୍ରୀରୋଗ ବିଶେଷଜ୍ଞ ଡାକ୍ତର ପ୍ରସାଦ ଅଗ୍ରୱାଲ କହିଛନ୍ତି। ଏହି ଘଟଣା ଅତ୍ୟନ୍ତ ବିରଳ ଏବଂ ପାଞ୍ଚ ଲକ୍ଷରେ କେବଳ ଜଣଙ୍କଠାରେ ଦେଖାଯାଏ। ଡକ୍ଟର ଅଗ୍ରୱାଲ ଆହୁରି କହିଛନ୍ତି, ଏ ପର୍ଯ୍ୟନ୍ତ ସାରା ବିଶ୍ୱରେ କେବଳ ୨୦୦ଟି ଏପରି ମାମଲା ରିପୋର୍ଟ ହୋଇଛି ଏବଂ ଭାରତରେ ୧୦-୧୫ଟି ଏପରି ମାମଲା ରିପୋର୍ଟ ହୋଇଛି। ଡାକ୍ତରଙ୍କ ମତରେ, ଭୂଣ ଭିତରେ ଭ୍ରୁଣ’ର ଏହି ଅବସ୍ଥା ପ୍ରାୟତଃ ଦେଖାଯାଏ ଯେତେବେଳେ ଏକ ବିକୃତ ଭ୍ରୁଣ ଅନ୍ୟ ଏକ ଭ୍ରୁଣ ଭିତରେ ବିକଶିତ ହୁଏ। ଡାକ୍ତର ଅଗ୍ରୱାଲ କହିଛନ୍ତି, ଏହି କ୍ଷେତ୍ରରେ, ମୁଁ ଦେଖିଲି ଯେ ଏକ ସାଧାରଣ ଭାବରେ ବିକାଶଶୀଳ ଭ୍ରୁଣର ପେଟରେ ଆଉ ଏକ ଭ୍ରୁଣ ପରି ଗଠନ ଥିଲା, ଯାହା ନିଶ୍ଚିତ ଭାବରେ ଅସ୍ବାଭାବିକ ଥିଲା। ଏହି ଅଜବ ଅବସ୍ଥାକୁ ନିଶ୍ଚିତ କରିବା ପାଇଁ, ଡାକ୍ତର ଅଗ୍ରୱାଲ ହସ୍ପିଟାଲର ରେଡିଓଲୋଜିଷ୍ଟ ଡାକ୍ତର ଶ୍ରୁତି ଥୋରାଟଙ୍କ ମତାମତ ଲୋଡ଼ିଥିଲେ, ଯିଏ ଏହି ଅବସ୍ଥାକୁ ନିଶ୍ଚିତ କରିଥିଲେ। ଏହି ବିରଳ ଅବସ୍ଥା ଡାକ୍ତରମାନଙ୍କ ପାଇଁ ଏକ ଚ୍ୟାଲେଞ୍ଜ।