Premanand Maharaj / ବୃନ୍ଦାବନରେ ପ୍ରେମାନନ୍ଦ ମହାରାଜଙ୍କ ଶିଷ୍ୟଙ୍କ ସନ୍ଦେହଜନକ ମୃତ୍ୟୁ ଜଣାପଡ଼ିଲା ସତ

ଉତ୍ତରପ୍ରଦେଶର ବୃନ୍ଦାବନରେ ପ୍ରେମାନନ୍ଦ ମହାରାଜଙ୍କ ଶିଷ୍ୟ ରସିକ ଦୁଲାରୀ ଶରଣଙ୍କ ସନ୍ଦେହଜନକ ମୃତ୍ୟୁ ଘଟଣାର ତଦନ୍ତ ଜାରି ରହିଛି । ଆଶ୍ରମର ଏକ କୋଠରୀରୁ ତାଙ୍କ ପ୍ରାଇଭେଟ୍ ପାର୍ଟରେ କ୍ଷତ ଅବସ୍ଥାରେ ମିଳିବା ଏବଂ ଘଟଣାସ୍ଥଳରୁ ଏକ ଗ୍ରାଇଣ୍ଡର୍ ଜବତ ହେବା ପରେ ଘଟଣାକୁ ନେଇ ଅନେକ ପ୍ରଶ୍ନ ଉଠିଛି । ପୋଲିସ ଘଟଣା ସହ ଜଡ଼ିତ ବିଭିନ୍ନ ଦିଗରୁ ତଦନ୍ତ କରୁଛି ।

ବୃନ୍ଦାବନର ସିଓ ସନ୍ଦୀପ କୁମାର କହିଛନ୍ତି ଯେ ତଦନ୍ତ ସମୟରେ କିଛି ତଥ୍ୟ ସାମ୍ନାକୁ ଆସିଛି । ତେବେ ମାମଲାର ସମସ୍ତ ସମ୍ଭାବ୍ୟ ଦିଗକୁ ଧ୍ୟାନରେ ରଖି ତଦନ୍ତ କରାଯାଉଛି । ମୃତକଙ୍କର କିଛି ଖରାପ ଅଭ୍ୟାସ ଥିଲା କି ନାହିଁ, ଏନେଇ ପୋଲିସ କହିଛି ଯେ ତାଙ୍କ ରକ୍ତ ନମୁନା ସୁରକ୍ଷିତ ରଖାଯାଇ ଫୋରେନସିକ୍ ପରୀକ୍ଷା ପାଇଁ ପଠାଯାଇଛି । ରିପୋର୍ଟ ଆସିବା ପରେ ହିଁ ଏନେଇ ସ୍ପଷ୍ଟ ଚିତ୍ର ମିଳିବ ।

ପୋଲିସର ପ୍ରାରମ୍ଭିକ ତଦନ୍ତ ଏବଂ ଆଶ୍ରମର ସିସିଟିଭି ଫୁଟେଜ୍‌ରୁ ରସିକ ଦୁଲାରୀ ଶରଣ ଛାତରୁ ତଳକୁ ପଡ଼ିଥିବା ସୂଚନା ମିଳିଛି । ପୋଷ୍ଟମର୍ଟମ୍ ରିପୋର୍ଟରେ ଅତ୍ୟଧିକ ରକ୍ତସ୍ରାବକୁ ମୃତ୍ୟୁର ପ୍ରମୁଖ କାରଣ ବୋଲି ଦର୍ଶାଯାଇଛି । ଘଟଣାସ୍ଥଳରୁ ମିଳିଥିବା ଗ୍ରାଇଣ୍ଡର୍‌କୁ ଫୋରେନସିକ୍ ଟିମ୍ ଜବତ କରିଛି ।

ଏହି ମାମଲାରେ ପୋଲିସ ଆଶ୍ରମର ପରିଚାଳକ, ଦାୟିତ୍ୱରେ ଥିବା ବ୍ୟକ୍ତି ଏବଂ ମୃତକଙ୍କ ସହ ରହୁଥିବା ଲୋକଙ୍କୁ ପଚରାଉଚରା କରୁଛି । ମୃତକଙ୍କ ଭାଇ ମନୀଷ ମାମଲାର ନିରପେକ୍ଷ ତଦନ୍ତ ଦାବି କରିଛନ୍ତି ।

ସୂଚନା ଅନୁସାରେ, ଶୁକ୍ରବାର ସକାଳ ପ୍ରାୟ ସାଢ଼େ ୧୦ଟା ସମୟରେ ବୃନ୍ଦାବନର ବରାହଘାଟ ଅଞ୍ଚଳରେ ଥିବା ଗୁରୁ କୃପା କୁଞ୍ଜ ଆଶ୍ରମର ଚାରି ମହଲା କୋଠାରୁ ପଡ଼ି ରସିକ ଦୁଲାରୀ ଶରଣଙ୍କ ମୃତ୍ୟୁ ହୋଇଥିଲା । ପରିବାର ଲୋକେ ବୃନ୍ଦାବନରେ ହିଁ ତାଙ୍କର ଶେଷକୃତ୍ୟ ସମ୍ପନ୍ନ କରିଛନ୍ତି । ଫୋରେନସିକ୍ ରିପୋର୍ଟ, ରକ୍ତ ନମୁନା ପରୀକ୍ଷା ଏବଂ ପୋଲିସର ପଚରାଉଚରା ପରେ ମୃତ୍ୟୁର ପ୍ରକୃତ କାରଣ ନେଇ ଅଧିକ ସ୍ପଷ୍ଟତା ମିଳିପାରେ ।