ଆସନ୍ତା ୧୦ ତାରିଖରୁ ପିଏମ ମୋଦିଙ୍କ ବିଦେଶ ଗସ୍ତ

ଫେବ୍ରୁଆରି ୧୨ ତାରିଖରେ ପ୍ରଧାନମନ୍ତ୍ରୀ ମୋଦିଙ୍କ ଆମେରିକା ଗସ୍ତ । ଦ୍ବିତୀୟ ଥର ପାଇଁ ଟ୍ରମ୍ପ ଆମେରିକା ରାଷ୍ଟ୍ରପତି ହେବା ପରେ ପ୍ରଧାନମନ୍ତ୍ରୀ ମୋଦିଙ୍କ ଗସ୍ତ ବେଶ ଗୁରୁତ୍ବପୂର୍ଣ୍ଣ ହେବାକୁ ଯାଉଛି । ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହ ଦ୍ବିପାକ୍ଷିକ ବୈଠକ ହେବାକୁ ଯାଉଛି । ୧୦ରୁ ୧୨ ଫ୍ରାନ୍ସ ଗସ୍ତ ପରେ ମୋଦି ଫେବ୍ରୁଆରି ୧୨ ସନ୍ଧ୍ୟା‌ରେ ୱାସିଂଟନ୍ ରେ‌ ପହଞ୍ଚିବେ । ଫ୍ରାନ୍ସରେ ଏଆଇ ଶିଖର ସମ୍ମିଳନୀରେ ଯୋଗ ଦେବା ପରେ ପିଏମ ମୋଦିଙ୍କ ଆମେରିକା ଗସ୍ତ କାର୍ଯ୍ୟକ୍ରମ ରହିଛି ।

ଫେବ୍ରୁଆରି ୧୪ ପର୍ଯ୍ୟନ୍ତ ସେ ଆମେରିକାରେ ରହିବେ। ଗସ୍ତ ସମୟରେ ଆମେରିକୀୟ କର୍ପୋରେଟ୍‌ ନେତାଙ୍କ ସହ ଆଲୋଚନା କରିବେ । ତାପରେ ପ୍ରବାସୀ ଭାରତୀୟଙ୍କୁ ମଧ୍ୟ ଭେଟିବେ ମୋଦି । ଜାନୁଆରୀ ୨୦ ତାରିଖରେ ଟ୍ରମ୍ପ ଆମେରିକା ରାଷ୍ଟ୍ରପତି ଭାବେ ଶପଥ ନେବାପରେ ଟ୍ରମ୍ପଙ୍କୁ ଫୋନ୍‌ କରି ଶୁଭେଚ୍ଛା ଜଣାଇଥିଲେ ମୋଦି । ମୋଦିଙ୍କୁ ଫେବ୍ରୁଆରୀରେ ହ୍ବାଇଟ୍‌ ହାଉସ୍‌ ଗସ୍ତ ପାଇଁ ନିମନ୍ତ୍ରଣ କରିଥିଲେ ଟ୍ରମ୍ପ ।

ମୋଦିଙ୍କ ଗସ୍ତ ଅବସରରେ ଭାରତ-ଆମେରିକା ଦ୍ବିପାକ୍ଷିକ ବାଣିଜ୍ୟ ସଂପର୍କ ଏବଂ ସାମରିକ ସହଯୋଗ ନେଇ କେତେକ ଗୁରୁତ୍ବପୂର୍ଣ୍ଣ ନିଷ୍ପତ୍ତି ନିଆଯାଇପାରେ। ମଧ୍ୟପ୍ରାଚ୍ୟ ସ୍ଥିତି, ରୁ‌ଷ୍‌-ୟୁକ୍ରେନ୍‌ ଯୁଦ୍ଧ ସମେତ ବିଭିନ୍ନ ସାଂପ୍ରତିକ ବୈଶ୍ବିକ ସଙ୍କଟ ପ୍ରସଙ୍ଗରେ ମଧ୍ୟ ଉଭୟ ରାଷ୍ଟ୍ର ନେତାଙ୍କ ମଧ୍ୟରେ ଆଲୋଚନା ହୋଇପାରେ ।