ଅର୍ଗସ ବ୍ୟୁରୋ: ମୋଦି ସରକାରର ଦ୍ୱିତୀୟ ପାଳିର ଆଜି ହେଉଛି ଶେଷ ବଜେଟ୍ ଅଧିବେଶନ । ସଂସଦରେ ପହଞ୍ଚିଛନ୍ତି ରାଷ୍ଟ୍ରପତି ଦ୍ରୌପଦି ମୁର୍ମୁ । ତେବେ ବଜେଟ୍‌ ସେସନ ଆରମ୍ଭ ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପ୍ରତିକ୍ରିୟା ରଖିଛନ୍ତି । ବିରୋଧୀଙ୍କ ଉପରେ ବର୍ଷିଲେ ମୋଦି । ଗତ ଅଧିବେଶନରେ ବିରୋଧୀ ଯାହା କଲେ ଦେଶ ଦେଖିଲା । ହଟ୍ଟଗୋଳ କରି ଲୋକଙ୍କ କଥା ଉଠାଇ ଦେଇନଥିଲେ । ବିରୋଧୀଙ୍କୁ ଆତ୍ମଚିନ୍ତନ କରିବାକୁ ପରାମର୍ଶ ଦେଇଛନ୍ତି ପ୍ରଧାନମନ୍ତ୍ରୀ । ସାଧାରଣତନ୍ତ୍ର ଦିବସରେ ନାରୀ ସଶକ୍ତୀକରଣର ଦେଇଛନ୍ତି ଉଦାହରଣ । 

ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଅଭିଭାଷଣରୁ ଆରମ୍ଭ ହେବ ଅଧିବେଶନ । ଫେବ୍ରୁଆରୀ ୧ରେ ଅନ୍ତରୀଣ ବଜେଟ ଉପସ୍ଥାପନ କରିବେ ଅର୍ଥମନ୍ତ୍ରୀ ନିର୍ମଳା ସୀତାରମଣ । ଫେବ୍ରୁଆରୀ ୯ ତାରିଖ ଯାଏ ଚାଲିବ ବଜେଟ ଅଧିବେଶନ । 3ମାସ ପରେ ନିର୍ବାଚନ ହେବାକୁ ଥିବାରୁ ଏହି ବଜେଟ ଉପରେ ରହିଛି ଦେଶବାସୀଙ୍କ ନଜର । 

ବଜେଟ୍ ଅଧିବେଶନ ଆରମ୍ଭ ପୂର୍ବରୁ ଶୀତ ଅଧିବେଶନରେ ନିଲମ୍ବିତ ସାଂସଦଙ୍କ ଉପରୁ ହଟିଛି ନିଲମ୍ବନ । ହଟ୍ଟଗୋଳ ଓ ଅଶୋଭନୀୟ ଆଚରଣ ପାଇଁ ନିଲମ୍ବିତ ହୋଇଥିଲେ ୧୪୬ ଜଣ ସାଂସଦ । ଏବେ ବଜେଟ ଅଧିବେଶନ ପୂର୍ବରୁ ନିଲମ୍ବିତ ସଦସ୍ୟଙ୍କୁ ପୁଣି ଥରେ ଗୃହକାର୍ଯ୍ୟରେ ଅଂଶଗ୍ରହଣ କରିବାକୁ ମିଳିଛି ସୁଯୋଗ ।