ଜୁଲାଇ 23ରୁ 4 ଦିନିଆ ବିଦେଶ ଗସ୍ତରେ ଯିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଏହି ଗସ୍ତ ଅବସରରେ ଦ୍ବିପାକ୍ଷିକ ବାଣିଜ୍ୟ ଚୁକ୍ତି ଏବଂ ସମ୍ପର୍କକୁ ସୁଦୃଢ କରିବା ଉପରେ ଧ୍ୟାନ ଦିଆଯିବ। ପ୍ରଧାନମନ୍ତ୍ରୀ ମୋଦିଙ୍କ ଗସ୍ତର ପ୍ରଥମ ପର୍ଯ୍ୟାୟ ୨୩-୨୪ ଜୁଲାଇରେ ବ୍ରିଟେନ ହେବ। ସେଠାରେ ସେ ଐତିହାସିକ ଭାରତ-ୟୁକେ ମୁକ୍ତ ବାଣିଜ୍ୟ ଚୁକ୍ତିନାମା (FTA) ସ୍ୱାକ୍ଷର କରିବେ। ଏହି ଚୁକ୍ତିନାମା ଶୁଳ୍କ ହ୍ରାସ କରି ବ୍ରିଟେନକୁ ଭାରତୀୟ ରପ୍ତାନିର ୯୯ ପ୍ରତିଶତକୁ ପ୍ରଭାବିତ କରିବ। ଏହା ଭାରତକୁ ମଧ୍ୟ ଲାଭ ଦେବ ଏବଂ ହ୍ୱିସ୍କି ଏବଂ କାର ପରି ବ୍ରିଟିଶ ରପ୍ତାନିକୁ ମଧ୍ୟ ସୁବିଧା ଦେବ। ଏହା ସହିତ ଆର୍ଥିକ, ଟେକ୍ନୋଲୋଜି, ପ୍ରତିରକ୍ଷା, ସୁରକ୍ଷା, ପରିବବେଶ, ସ୍ବାସ୍ଥ୍ୟ, ଶିକ୍ଷା ଉପରେ ଗୁରୁତ୍ବପୂର୍ଣ୍ଣ ଆଲୋଚନା ହେବ।

ପ୍ରଧାନମନ୍ତ୍ରୀ ମୋଦି ଜୁଲାଇ ୨୫-୨୬ରେ ମାଳଦ୍ୱୀପ ଗସ୍ତ କରିବେ। ସେଠାରେ ସେ ୬୦ତମ ଜାତୀୟ ଦିବସ ସମାରୋହରେ ମୁଖ୍ୟ ଅତିଥି ହେବେ। ମହମ୍ମଦ ମୁଇଜୁ ସରକାରଙ୍କ କାର୍ଯ୍ୟକାଳରେ ମଧ୍ୟ ଏହି ଗସ୍ତ ଗୁରୁତ୍ୱପୂର୍ଣ୍ଣ। ଦୁଇ ଦେଶ ଭିତରେ ବିଭିନ୍ନ ମସସ୍ୟାର ସମାଧାନ କରିବା, ପାରସ୍ପରିକ ସହଯୋଗକୁ ପ୍ରୋତ୍ସାହିତ କରିବା ଏବଂ ଭାରତ ମହାସାଗର କ୍ଷେତ୍ରରେ ଭାରତର ‘ପଡ଼ୋଶୀ ପ୍ରଥମ’ ନୀତିକୁ ପୁନଃନିର୍ଦ୍ଦିଷ୍ଟ କରିବା ପାଇଁ ଏକ ଗୁରୁତ୍ୱପୂର୍ଣ୍ଣ ସୁଯୋଗ ଭାବରେ ଦେଖାଯାଉଛି। ପ୍ରଧାନମନ୍ତ୍ରୀ ମୋଦିଙ୍କ ଶେଷ ମାଳଦ୍ୱୀପ ଗସ୍ତ ଜୁନ୍ ୨୦୧୯ରେ ହୋଇଥିଲା।

ପ୍ରଧାନମନ୍ତ୍ରୀ କେରୀ ଷ୍ଟାମରଙ୍କ ନିମନ୍ତ୍ରଣ ପରେ ପ୍ରଧାନମନ୍ତ୍ରୀ ମୋଦି ଚତୁର୍ଥ ଥର ଲାଗି ବ୍ରିଟେନ ଗସ୍ତ କରିବେ। ସେପଟେ ମାଳଦ୍ବୀପ ଗସ୍ତ ଅବସରରେ ଆଞ୍ଚଳିକ ସ୍ଥିରତା ଏବଂ ଭାରତର ରଣନୈତିକ ସ୍ୱାର୍ଥ ଏବଂ ଏକ ଅଧିକ ଦୃଢ଼ ସହଭାଗୀତା ପ୍ରତିଷ୍ଠା ଉପରେ ଧ୍ୟାନ ଦିଆଯିବ।