ଲକ୍ଷ୍ନୌ: ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କ ପାଇଁ ବଢ଼ିପାରେ ଅଡ଼ୁଆ । ଶିଖ ସମୁଦାୟ ଦୁର୍ଦ୍ଦଶା ସମ୍ବନ୍ଧରେ ରାହୁଲ ଗାନ୍ଧୀ ଦେଇଥିବା ଟିପ୍ପଣୀ ଉପରେ ବାରାଣସୀର ଏକ ଅଦାଲତ ଦେଇଥିବା ଆଦେଶକୁ ଆହ୍ଲାବାଦ ହାଇକୋର୍ଟରେ ଚ୍ୟାଲେଞ୍ଜ କରିଥିଲେ ରାହୁଲ ଗାନ୍ଧୀ । ବୁଧବାର ଆହ୍ଲାବାଦ ହାଇକୋର୍ଟ ଆବେଦନ ଉପରେ ରାୟକୁ ସଂରକ୍ଷିତ ରଖିଛନ୍ତି ।

ବାରାଣସୀର ଏକ ଅତିରିକ୍ତ ଜିଲ୍ଲା ଏବଂ ଦୌରାଜଜ ଜୁଲାଇ ୨୨ ତାରିଖରେ ଏକ ମାଜିଷ୍ଟ୍ରେଟ କୋର୍ଟ ରାହୁଲ ଗାନ୍ଧୀଙ୍କ ଟିପ୍ପଣୀ ପାଇଁ ତାଙ୍କ ବିରୋଧରେ ଏଫ୍ଆଇଆର୍ (FIR) କରିବା ଆବେଦନ ଉପରେ ପୁଣି ଥରେ ଶୁଣାଣି କରିବା ଲାଗି ନିର୍ଦ୍ଦେଶ ଦେଇଥିଲେ । ଏହାପରେ ରାହୁଲ ଗାନ୍ଧୀ ହାଇକୋର୍ଟଙ୍କ ଦ୍ଵାରସ୍ଥ ହୋଇଥିଲେ ।

ହାଇକୋର୍ଟର ବିଚାରପତି ସମୀର ଜୈନ ବୁଧବାର ମାମଲାର ଶୁଣାଣି କରି ରାୟ ସଂରକ୍ଷିତ ରଖିଛନ୍ତି । ନିମ୍ନ ଅଦାଲତ ରାହୁଲ ଗାନ୍ଧୀଙ୍କ ବିରୋଧରେ ଜଣେ ବ୍ୟକ୍ତିଙ୍କ ଆବେଦନ ଉପରେ ଶୁଣାଣି କରି ନିର୍ଦ୍ଦେଶନାମା ଜାରି କରିଥିଲେ । ମାଜିଷ୍ଟ୍ରେଟଙ୍କୁ ନିର୍ଦ୍ଦେଶ ଦେଇ ସର୍ବୋଚ୍ଚ ନ୍ୟାୟାଳୟର ଉଦାହରଣ ଦେଇଥିଲେ । କହିଥିଲେ, ମାମଲାକୁ ନୂଆ ଦିଗରୁ ବିଚାର କରି ପୁଣି ନୂଆ ନିର୍ଦ୍ଦେଶ ଦିଅନ୍ତୁ ।

୨୦୨୪ରେ ରାହୁଲ ଗାନ୍ଧୀଙ୍କ ବିରୋଧରେ ହୋଇଥିବା ଆବେଦନରେ ଅଭିଯୋଗ ଅନୁସାରେ, ଆମେରିକା ଯାତ୍ରା ବେଳେ ରାହୁଲ ଗାନ୍ଧୀ ଏକ ଆପତ୍ତିଜନକ ମନ୍ତବ୍ୟ ଦେଇଥିଲେ । ଯେଉଁଥିରେ, ରାହୁଲ ଦାବି କହିଥିଲେ ଯେ ଭାରତରେ ଶିଖ ସେମାନଙ୍କୁ ଅସୁରକ୍ଷିତ ମଣୁଛନ୍ତି । ଆବେଦନରେ କୁହାଯାଇଥିଲା, ରାହୁଲଙ୍କ ଏହି ମନ୍ତବ୍ୟ ଉସୁକାଇବା ଭଳି । ଯାହାର ଉଦ୍ଦେଶ୍ୟ ରାହୁଲ ଗାନ୍ଧୀଙ୍କ ରାଜନୈତିକ ଲାଭ ।

ଆବେଦନରେ ଆହୁରି ଦର୍ଶାଯାଇଥିଲା, ୨୦୧୮ ଡିସେମ୍ବର ୧୪ରେ ଦିଲ୍ଲୀର ରାମଲୀଳା ମୈଦାନରେ ଆୟୋଜିକ ଏକ ରାଲିରେ ରାହୁଲ ଗାନ୍ଧୀ ଏଭଳି ପ୍ରଚାର କରିଥିଲେ । ଯାହାର ପରିଣାମ ସ୍ଵରୂପ ଦିଲ୍ଲୀର ଶାହିନ ବାଗରେ ବଡ଼ ଧରଣର ବିରୋଧ ପ୍ରଦର୍ଶନ ହୋଇଥିଲା । ଆଉ ହିଂସା ଓ ଅରାଜକତା ବ୍ୟାପିଥିଲା ।

ପ୍ରଥମେ କୋର୍ଟ ଆବେଦନକୁ ଖାରଜ କରି କହିଥିଲେ, ଭାରତୀୟ ନ୍ୟାୟ ସଂହିତା ଧାରା ୨୦୮ ଅନୁସାରେ, ଭାରତ ବାହାରେ ହୋଇଥିବା କୌଣସି ଅପରାଧ କେନ୍ଦ୍ର ସରକାରଙ୍କ ପୂର୍ବ ଅନୁମତି ବିନା ଭାରତରେ ଯାଞ୍ଚ କିମ୍ବା ଶୁଣାଣି ହୋଇପାରିବ ନାହିଁ । ଫଳରେ ଉଚ୍ଚ ନ୍ୟାୟାଳୟରେ ଏହି ରାୟକୁ ଚ୍ୟାଲେଞ୍ଜ ପରେ ମାମଲାର ଶୁଣାଣି ପାଇଁ ଅନୁମତି ମିଳିଥିଲା । ଏହାପରେ ରାହୁଲ ଗାନ୍ଧୀ ହାଇକୋର୍ଟଙ୍କ ଦ୍ଵାରସ୍ଥ ହୋଇଛନ୍ତି ।