ରେଳ ବଜେଟରେ ପୁଣି ଅର୍ଥ ଅଜାଡି ଦେଲେ କେନ୍ଦ୍ର ସରକାର । ଏଥର ଓଡ଼ିଶାକୁ ମିଳିବ ୧୦,୯୨୮ କୋଟି । ଇଷ୍ଟ-ୱେଷ୍ଟ ଫ୍ରେଟ୍ କରିଡରରେ ଯୋଡି ହେବ ଓଡ଼ିଶା । ୨୦୨୬ ଶେଷ ସୁଦ୍ଧା ସରିବ ଖୋର୍ଦ୍ଧା-ବଲାଙ୍ଗୀର ରେଳ ପ୍ରକଳ୍ପ କାମ । ଏପଟେ ରେଳ ବଜେଟର ଖର୍ଚ୍ଚକୁ ନେଇ ପ୍ରଶ୍ନ ଉଠାଇଲେ ବିରୋଧୀ ।

ସୂଚନାନୁଯାୟୀ ପୁଣି ବଢିଲା ରେଳ ଅନୁଦାନ । ଗତବର୍ଷ ମିଳିଥିଲା ୧୦,୫୯୯ କୋଟି । ଏଥର ମିଳିଛି ୧୦ ହଜାର ୯୨୮ କୋଟି । ରାଜ୍ୟରେ ଚାଲିଛି ୯୦ ହଜାର ୬୫୯ କୋଟିର ରେଳ ପ୍ରକଳ୍ପ । ଖୁବ ଶୀଘ୍ର ପ୍ରତିଶୃତି ଅନୁସାରେ ୧ ଲକ୍ଷ କୋଟି ପ୍ରକଳ୍ପ ଟାର୍ଗେଟ ପୂରଣ ହେବ । ଇଷ୍ଟ-ୱେଷ୍ଟ ଫ୍ରେଟ କରିଡରରେ ଯୋଡି ହେବ ଓଡିଶା । ଏହା ପଶ୍ଚିମବଙ୍ଗର ଦାନ୍ତକୁଣିରୁ ଓଡିଶା - ଛତିଶଗଡ - ମଧ୍ୟପ୍ରଦେଶ - ମହାରାଷ୍ଟ୍ର -ସହ ଗୁଜରାଟର ସୁରଟକୁ ସଂଯୋଗ କରିବ । ରାଜ୍ୟରେ ଚାଲିଛି ୬ ବନ୍ଦେ ଭାରତ ଓ ୬ ଅମୃତ ଭାରତ ଟ୍ରେନ । ଗତ ୧୧ ବର୍ଷରେ ରାଜ୍ୟରେ ତିଆରି ହୋଇଛି ୨୨୦୦ କିମି ଯାହା ମାଲେସିଆ ଭଳି ଦେଶର ମୋଟ ରେଳ ଟ୍ରାକ ଠାରୁ ଅଧିକ ।

ସେପଟେ ଟ୍ରେନ ଧକ୍କାରେ ହାତୀ ମୃତ୍ୟୁ ରୋକିବାକୁ ରେଳ ବିଭାଗର ବଡ଼ ପଦକ୍ଷେପ । ସମ୍ବେଦନଶୀଳ ସ୍ଥାନରେ ଲାଗିବ ଅପ୍ଟିକାଲ ଫାଇବର । ୬ ମାସ ମଧ୍ୟରେ AI ବେସ ଥର୍ମାଲ କ୍ୟାମେରା ଲଗେଇବାକୁ ଯୋଜନା କରାଯାଉଛି । ସାରା ଦେଶ ରେ ୨୦୦ ଜାଗାରେ ତିଆରି ହେବ ଅଣ୍ଡର ପାସ । ଗତବର୍ଷ ଇଷ୍ଟ କୋଷ୍ଟ ରେଳବାଇକୁ ମିଳିଥିବା ଅର୍ଥରୁ ୮୮ ପ୍ରତିଶତ ଖର୍ଚ୍ଚ ହୋଇ ସାରିଛି । ଓଡିଶା ଖର୍ଚ୍ଚ କରି ସାରିଛି ୯୧ପ୍ରତିଶତ । ୨୦୨୬ ଶେଷ ସୁଦ୍ଧା ସରିବ ଖୋର୍ଦ୍ଧା-ବଲାଙ୍ଗୀର ରେଳ ପ୍ରକଳ୍ପ କାମ । ୭ଟି ଟନେଲ କାମ ଏବେ ଶେଷ ପର୍ଯ୍ୟାୟରେ, ତାଳଚେର, ବରପାଲି ଓ ପାରଳାଖେମୁଣ୍ଡିର ଅମୃତ ଷ୍ଟେସନ କାମ ସରିଥିବା ବେଳେ ୨୦୨୬ ଡିସେମ୍ବର ସୁଦ୍ଦା ବାକି କାମ ସରିବ ।

ଏପଟେ କିନ୍ତୁ ରେଳ ଅନୁଦାନକୁ ନେଇ ଆପତ୍ତି ଉଠାଇଛନ୍ତି ବିରୋଧୀ । ୨୦୦୯ରୁ ୧୪ ଭିତରେ ବର୍ଷକୁ ଆସୁଥିଲା ହାରାହାରି ୧୧୭୧ କୋଟି । ଏଥର ମିଳିଛି ୧୩ଗୁଣ ଅଧିକ । ୨୦୧୪ ପରଠାରୁ ତିଆରି ହୋଇଛି ୨୨ ଶହ କିଲୋମିଟର ରେଳ ଟ୍ରାକ ।