ଆଜିଠୁ ଲାଗୁ ହୋଇଛି ନୂତନ ବର୍ଦ୍ଧିତ ରେଳ ଭଡ଼ା । ଏଣିକି ୨୧୫ କିଲୋମିଟରରୁ ଅଧିକ ଯାତ୍ରା ପାଇଁ ସାଧାରଣ ଶ୍ରେଣୀ ଟିକେଟ ଲାଗି ପ୍ରତି କିଲୋମିଟରରେ ପିଛା ଏକ ପଇସା ଅଧିକ ଦେବାକୁ ପଡ଼ିବ । ସମସ୍ତ ଟ୍ରେନର ଏସି, ନନ୍-ଏସି ମେଲ୍ / ଏକ୍ସପ୍ରେସ୍ ଏବଂ ଏୟାରକଣ୍ଡିସନ୍ ଶ୍ରେଣୀ ପାଇଁ ପ୍ରତି କିଲୋମିଟରରେ ଦୁଇ ପଇସା ବୃଦ୍ଧି କରାଯାଇଛି ।

ଚଳିତ ବର୍ଷ ଦ୍ୱିତୀୟ ଥର ପାଇଁ ବୃଦ୍ଧି ହୋଇଛି ରେଳ ଭଡ଼ା । ରେଳବାଇର ବର୍ଦ୍ଧିତ ପରିଚାଳନା ଖର୍ଚ୍ଚ, ମାନବ ସମ୍ବଳ ଖର୍ଚ୍ଚ ଏବଂ ପେନସନ ଖର୍ଚ୍ଚ ଲାଗି ରେଳଭଡ଼ା ବୃଦ୍ଧି କରାଯାଇଥିବା ସୂଚନା ଦିଆଯାଇଛି । ତେବେ ୨୧୬ କିଲୋମିଟରରୁ ଅଧିକ ଯାତ୍ରା ପାଇଁ ଏହି ଭଡ଼ା ବଢ଼ିଛି ।
ବଢ଼ିଲା ରେଳ ଭଡ଼ା

୨୧୫ କିମି ପର୍ଯ୍ୟନ୍ତ ସାଧାରଣ ଶ୍ରେଣୀରେ କୌଣସି ବୃଦ୍ଧି ନାହିଁ , ୨୧୬ରୁ ୭୫୦ କିଲୋମିଟର ପର୍ଯ୍ୟନ୍ତ ୫ ଟଙ୍କା ବୃଦ୍ଧି, ୭୫୧ରୁ ୧୨୫୦ କିଲୋମିଟର ପର୍ଯ୍ୟନ୍ତ ୧୦ ଟଙ୍କା ବୃଦ୍ଧି, ୧୨୫୧ରୁ ୧୭୫୦ କିଲୋମିଟର ପର୍ଯ୍ୟନ୍ତ ୧୫ ଟଙ୍କା ବୃଦ୍ଧି, ୧୭୫୧ରୁ ୨୨୫୦ କିଲୋମିଟର ପର୍ଯ୍ୟନ୍ତ ୨୦ ଟଙ୍କା ବୃଦ୍ଧି, ମେଲ୍/ଏକ୍ସପ୍ରେସ୍ ନନ୍-ଏସି ଓ ଏସିରେ ୨ ପଇସା କିମି ପ୍ରତି, ୫୦୦ କିମି. ନନ୍-ଏସିରେ ଯାତ୍ରା କଲେ ୧୦ ଟଙ୍କା ଅଧିକ ଦେବାକୁ ପଡ଼ିବ, ରେଳବାଇ ଅତିରିକ୍ତ ରାଜସ୍ୱ ୬୦୦ କୋଟି ଟଙ୍କା ପାଇବ, ସବ-ଅର୍ବାନ ଓ ସିଜନ ଟିକଟରେ କୌଣସି ପରିବର୍ତ୍ତନ ନାହିଁ ।

ତେଜସ ରାଜଧାନୀ, ରାଜଧାନୀ, ଶତାବ୍ଦୀ, ଦୂରନ୍ତୋ, ବନ୍ଦେ ଭାରତ, ହମସଫର, ଅମୃତ ଭାରତ, ତେଜସ, ମହାମନା, ଗତିମାନ, ଅନ୍ତ୍ୟୋଦୟ, ଗରିବ ରଥ, ଜନ ଶତାବ୍ଦୀ, ଯୁବ ଏକ୍ସପ୍ରେସ, ନମୋ ଭାରତ ରାପିଡ୍ ରେଳ ଏବଂ ସାଧାରଣ ଅଣ-ଉପସହରାଞ୍ଚଳ ସେବା (ଯେଉଁଠି ଆବଶ୍ୟକ, ଏସି ମେମୁ/ମେମୁକୁ ବାଦ ଦେଇ) ସମେତ ପ୍ରମୁଖ ଟ୍ରେନ୍ ସେବାଗୁଡ଼ିକର ବର୍ତ୍ତମାନର ମୂଳ ଭଡ଼ାରେ ସଂଶୋଧନ କରାଯାଇଛି। ଏହାକୁ ଅନୁମୋଦିତ ଶ୍ରେଣୀ-ୱାରି ମୂଳ ଭଡ଼ା ବୃଦ୍ଧି ନିୟମ ଅନୁସାରେ କରାଯାଇଛି । ପ୍ରଯୁଜ୍ୟ ଶ୍ରେଣୀଗୁଡ଼ିକରେ ସମାନ ଭାବରେ ଏବଂ ଏକ କ୍ରମାନୁସାରେ ଏହି ସଂଶୋଧନ କରାଯାଇଛି ।

ସଂରକ୍ଷିତ ଶୁଳ୍କ, ସୁପରଫାଷ୍ଟ ସରଚାର୍ଜ କିମ୍ବା ଅନ୍ୟାନ୍ୟ ଆନୁସଙ୍ଗିକ ଶୁଳ୍କରେ କୌଣସି ପରିବର୍ତ୍ତନ କରାଯାଇ ନାହିଁ । ଏଗୁଡ଼ିକ ପ୍ରଚଳିତ ନିୟମ ଅନୁଯାୟୀ ଆଦାୟ କରାଯିବ । ଜିଏସଟିର ପ୍ରୟୋଗ ମଧ୍ୟ ଅପରିବର୍ତ୍ତିତ ରହିଛି ଏବଂ ପ୍ରଚଳିତ ମାନଦଣ୍ଡ ଅନୁଯାୟୀ ମୋଟ୍‌ ଭଡ଼ା ନିର୍ଦ୍ଧାରଣ କରାଯିବ।

ସଂଶୋଧିତ ଭଡ଼ା କେବଳ ୨୬ ଡିସେମ୍ବର ୨୦୨୫ କିମ୍ବା ତା’ପରେ ବୁକ୍ ହୋଇଥିବା ଟିକେଟ୍ ଉପରେ ଲାଗୁ ହେବ । ନୂଆ ଦର ଲାଗୁ ହେବା ତାରିଖ ପରେ ଯାତ୍ରା କଲେ ମଧ୍ୟ ପୂର୍ବରୁ ବୁକ୍ ହୋଇଥିବା ଟିକେଟ୍ ପାଇଁ କୌଣସି ଅତିରିକ୍ତ ଶୁଳ୍କ ଲାଗୁ ହେବ ନାହିଁ । ଷ୍ଟେସନଗୁଡ଼ିକରେ ଦେଖାଯାଉଥିବା ଭଡ଼ା ତାଲିକାକୁ ସଂଶୋଧିତ କରାଯାଇ ୨୬ ଡିସେମ୍ବର ୨୦୨୫ରୁ ଲାଗୁ ହୋଇଥିବା ନୂଆ ଦର ପ୍ରଦର୍ଶନ କରାଯିବ।