ଦୂର ଯାତ୍ରା ପାଇଁ ପ୍ରାୟ ସମସ୍ତେ ଟ୍ରେନ୍‌କୁ ପସନ୍ଦ କରନ୍ତି । ଆଉ ଅନେକ ଥର ଦୀର୍ଘ ଯାତ୍ରା ସମୟରେ ଟ୍ରେନ୍‌ରେ ଟଙ୍କାର ଅଭାବ ପଡ଼େ । କେଉଁଠୁ, କେମିତି ଟଙ୍କା ଉଠାଇବେ ସେ ନେଇ ଚିନ୍ତା ବଢ଼ିଯାଏ । ସେହିଭଳି ଦୂର ଯାତ୍ରା ବେଳେ ଟଙ୍କା ଚୋରି ଡରରେ ଅନେକ ଅଧିକ କ୍ୟାସ୍ ସାଙ୍ଗରେ ନିଅନ୍ତି ନାହିଁ । ଏଥିପାଇଁ ରେଲୱେ ପକ୍ଷରୁ ନୂଆ ପଦକ୍ଷେପ ନିଆଯାଇଛି । ଏଣିକି ଟ୍ରେନ୍ ଯାତ୍ରା ବେଳେ ଯାତ୍ରୀ ଆଉ ନଗଦ ଚିନ୍ତାରେ ରହିବେ ନାହିଁ । କାରଣ ଆପଣ ଟ୍ରେନ୍ ଯାତ୍ରା ବେଳେ ଟଙ୍କା ବାହାର କରି ପାରିବେ ।

ଆପଣଙ୍କୁ ଆଶ୍ଚର୍ଯ୍ୟ ଲାଗୁଥିଲେ ବି ଏହା ସତ । ଏହାକୁ ବାସ୍ତବରେ ପରିଣତ କରି ଦେଖାଇଛି ଭାରତୀୟ ରେଳବାଇ । ଟ୍ରେନ୍‌ରେ ଯାତ୍ରା କରୁଥିବା ଯାତ୍ରୀଙ୍କୁ ଦୃଷ୍ଟିରେ ରଖି ଆରମ୍ଭ ହୋଇଛି ଟ୍ରେନ୍ ଏଟିଏମ୍ । ଏଣିକି ଆପଣ ଚଳନ୍ତା ଟ୍ରେନ୍‌ରେ ମଧ୍ୟ ଟଙ୍କା ଉଠାଣ କରି ପାରିବେ । ଏବେ ଏହି ସେବା ଟ୍ରାଏଲ୍ ମୋଡରେ ରହିଛି । ନାନ୍ଦେଡ଼ରୁ ଛତ୍ରପତି ଶିବାଜୀ ମହାରାଜ ଟର୍ମିନସ ମଧ୍ୟରେ ଚାଲୁଥିବା ପଞ୍ଚବଟି ଏକ୍ସପ୍ରେସ୍‌ରେ ଏଟିଏମ୍ ମେସିନ୍ ଲାଗିଛି ।

ଏହାଦ୍ଵାରା ଯାତ୍ରୀ ଉପକୃତ ହେବେ । ନଗଦ ଅଭାବ ମଧ୍ୟ ଦୂର ହୋଇ ପାରିବ । ଅନଲାଇନ୍ ପେମେଣ୍ଟ ନ ହୋଇ ପାରିବାକୁ ନେଇ ଚିନ୍ତିତ ରହୁଥିବା ଯାତ୍ରୀ ଟଙ୍କା ଉଠାଇ ପାରିବେ । ଏବେ ଟ୍ରେନ୍ ଏଟିଏମର ଟ୍ରାଏଲ୍ ଆରମ୍ଭ ହୋଇଥିବା ବେଳେ ଏଟିଏମ୍ କିଭଳି କାମ କରୁଛି ତାର ଅନୁଧ୍ୟାନ କରାଯାଉଛି । ନେଟୱର୍କ କନେକ୍ଟିଭିଟି, ସିକ୍ୟୁରିଟି, ଗୋପନୀୟତ ଓ ଯାତ୍ରୀଙ୍କ ସୁବିଧାକୁ ଧ୍ୟାନ ଦିଆ ଯାଉଛି । ଟ୍ରାଏଲ୍ ସଫଳ ରହିଲେ ଆଗକୁ ଅନ୍ୟ ଟ୍ରେନ୍‌ରେ ଏଟିଏମ୍ ଲଗାଇବାକୁ ଯୋଜନା କରୁଛି ରେଳବାଇ ।

Argus News | argus news | Odisha Latest News, Breaking News, Trending News, Live TV