ଆତଙ୍କବାଦୀ ହମଲାକୁ ନେଇ କୁମ୍ଭୀର କାନ୍ଦଣା କାନ୍ଦୁଥିବା ଆତଙ୍କୀ ସମର୍ଥକଙ୍କ ଦୋମୁହାଁ ନୀତିର ପର୍ଦ୍ଦାଫାସ । ସାଂଘାଇ ସହଯୋଗ ସଙ୍ଗଠନର ମିଳିତ ଘୋଷଣା ପତ୍ରରେ ସ୍ବାକ୍ଷର ନକରି ଭାରତର ଆଭିମୁଖ୍ୟ ସ୍ପଷ୍ଟ କରିଛନ୍ତି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ । ଚୀନ୍‌ର କିଙ୍ଗଦାଓରେ ଆୟୋଜିତ ସାଂଘାଇ ସହଯୋଗ ସଙ୍ଗଠନର ବାର୍ଷିକ ସମ୍ମିଳନୀର ଶେଷ ଦିନରେ ପ୍ରତିରକ୍ଷା ମନ୍ତ୍ରୀସ୍ତରୀୟ ବୈଠକରେ ସାମିଲ ହୋଇ ସୀମାପାର୍ ଓ ପ୍ରାୟୋଜିତ ଆତଙ୍କବାଦ ବିରୋଧରେ ବଡ଼ କୁଟନୈତିକ ଗୋଟି ଚଳାଇଛନ୍ତି ରାଜନାଥ । ମିଳିତ ବିବୃତ୍ତିରେ ପହଲଗାମର ବର୍ବର ଆତଙ୍କୀ ଘଟଣା ସ୍ଥାନ ପାଇନଥିବାରୁ ତୀବ୍ର ଅସନ୍ତୋଷ ବ୍ୟକ୍ତ କରିଛନ୍ତି ରାଜନାଥ । ଘୋଷଣା ପତ୍ରରେ ସ୍ବାକ୍ଷର ନକରି ଜତାଇଛନ୍ତି ବିରୋଧ।

ଶାନ୍ତି ମାର୍ଗରେ ଏପରି ଦୋମୁହାଁ ନୀତିର କୌଣସି ସ୍ଥାନ ନାହିଁ । ଏବେ ବି କିଛି ଦେଶ ଆତଙ୍କବାଦ ପ୍ରସଙ୍ଗରେ ଆଲୋଚନା କରିବାକୁ ପଛଘୁଞ୍ଚା ଦେଉଥିବା କହି SCO ଆୟୋଜକ ଚୀନ ସହ ପାକିସ୍ତାନକୁ କଡ଼ା ସନ୍ଦେଶ ଦେଇଛନ୍ତି ପ୍ରତିରକ୍ଷା ମନ୍ତ୍ରୀ । ଆତଙ୍କବାଦର ବିନାଶ ନାରା ଦେଇ ନିଚ୍ଚ ସ୍ବାର୍ଥ ପୂରଣ ପାଇଁ ଏବେବି କିଛି ଦେଶ ଆତଙ୍କବାଦକୁ ସାଧନ କରୁଛନ୍ତି । ପ୍ରାୟୋଜିତ ଆତଙ୍କବାଦର କଡ଼ା ପରିଣାମ ଭୋଗିବାକୁ ପଡ଼ିବ କହି SCO ମଞ୍ଚରୁ ଭାରତର ଆତଙ୍କବାଦୀ ବିରୋଧୀ ଆଭିମୁଖ୍ୟ ସ୍ପଷ୍ଟ କରିଛନ୍ତି ପ୍ରତିରକ୍ଷା ମନ୍ତ୍ରୀ ।

SCO ମିଳିତ ବୈଠକ ପରେ ବେଲାରୁଷ ପ୍ରତିରକ୍ଷା ମନ୍ତ୍ରୀ ଭିକ୍ଟୋର ଖରେନିନ ଓ ଋଷ ଡିଫେନ୍ସ ମିନିଷ୍ଟର ଆଣ୍ଡ୍ରେ ବେଲୁସଭଙ୍କ ସହ ଦ୍ବିପାକ୍ଷିକ ଆଲୋଚନା କରିଛନ୍ତି ରାଜନାଥ ସିଂହ । ଭାରତ-ଋଷ ମଧ୍ୟରେ ସାମରିକ ସହଭାଗିତାକୁ ନେଇ ଆଲୋଚନା ହୋଇଥିବା କହିଛନ୍ତି ଋଷ୍ ପ୍ରତିରକ୍ଷା ମନ୍ତ୍ରୀ ।

ଆତଙ୍କୀ ପ୍ରୋତ୍ସାହନକାରୀଙ୍କୁ ଅପରେସନ ସିନ୍ଦୁରରେ ଭାରତ ଦୃଢ ଜବାବ ଦେଇଛି ବୋଲି 3 ଦିନ ପୂର୍ବରୁ NSA ସ୍ତରୀୟ ଆଲୋଚନାରେ କହିଥିଲେ ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ । ଦୁଇଦିନିଆ SCO ବୈଠକର ଶେଷ ଦିନରେ ପ୍ରତିରକ୍ଷା ମନ୍ତ୍ରୀସ୍ତରୀୟ ବୈଠକରେ ଭାରତ ସହ ଚୀନ୍, ରୁଷ ଏବଂ ଅନ୍ୟ ମଧ୍ୟ-ଏସୀୟ ଦେଶର ପ୍ରତିରକ୍ଷା ମନ୍ତ୍ରୀ ସାମିଲ ହୋଇଥିଲେ ।