କୃଷକଙ୍କୁ ରାତାରାତି ମାଲାମାଲ କରି ଦେଲା ଗୋଟିଏ ଗଛ

କେତେବେଳେ କେମିତି କେଉଁଠି କାହା ଭାଗ୍ୟ ବଦଳି ଯିବ, କେହି ଜାଣି ନାହାନ୍ତି । ଏଇ ଯେମିତି ଗୋଟିଏ ଗଛ ବଦଳାଇ ଦେଇଛି ଜଣେ କୃଷକଙ୍କ ଭାଗ୍ୟ ଡୋରୀ । ରାତାରାତି ଜଣେ କୃଷକ କୋଟିପତି ହୋଇ ପାରିଛନ୍ତି ଗଛଟିଏ ପାଇଁ । ବିଶ୍ଵାସ ନ ହେଲେ ବି ଏମିତି କିଛି ହୋଇଛି ମହାରାଷ୍ଟ୍ରର ୟବତମାଳ ଜିଲ୍ଲାରେ । ବିଶାଳ ବୃକ୍ଷ ଯୋଗୁଁ ଲଟେରି ଲାଗି ଯାଇଛି ।

ପୁସଦ ତହସିଲ ଖୁର୍ସି ଗାଁର କୃଷକ ପୁଶତୈନି ସିନ୍ଦେଙ୍କ ଭାଗ୍ୟ ବଦଳାଇ ଦେଇଛି ୭ ଏକର ଜମିରେ ଥିବା ଗୋଟିଏ ରକ୍ତ ଚନ୍ଦନ ଗଛ । ୨୦୧୩-୧୪ ପର୍ଯ୍ୟନ୍ତ ସିନ୍ଦେଙ୍କ ପରିବାରକୁ ଜଣା ନଥିଲା ତାଙ୍କ ଜମିରେ ଥିବା ଗଛ ରକ୍ତ ଚନ୍ଦନ ପ୍ରଜାତିର । ସେହି ସମୟରେ ରେଲୱେର ଏକ ସର୍ଭେ ହୋଇଥିଲା, କର୍ଣ୍ଣାଟକରୁ ଆସିଥିବା ରେଲୱେ ଅଧିକାରୀ ରେଳ ମାର୍ଗ ନିରୀକ୍ଷଣ କରିବା ବେଳେ କହିଥିଲେ ଏହା ରକ୍ତ ଚନ୍ଦନ ଗଛ । ଆଉ ଏହାର ବଜାର ମୂଲ୍ୟ ବେଶ ଅଧିକ ।

ଏହା ପରେ ରେଲୱେ ସିନ୍ଦେଙ୍କ ଜମିକୁ ଅଧିଗ୍ରହଣ ତ କଲା କିନ୍ତୁ ଗଛର ମୂଲ୍ୟାୟନ ସମସ୍ତଙ୍କୁ ଚକିତ କରି ଦେଲା । ସିନ୍ଦେ ପରିବାର ବ୍ୟକ୍ତିଗତ ଭାବେ ଗଛର ମୂଲ୍ୟାୟନ କଲେ । ଯାହାର ବଜାର ମୂଲ୍ୟ ୪ କୋଟି ୯୭ ଲକ୍ଷ ଟଙ୍କା । ତେବେ ରେଲୱେ ଏହି ରାଶିକୁ ସ୍ଵୀକାର କରି ନଥିଲା । ଏହା ପରେ ସିନ୍ଦେଙ୍କ ପରିବାର ଅଦାଲତଙ୍କ ଦ୍ଵାରସ୍ଥ ହୋଇଥିଲେ ।

ମାମଲା ମୁମ୍ବାଇ ହାଇକୋର୍ଟଙ୍କ ନାଗପୁର ବେଞ୍ଚରେ ପହଞ୍ଚିଲା । କୋର୍ଟ ମଧ୍ୟ ରେଲୱେକୁ ଗଛ ପାଇଁ ୧ କୋଟି ଟଙ୍କା ଜମା କରିବାକୁ ନିର୍ଦ୍ଦେଶ ଦେଲେ । ଏହା ପରେ ୫୦ ଲକ୍ଷ ଟଙ୍କା ସିନ୍ଦେ ପରିବାରର ଖାତାରେ ଜମା ପଇଁ ନିର୍ଦ୍ଦେଶ ଦେଇଥିଲେ କୋର୍ଟ । ଏଥିସହ ଗଛର ପୁନଃ ମୂଲ୍ୟାୟନ କରି କ୍ଷତିପୂରଣ ଦେବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି ।