ଅର୍ଗସ ବ୍ୟୁରୋ: ଟିକସ ପରେ ମଧ୍ୟବିତ୍ତଙ୍କୁ ମିଳିପାରେ ଆଉ ଏକ ବଡ଼ ଆଶ୍ଵସ୍ତି । ଶୁକ୍ରବାର ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ ରେପୋ ରେଟ୍‌କୁ ନେଇ ନେଇପାରେ ବଡ଼ ନିଷ୍ପତ୍ତି । ଆଶା କରାଯାଉଛି, ଆରବିଆଇ ରେପୋ ରେଟ୍ ହ୍ରାସ କରିବ । ଏମିତି ହେଲେ ଆପଣଙ୍କ ଲୋନ୍ ଇଏମ୍‌ଆଇ କମିବ । ଏଥିସହ ଫିକ୍ସଡ୍ ଡିପୋଜିଟ୍ ସୁଧ ହାରରେ ପରିବର୍ତ୍ତନ ଆସିବ ।

ଆରବିଆଇର ମନିଟାରୀ ପଲିସି ବୈଠକ ବୁଧବାର ଠାରୁ ଚାଲିଛି । ଏହି ବୈଠକରେ ରେପୋ ରେଟ୍, ଦରବୃଦ୍ଧି ଓ ଜିଡିପିକୁ ନେଇ ଆଲୋଚନା ହେଉଛି । ଆଶା କରାଯାଉଛି, ଭାରତୀୟ ରିଜର୍ଭ ବ୍ୟାଙ୍କ ଏହି ବୈଠକରେ ବଡ଼ ନିଷ୍ପତ୍ତି ମଧ୍ୟରେ ରେପୋ ରେଟ୍ କମାଇବା ନେଇ ଘୋଷଣା କରିପାରେ ।

ଯଦି ଆରବିଆଇ ରେପୋ ରେଟ୍ ହ୍ରାସ କରେ ତ ଏହା ୫ ବର୍ଷ ପରେ କମିବ । ମନିଟାରୀ ପଲିସି ବୈଠକର ନିଷ୍ପତ୍ତି ନେଇ ଆରବିଆଇ ଗଭର୍ଣ୍ଣର ସଞ୍ଜୟ ମାଲହୋତ୍ରା ଦିନ ୧୦ଟାରେ ଘୋଷଣା କରିବେ ।

କେତେ କମିପାରେ ସୁଧହାର ?

ବିଶେଷଜ୍ଞଙ୍କ ଅନୁସାରେ, ମଧ୍ୟବିତ୍ତଙ୍କୁ ଆଶ୍ଵସ୍ତି ଦେବାକୁ ଯାଇ କେନ୍ଦ୍ରୀୟ ବ୍ୟାଙ୍କ ହ୍ରାସ କରିପାରେ ରେପୋ ରେଟ୍ । ରେପୋ ରେଟ୍ ୨୫-୫୦ ବେସିସ୍ ପଏଣ୍ଟ କମିପାରେ । ଦେଶର ଅର୍ଥ ବ୍ୟବସ୍ଥାକୁ ମଜଭୁତ୍ କରିବାକୁ ଯାଇ ଏହି ନିଷ୍ପତ୍ତି ନେଇପାରେ ଆରବିଆଇ । ରେପୋ ରେଟ୍ ଖସିଲେ, ଆପଣ ଦେଉଥିବା ଇଏମ୍‌ଆଇ ମଧ୍ୟ କମିବ ।

ଏହା ପୂର୍ବରୁ ୨୦୨୦ ମେ ମାସରେ ଆରବିଆଇ ରେପୋ ରେଟ୍ କମାଇଥିଲା । ସେବେଠୁ ପ୍ରାୟ ୫ ବର୍ଷ ହେଲାଣି ରେପୋ ରେଟ୍ ହ୍ରାସ ପାଇନି । ସେବେଠୁ ରେପୋ ରେଟ୍ ବଢ଼ି ୨୦୨୩ ଫେବ୍ରୁଆରୀରୁ ୬.୫ ପ୍ରତିଶତରେ ସ୍ଥିର ରହିଛି ।