କୋଲକାତା: ପୁଣି ଥରେ ଚର୍ଚ୍ଚାରେ କୋଲକାତାର ଆର୍‌ଜି କର୍ ମେଡିକାଲ୍ କଲେଜ । ଏହି ହସ୍ପିଟାଲ୍‌ରେ ୨୦୨୪ ଅଗଷ୍ଟ ୯ରେ ଜଣେ ଟ୍ରେନି ଡାକ୍ତରଙ୍କୁ ଦୁଷ୍କର୍ମ ପରେ ବୀଭତ୍ସ ହତ୍ୟା କରାଯାଇଥିଲା । ଯାହାକୁ ନେଇ ଜଳିଥିଲା ପଶ୍ଚିମବଙ୍ଗ । ଆଉ ଏବେ ସେହି ଆର୍‌ଜି କର୍ ମେଡିକାଲ୍‌ କଲେଜର ଜଣେ ଛାତ୍ରୀଙ୍କ ସନ୍ଦେହଜନକ ମୃତ୍ୟୁ ହୋଇଛି ।

ସୂଚନା ଅନୁସାରେ, ମୃତ ଛାତ୍ରୀ ହେଉଛନ୍ତି ୨୪ ବର୍ଷୀୟ ଅନିନ୍ଦିତା ସୋରେନ୍ । ସେ ଆର୍‌ଜି କର ମେଡିକାଲ୍ କଲେଜର ଶେଷ ବର୍ଷର ଛାତ୍ରୀ ଥିଲେ । ଶନିବାର ମାଲଦାର ଏକ ହସ୍ପିଟାଲ୍‌ରେ ତାଙ୍କର ସନ୍ଦେହଜନକ ମୃତ୍ୟୁ ହୋଇଛି । ଅନିନ୍ଦିତାଙ୍କୁ ତାଙ୍କ ପୁରୁଷ ବନ୍ଧୁ ଉଜ୍ଜ୍ଵଳ ସୋରେନ୍ ହତ୍ୟା କରିଥିବା ଅଭିଯୋଗ ହୋଇଛି ।

ମୃତ ଅନିନ୍ଦିତାଙ୍କ ପରିବାର ଲୋକଙ୍କ ଅଭିଯୋଗ ଅନୁସାରେ, ଝିଅକୁ ବିଷ ଦେଇ ମାରି ଦିଆଯାଇଛି । ଆଉ ପୁରୁଷ ବନ୍ଧୁ ଉଜ୍ଜ୍ଵଳ, ଅନିନ୍ଦିତାଙ୍କୁ ବିଷ ଦେଇ ମାରିଥିବା ଅଭିଯୋଗ କରିଛନ୍ତି ପରିବାର ଲୋକେ । ଯାହାକୁ ନେଇ ଆର୍‌ଜି କର୍ ମେଡିକାଲ୍ କଲେଜ ପୁଣି ଥରେ ଚର୍ଚ୍ଚାକୁ ଆସିଛି । ପୋଲିସ ଅନିନ୍ଦିତାଙ୍କ ମୃତଦେହ ବ୍ୟବଚ୍ଛେଦ ପାଇଁ ପଠାଇଛି ।

ସୂଚନା ଅନୁସାରେ, ଦକ୍ଷିଣ ଦିନାଜପୁର ବାଲୁରଘାଟ ଅଞ୍ଚଳର ଅନିନ୍ଦିତା ଓ ଉଜ୍ଜ୍ଵଳଙ୍କ ମଧ୍ୟରେ ସମ୍ପର୍କ ଥିଲା । ଅନିନ୍ଦିତା ବିବାହ ପାଇଁ ଚାପ ପକାଉଥିବା ବେଳେ ମନା କରି ଆସୁଥିଲେ ଉଜ୍ଜ୍ଵଳ । ଯେଉଁଥିପାଇଁ ଦୁହିଁଙ୍କ ଝଗଡ଼ା ହେଉଥିଲା । ଏବେ ଅନିନ୍ଦିତାଙ୍କ ମୃତ୍ୟୁ ପରେ ଉଜ୍ଜ୍ଵଳଙ୍କ ବୟାନ ରେକର୍ଡ ପାଇଁ ପୋଲିସ ତାଙ୍କୁ ଖୋଜୁଛି ।

ପରିବାର ଲୋକଙ୍କ ଅନୁସାରେ, କିଛି ମାସ ତଳେ ଅନିନ୍ଦିତା ଗର୍ଭବତୀ ହୋଇଥିଲେ । ଏହା ପରେ ସେ ବିବାହ ପାଇଁ ଉଜ୍ଜ୍ଵଳଙ୍କ ଉପରେ ଚାପ ପକାଇଥିଲେ । ହେଲେ ବିବାହ ପରିବର୍ତ୍ତେ ଚାପ ପକାଇ ଗର୍ଭ ନଷ୍ଟ କରି ଦେଇଥିଲେ ଉଜ୍ଜ୍ଵଳ । ଆଉ ଏବେ ଅନିନ୍ଦିତାଙ୍କ ମୃତ୍ୟୁ ଅନେକ ସନ୍ଦେହ ସୃଷ୍ଟି କରିଥିବା ବେଳେ ଉଜ୍ଜ୍ଵଳଙ୍କୁ ପୋଲିସ ଖୋଜୁଛି ।