PM Surya Ghar / ବିଜୁଳି ବିଲ୍‌ରୁ ମିଳିବ ମୁକ୍ତି ସରକାର ଦେବେ ୭୮ ହଜାର ସବସିଡି

ଦେଶରେ ବଢ଼ୁଥିବା ବିଦ୍ୟୁତ ବିଲ୍ ମଧ୍ୟରେ ଘରୋଇ ଉପଭୋକ୍ତାଙ୍କ ପାଇଁ କେନ୍ଦ୍ର ସରକାରଙ୍କ ପିଏମ୍ ସୂର୍ଯ୍ୟ ଘର ମଗଣା ବିଜୁଳି ଯୋଜନା ଏକ ବଡ଼ ସହାୟତା ହୋଇଛି । ଏହି ଯୋଜନା ଅଧୀନରେ ଘରର ଛାତ ଉପରେ ସୋଲାର ପ୍ୟାନେଲ୍ ଲଗାଇବା ପାଇଁ ସରକାର ସବସିଡି ପ୍ରଦାନ କରୁଛନ୍ତି । ଏହା ସହିତ ଯୋଗ୍ୟ ଉପଭୋକ୍ତାମାନେ ମାସକୁ ୩୦୦ ୟୁନିଟ୍ ପର୍ଯ୍ୟନ୍ତ ମାଗଣା ବିଦ୍ୟୁତର ସୁବିଧା ପାଇପାରିବେ।

ସରକାରୀ ତଥ୍ୟ ଅନୁସାରେ, ଯୋଜନା ଅଧୀନରେ ଏପର୍ଯ୍ୟନ୍ତ ୫୧ ଲକ୍ଷରୁ ଅଧିକ ଘର ସୋଲାର ଶକ୍ତି ସହ ଯୋଡ଼ି ହୋଇଛନ୍ତି । କେନ୍ଦ୍ର ସରକାରଙ୍କ ଲକ୍ଷ୍ୟ ହେଉଛି ଦେଶର ୧ କୋଟି ଘରକୁ ସୋଲାର ପ୍ୟାନେଲ୍ ମାଧ୍ୟମରେ ଆଲୋକିତ କରିବା ।

୫ କିଲୋୱାଟ୍‌ରେ କେତେ ସବସିଡି ?
ଯୋଜନା ଅନୁସାରେ ୧ କିଲୋୱାଟ୍ ସୋଲାର ସିଷ୍ଟମ୍ ପାଇଁ ୩୦ ହଜାର ଟଙ୍କା ଏବଂ ୨ କିଲୋୱାଟ୍ ପାଇଁ ୬୦ ହଜାର ଟଙ୍କା ପର୍ଯ୍ୟନ୍ତ କେନ୍ଦ୍ରୀୟ ସବସିଡି ମିଳିପାରେ । ୩ କିଲୋୱାଟ୍ କିମ୍ବା ତା’ଠାରୁ ଅଧିକ କ୍ଷମତାର ସୋଲାର ପ୍ୟାନେଲ୍ ପାଇଁ ସର୍ବାଧିକ ୭୮ ହଜାର ଟଙ୍କା ସବସିଡି ନିର୍ଦ୍ଧାରିତ ହୋଇଛି । ତେଣୁ ୫ କିଲୋୱାଟ୍ ସୋଲାର ପ୍ୟାନେଲ୍ ଲଗାଇଲେ ମଧ୍ୟ କେନ୍ଦ୍ରରୁ ସର୍ବାଧିକ ୭୮ ହଜାର ଟଙ୍କା ସବସିଡି ମିଳିବ ।

ଏହା ବ୍ୟତୀତ କିଛି ରାଜ୍ୟ ସରକାର ନିଜସ୍ୱ ଅତିରିକ୍ତ ସବସିଡି ମଧ୍ୟ ଦେଉଛନ୍ତି । ଉଦାହରଣ ସ୍ୱରୂପ, ଉତ୍ତରପ୍ରଦେଶରେ ଯୋଗ୍ୟ ଉପଭୋକ୍ତାଙ୍କୁ ଅତିରିକ୍ତ ୩୦ ହଜାର ଟଙ୍କା ସହାୟତା ମିଳିପାରେ । ଏହାଦ୍ୱାରା ମୋଟ ସହାୟତା ୧.୦୮ ଲକ୍ଷ ଟଙ୍କା ପର୍ଯ୍ୟନ୍ତ ହୋଇପାରେ ।

କିପରି କରିବେ ଆବେଦନ ?
ଯୋଜନା ପାଇଁ ଅନଲାଇନ୍‌ରେ ଆବେଦନ କରିହେବ । ପୋର୍ଟାଲରେ ଯାଇ ‘Apply for Rooftop Solar’ ବିକଳ୍ପ ଚୟନ କରି ରାଜ୍ୟ, ବିଦ୍ୟୁତ ବିତରଣ କମ୍ପାନୀ, ଉପଭୋକ୍ତା ନମ୍ବର, ମୋବାଇଲ୍ ନମ୍ବର ଓ ଇ-ମେଲ୍ ଦେବାକୁ ପଡ଼ିବ । ଫିଜିବିଲିଟି ଅନୁମୋଦନ ପରେ ଡିସ୍କମ୍‌ରେ ପଞ୍ଜୀକୃତ ବିକ୍ରେତାଙ୍କ ମାଧ୍ୟମରେ ସୋଲାର ପ୍ୟାନେଲ୍ ଲଗାଇପାରିବେ । ପରେ ନେଟ୍ ମିଟର ଲଗାଇବା ଓ ଯାଞ୍ଚ ପ୍ରକ୍ରିୟା ଶେଷ ହେଲେ ଆବଶ୍ୟକ ବ୍ୟାଙ୍କ ବିବରଣୀ ଦେଇ ସବସିଡି ପାଇପାରିବେ ।