ଏକ ଆଶ୍ଚର୍ଯ୍ୟ ତଥା ଚକିତ କଲା ଭଳି ଘଟଣା ଏବେ ସାମ୍ନାକୁ ଆସିଛି। କର୍ଣ୍ଣାଟକ ଗୋକର୍ଣ୍ଣର ଏକ ଜଙ୍ଗଲରେ ଗୁମ୍ଫା ଭିତରେ ଜଣେ ୪୦ ବର୍ଷୀୟ ମହିଳା ନିଜ ଦୁଇ ଛୋଟ ଛୋଟ ଝିଅଙ୍କୁ ଧରି ରହିଛନ୍ତି । ଯେଉଁ ସ୍ଥାନକୁ ମଣିଷ ପହଞ୍ଚିବା କଷ୍ଟ, ପୁଣି ବଞ୍ଚି ରହିବା ଆହୁରି କଷ୍ଟ ସେଠାରେ ସେ ନିଜର ଛୋଟଛୋଟ ଝିଅଙ୍କୁ ଧରି ରହିଛନ୍ତି । ୮ ବର୍ଷ ହେବ ସେ ଭାରତରେ ଲୁଚି ରହିଛନ୍ତି । ଏ ଘଟଣା କେବଳ ଏକ ବିଦେଶୀ ମହିଳାଙ୍କ ଲୁଚି ରହିବାର କାହାଣୀ ନୁହେଁ , ବରଂ ଏଥିରେ ମହିଳାଙ୍କର ଧର୍ମ, ଇଶ୍ଵର ବିଶ୍ଵାସ, ଆଧ୍ୟାତ୍ମିକତା ମଧ୍ୟ ଲୁଚି ରହିଛି ।

କର୍ଣ୍ଣାଟକର ଉତ୍ତର କନ୍ନଡ ଜିଲ୍ଲାର ଗୋକର୍ଣ୍ଣ ଜଙ୍ଗଲର ରାମତୀର୍ଥ ପାହାଡରେ ଥିବା ଏକ ଗୁମ୍ଫାରୁ ଜଣେ ମହିଳା ଏବଂ ୨ ଝିଅଙ୍କୁ ଉଦ୍ଧାର କରିଛି ପୋଲିସ । ସାଧାରଣତଃ ଏପରି ଘଞ୍ଚ ଜଙ୍ଗଲ ଭଳି ଗୁମ୍ଫାରେ ଜୀବଜନ୍ତୁ ଥିବା ଆମେ ଦେଖିଛନ୍ତି । ହେଲେ ପ୍ରଥମଥର ଏପରି ଗୁମ୍ଫାରେ ମହିଳାଙ୍କୁ ଉଦ୍ଧାର କରାଯାଇଛି । ଏହି ମହିଳା ଜଣକଙ୍କ ନାଁ ହେଉଛି ନୀନା କୁଟିନା । ନୀନାଙ୍କର ଭିସା ୨୦୧୭ରେ ସରିଯାଇଛି । ଏହାପରେ ସେ ଭାରତ ଛାଡି ଯିବା ପରିବର୍ତ୍ତେ ଜଙ୍ଗଲରେ ରହୁଛନ୍ତି । ୨୦୧୬ରେ ବିଜନେସ ଭିସାରେ ଭାରତ ଆସିଥିଲେ । ଏବଂ ଗୋଆର ପର୍ଯ୍ୟଟନ କ୍ଷେତ୍ରରେ କାମ କରୁଥିଲେ । କିନ୍ତୁ ୧୭ ଏପ୍ରିଲ ୨୦୧୭ରେ ତାଙ୍କର ଭିସା ସରି ଯାଇଥିଲା । ୨୦୧୮ ମସିହାରେ, ସେ ଏକଜିଟ୍ ପରମିଟ୍ ନେଇ ନେପାଳ ଯାଇଥିଲେ, କିନ୍ତୁ ତା’ପରେ ସେ ଭାରତ ଫେରି ଆସିଲେ ଏବଂ କର୍ଣ୍ଣାଟକର ଉପକୂଳବର୍ତ୍ତୀ ଜଙ୍ଗଲରେ ଲୁଚି ରହିଲେ ।

ନୀନା କହିଛନ୍ତି, ସେ ଶାନ୍ତି ଏବଂ ଆଧ୍ୟାତ୍ମିକ ପରିବେଶ ଖୋଜି ଏଠାରେ ଆସି ରହିଛନ୍ତି । ଏହି ଜଙ୍ଗଲରେ ରହିବାକୁ ତାଙ୍କୁ ଖୁବ ଭଲ ଲାଗୁଛି । ଏଠାରେ ସାପମାନଙ୍କ ସହ ତାଙ୍କର ବନ୍ଧୁତା ହୋଇଯାଇଛି, ସେମାନେ ତାଙ୍କର କିମ୍ବା ତାଙ୍କ ଛୁଆଙ୍କର କୌଣସି କ୍ଷତି କରୁନାହାନ୍ତି । ନିହାତି କୌଣସି ଜିନିଷର ଆବଶ୍ୟକତା ପଡିଲେ ସେ ସହର ଯାଇଥାନ୍ତି, ପୁଣି ଏହି ଗୁମ୍ଫାକୁ ଫେରି ଆସିଥାନ୍ତି ।

ତେବେ କର୍ଣ୍ଣାଟକ ଗୋକର୍ଣ୍ଣର ପୋଲିସ ପାଟ୍ରୋଲିଂ କରୁଥିବା ସମୟରେ ଏହି ଗୁମ୍ଫାକୁ ଠାବ କରିଥିଲେ । ଏବଂ ସେଠାରେ ମହିଳା ତାଙ୍କର ୨ ଝିଅକୁ ଉଦ୍ଧାର କରିଥିଲେ । ସେଠାରୁ ସେମାନେ ଯିବାପାଇଁ ପ୍ରଥମେ ରାଜି ହୋଇନଥିଲେ ମଧ୍ୟ ପୋଲିସ ତାଙ୍କୁ ଭୁସ୍ଖଳନ ହେଉଥିବା କହି ସେଠାରୁ ଆଣିଥିଲେ । ଏବେ ନୀନା ଏବଂ ତାଙ୍କର ଦୁଇ ଝିଅକୁ ୱମେନ ରିସେପ୍‌ସନ ସେଣ୍ଟରରେ ସ୍ଥାନାନ୍ତରିତ କରାଯାଇଛି । ଏବଂ ସେମାନେ ଉଭୟ ମାନସିକ ଏବଂ ଶାରୀରିକ ରୂପରେ ଠିକ ଥିବା ପୋଲିସ କହିଛନ୍ତି । ପୋଲିସ ନୀନାଙ୍କର ଭିସାକୁ ଗୁମ୍ଫା ନିକଟରୁ ପାଇଛନ୍ତି, ଏବଂ ନୀନା ଏବଂ ତାଙ୍କ ପରିବାରକୁ ରୁଷ ଫେରାଇବା ନେଇ ଫରେନର୍ସ ରିଜୋନାଲ ରେଜିଷ୍ଟ୍ରେସନ ଅଫିସକୁ ସମ୍ପର୍କ କରିଛନ୍ତି । ତେବେ ନୀନାଙ୍କୁ ତାଙ୍କ ସ୍ଵାମୀଙ୍କ ସମ୍ପର୍କରେ ପଚରା ଯାଇଥିବା ବେଳେ ସେ କହିବାକୁ ମନା କରିଛନ୍ତି ।