Working Mother / କୋଳରେ ଶିଶୁ, ହାତରେ ସରକାରୀ କାମ... ସନ୍ଧ୍ୟାଙ୍କୁ ନେଇ ସବୁଠି ଚର୍ଚ୍ଚା

ମଧ୍ୟପ୍ରଦେଶର ଶିବପୁରୀ ଜିଲ୍ଲାର ଜଣେ ମହିଳା ସନ୍ଧ୍ୟା ଶର୍ମା ଏବେ ନିଜ କର୍ତ୍ତବ୍ୟନିଷ୍ଠା ଓ ମାତୃତ୍ୱକୁ ନେଇ ଚର୍ଚ୍ଚାରେ ଅଛନ୍ତି... ସେ ନିଜର ଦୁଇ ବର୍ଷର ପୁଅକୁ ସାଙ୍ଗରେ ନେଇ ଗାଁ ଗାଁ ବୁଲି ଘରକୁ ଘର ଯାଇ ସରକାରୀ କାର୍ଯ୍ୟ କରୁଛନ୍ତି । ତାଙ୍କର ଏହି ନିଷ୍ଠା ଓ କାର୍ଯ୍ୟଶୈଳୀକୁ ପ୍ରଶଂସା କରିଛନ୍ତି ଶିବପୁରୀ ଜିଲ୍ଲାପାଳ ଆଇଏଏସ୍ ଅର୍ପିତ ବର୍ମା।

କୋଳରେ ପିଲା, କାନ୍ଧରେ ସରକାରୀ ଦାୟିତ୍ୱ
ଶିବପୁରୀ ଜିଲ୍ଲାର ଡୋଙ୍ଗର ହଲକାରେ ନିଯୁକ୍ତ ସନ୍ଧ୍ୟା ଶର୍ମା ସ୍ୱାମିତ୍ୱ ଯୋଜନାର କାର୍ଯ୍ୟ ପାଇଁ ଗାଁଗୁଡ଼ିକୁ ଯାଉଛନ୍ତି । ଏହି ସମୟରେ ତାଙ୍କର ଦୁଇ ବର୍ଷର ପୁଅ ମଧ୍ୟ ତାଙ୍କ ସହ ରହୁଛି । ଗୋଟିଏ ପଟେ ଛୋଟ ପିଲାର ଯତ୍ନ ନେବା ଓ ଅନ୍ୟପଟେ ସରକାରୀ କାର୍ଯ୍ୟର ଦାୟିତ୍ୱ ତୁଲାଇବା ଭଳି ଦୁଇଟି ଗୁରୁତ୍ୱପୂର୍ଣ୍ଣ କାମକୁ ସେ ଏକାସାଙ୍ଗରେ ସମ୍ଭାଳୁଛନ୍ତି ।

ଜିଲ୍ଲାପାଳ କଲେ ପ୍ରଶଂସା
ଶିବପୁରୀ ଜିଲ୍ଲାପାଳ ଅର୍ପିତ ବର୍ମା ସନ୍ଧ୍ୟାଙ୍କ ଏହି ପ୍ରୟାସକୁ ପ୍ରଶଂସା କରି କହିଛନ୍ତି, “ଗୋଟିଏ ପଟେ ମାଆର ସ୍ନେହ, ଅନ୍ୟପଟେ ଜନସେବାର ସଂକଳ୍ପ!” ସେ କହିଛନ୍ତି ଯେ, ସନ୍ଧ୍ୟା ଶର୍ମା କୋଳରେ ଦୁଇ ବର୍ଷର ଶିଶୁ ଓ କାନ୍ଧରେ ସରକାରଙ୍କ ଯୋଜନାର ଦାୟିତ୍ୱ ନେଇ ଉଭୟ ଭୂମିକାକୁ ସମର୍ପଣ ଓ ସହଜ ଭାବରେ ତୁଲାଉଛନ୍ତି । ତାଙ୍କର କର୍ତ୍ତବ୍ୟନିଷ୍ଠା, ସମର୍ପଣ ଭାବ ମାତୃତ୍ୱକୁ ଜିଲ୍ଲାପାଳ ପ୍ରେରଣାଦାୟକ ବୋଲି କହିଛନ୍ତି । ଏହାପରେ ସନ୍ଧ୍ୟାଙ୍କ କାର୍ଯ୍ୟଶୈଳୀକୁ ନେଇ ଚର୍ଚ୍ଚା ବଢ଼ିଛି ।

କ’ଣ ଏହି ସ୍ୱାମିତ୍ୱ ଯୋଜନା ?
ମଧ୍ୟପ୍ରଦେଶରେ ସ୍ୱାମିତ୍ୱ ଯୋଜନା ଅଧୀନରେ ଗ୍ରାମାଞ୍ଚଳର ଆବାସିକ ଜମି ଓ ଘରର ରେକର୍ଡ ପ୍ରସ୍ତୁତ କରାଯାଏ । ଯୋଗ୍ୟ ହିତାଧିକାରୀଙ୍କ ପଞ୍ଜୀକରଣ ଓ ସମ୍ପତ୍ତି ସମ୍ବନ୍ଧୀୟ ତଥ୍ୟ ସଂଗ୍ରହରେ ଭୂମିକା ଗୁରୁତ୍ୱପୂର୍ଣ୍ଣ । ଏହି ଯୋଜନାର କାମ ପାଇଁ ସନ୍ଧ୍ୟାଙ୍କୁ ଗାଁରେ ଘରକୁ ଘର ଯାଇ ଲୋକଙ୍କଠାରୁ ତଥ୍ୟ ଓ ଆବଶ୍ୟକ ଦସ୍ତାବିଜ ସଂଗ୍ରହ ସହ ଅନ୍ୟାନ୍ୟ ପ୍ରକ୍ରିୟା ପୂରଣ କରିବାକୁ ପଡ଼ୁଛି । ସେ ଶିବପୁରୀ ସହରରେ ରହୁଥିବା ବେଳେ ତାଙ୍କ ସ୍ୱାମୀ ମଧ୍ୟ ସରକାରୀ ଚାକିରି କରନ୍ତି । ଏପରି ସ୍ଥିତିରେ ପାରିବାରିକ ଦାୟିତ୍ୱ ସହ ସରକାରୀ କାର୍ଯ୍ୟକୁ ସେ ଗୁରୁତ୍ୱ ଦେଉଛନ୍ତି ।

ଏପର୍ଯ୍ୟନ୍ତ ୭ ଲକ୍ଷରୁ ଅଧିକ ପଞ୍ଜୀକରଣ
ସରକାରୀ ସୂଚନା ଅନୁସାରେ, ମଧ୍ୟପ୍ରଦେଶରେ ଏହି ଯୋଜନା ଅଧୀନରେ ଏପର୍ଯ୍ୟନ୍ତ ୭ ଲକ୍ଷ ୬୨ ହଜାରରୁ ଅଧିକ ପଞ୍ଜୀକରଣ ସମ୍ପୂର୍ଣ୍ଣ ହୋଇଛି । ଏହି ଅଭିଯାନ ଅଧୀନରେ ୪୦ ହଜାରରୁ ଅଧିକ ଗାଁର ପ୍ରାୟ ୫୦ ଲକ୍ଷ ପରିବାରକୁ ମାଗଣା ପଞ୍ଜୀକରଣ ସୁବିଧା ଯୋଗାଇବାର ଲକ୍ଷ୍ୟ ରହିଛି । ଏହି ଯୋଜନା ଦ୍ୱାରା ଗ୍ରାମାଞ୍ଚଳର ଲୋକମାନେ ନିଜ ସମ୍ପତ୍ତିର ମାଲିକାନା ସମ୍ବନ୍ଧୀୟ ଆଇନଗତ ଦସ୍ତାବିଜ ପାଇପାରିବେ । ଏହା ସହିତ ବ୍ୟାଙ୍କ ଋଣ ଓ ଅନ୍ୟାନ୍ୟ ଆର୍ଥିକ ସୁବିଧା ପାଇବାର ସୁଯୋଗ ମଧ୍ୟ ବଢ଼ିପାରେ ।

ଡିଜିଟାଲ୍ ମାଧ୍ୟମରେ ଚାଲିଛି କାର୍ଯ୍ୟ
ସ୍ୱାମିତ୍ୱ ଯୋଜନାର କାର୍ଯ୍ୟକାରିତା ପାଇଁ ‘ସାରା ଆପ୍’ ଓ ‘ସମ୍ପଦା ୨.୦’ ଭଳି ଡିଜିଟାଲ୍ ମାଧ୍ୟମର ବ୍ୟବହାର କରାଯାଉଛି । ଏହା ଦ୍ୱାରା ସମ୍ପତ୍ତିର ରେକର୍ଡ ସଂଶୋଧନ, ପଞ୍ଜୀକରଣ ଓ ଯାଞ୍ଚ ପ୍ରକ୍ରିୟାକୁ ଅଧିକ ସୁବ୍ୟବସ୍ଥିତ କରିବାକୁ ଉଦ୍ୟମ ହେଉଛି । ରାଜ୍ୟର ସମସ୍ତ ୫୫ଟି ଜିଲ୍ଲାରେ ପଞ୍ଜୀକରଣ କାର୍ଯ୍ୟ ଜାରି ରହିଥିବା ସୂଚନା ଦିଆଯାଇଛି । ଏହି ଯୋଜନାକୁ ଗାଁ ଗାଁରେ ପହଞ୍ଚାଇବାରେ ସମ୍ପୃକ୍ତ ବିଭାଗୀୟ ଅଧିକାରୀଙ୍କ ଭୂମିକା ଅତ୍ୟନ୍ତ ଜରୁରୀ ।

ମାତୃତ୍ୱ ଓ ଚାକିରି ମଧ୍ୟରେ ସନ୍ତୁଳନର ଉଦାହରଣ
ସନ୍ଧ୍ୟା ଶର୍ମାଙ୍କ କାହାଣୀ କେବଳ ଜଣେ ସରକାରୀ କର୍ମଚାରୀଙ୍କ କର୍ତ୍ତବ୍ୟନିଷ୍ଠାର କାହାଣୀ ନୁହେଁ । ଏହା କାର୍ଯ୍ୟରତ ମହିଳାମାନେ ଚାକିରି ସହ ଛୋଟ ପିଲାଙ୍କ ଯତ୍ନ ନେବା ସମୟରେ ସାମ୍ନା କରୁଥିବା ଚ୍ୟାଲେଞ୍ଜକୁ ମଧ୍ୟ ସାମ୍ନାକୁ ଆଣିଛି । ଦୁଇ ବର୍ଷର ପୁଅକୁ ସାଙ୍ଗରେ ନେଇ ଗାଁ ଗାଁ ବୁଲି ସରକାରୀ ଦାୟିତ୍ୱ ତୁଲାଉଥିବା ସନ୍ଧ୍ୟାଙ୍କ ଏହି ପ୍ରୟାସ ଅନେକଙ୍କ ପାଇଁ ପ୍ରେରଣା ପାଲଟିଛି । ମାତୃତ୍ୱର ଦାୟିତ୍ୱ ଓ ଜନସେବାର ସଂକଳ୍ପକୁ ଏକାସାଙ୍ଗରେ ନିଭାଇବାର ତାଙ୍କ ଉଦ୍ୟମକୁ ଜିଲ୍ଲାପାଳଙ୍କ ପ୍ରଶଂସା ଏବେ ନୂଆ ପରିଚୟ ଦେଇଛି ।