ନୂଆଦିଲ୍ଲୀ: ବଲ୍ଲଭଭାଇ, ଜୟଭୀରଭାଇ ପଟେଲ ଯିଏକି ସାଧାରଣତଃ ସର୍ଦ୍ଦାର ବଲ୍ଲଭଭାଇ ପଟେଲଙ୍କ ନାମରେ ଜଣାଶୁଣା । ତାଙ୍କର ଜନ୍ମ ୩୧ ଅକ୍ଟୋବର ୧୮୭୫ ମସିହାରେ ଗୁଜରାଟର ନାଦିଆଦରେ ହୋଇଥିଲା । ସେ ଜଣେ ଭାରତୀୟ ସ୍ଵାଧୀନତା ସଂଗ୍ରାମୀ ତଥା ରାଜନେତା ଥିଲେ ।

ଏହା ସହିତ ୧୯୪୭ରୁ ୧୯୫୦ ମସିହା ପର୍ଯ୍ୟନ୍ତ ଭାରତର ପ୍ରଥମ ଉପପ୍ରଧାନମନ୍ତ୍ରୀ ଓ ଗୃହମନ୍ତ୍ରୀ ଭାବରେ ମଧ୍ୟ କାର୍ଯ୍ୟ କରିଥିଲେ । ସେ ଭାରତୀୟ ଜାତୀୟ କଂଗ୍ରେସ ଦଳର ଜଣେ ବରିଷ୍ଠ ନେତା ଥିଲେ । ଯିଏ କି ଭାରତର ସ୍ଵାଧୀନତା ଆନ୍ଦୋଳନରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ।

ସର୍ଦ୍ଦାର ବଲ୍ଲଭଭାଇ ପଟେଲ ଥିଲେ ଏମିତି ଜଣେ ନେତା, ଯିଏ କେବଳ ନିଜର ଇଚ୍ଛାଶକ୍ତି ଓ ରାଜନୈତିକ ବୁଦ୍ଧି ବଳରେ ଭାରତର ୫୬୨ଟି ଗଡ଼ଜାତ ରାଜ୍ୟକୁ ଏକତ୍ର କରି ବିଚ୍ଛନ୍ନ ହେବାରୁ ରକ୍ଷା କରିଥିଲେ । ତାଙ୍କର ଏହି ମଜଭୁତ ନେତୃତ୍ଵ ଯୋଗୁ ତାଙ୍କୁ 'ଲୌହ ପୁରୁଷ' ମଧ୍ୟ କୁହାଯାଏ ।

ଏଥିସହ ପଢ଼ନ୍ତୁ: ଟ୍ରମ୍ପଙ୍କ ଏହି ୪ କାମ ସଫଳ ହେଲେ ଖସିଯିବ ସୁନା ସହ ରୂପା ମୂଲ୍ୟ !

କେମିତି ମିଳିଲା 'ସର୍ଦ୍ଦାର' ଉପାଧି ?

ସର୍ଦ୍ଦାର ବଲ୍ଲଭଭାଇ ପଟେଲ, ମହତ୍ମା ଗାନ୍ଧୀଙ୍କ ସହ ମିଶି ନିଜର ଜୀବନ ବଦଳାଇ ଦେଇଥିଲେ । ସେ ଗାନ୍ଧୀଙ୍କର ବିଚାରଧାରାରେ ଏତେ ମାତ୍ରାରେ ପ୍ରଭାବିତ ହୋଇଥିଲେ ଯେ, ସେ ସାରା ଜୀବନ ଦେଶ ସେବାରେ ନିଜକୁ ନିୟୋଜିତ କରିଥିଲେ ।

ସର୍ଦ୍ଦାର ବଲ୍ଲଭଭାଇ ପଟେଲ ଦେଶର ସ୍ଵାଧୀନତା ଲଢ଼େଇରେ ଜନତାଙ୍କୁ ଏକଜୁଟ୍ କରିଥିଲେ । ବ୍ରିଟିଶ ଶାସନର ବିରୋଧରେ ଏକତାର ବାର୍ତ୍ତା ପ୍ରସାର କରିଥିଲେ । ଏହା ସହିତ ସେ ଅହମ୍ମଦାବାଦ କୃଷକ ଆନ୍ଦୋଳନ ଓ ୧୯୨୮ ମସିହାରେ ବରଦୋଳି ସତ୍ୟାଗ୍ରହର ସଫଳ ନେତୃତ୍ଵ ନେଇଥିଲେ । ଯାହାଫଳରେ ତାଙ୍କୁ 'ସର୍ଦ୍ଦାର' ଉପାଧି ମିଳିଥିଲା ।

ବିଦ୍ୟାଳୟରୁ ଛାତ୍ର ନେତା

ଯୁବାବସ୍ଥାରୁ ଖୁବ୍ କର୍ମତତ୍ପର ଥିଲେ ବଲ୍ଲଭଭାଇ । ବିଦ୍ୟାଳୟରେ ପଢ଼ିବା ସମୟରେ ଜଣେ ଦୁର୍ନୀତିଗ୍ରସ୍ତ ଶିକ୍ଷକଙ୍କ ବିରୋଧରେ ଛାତ୍ର ଆନ୍ଦୋଳନର ନେତୃତ୍ଵ ନେଇଥିଲେ । ସେବେଠୁ ସ୍ଵପ୍ନ ଦେଖିଥିଲେ ଓକିଲ ହେବେ । ଏଥିପାଇଁ ସେ ୧୯୧୦ରେ ଇଂଲଣ୍ଡ ଯାଆନ୍ତି ଓ ସେଠାକାର ବାର୍ ପରୀକ୍ଷାରେ ଶୀର୍ଷ ସ୍ଥାନ ଅଧିକାର କରନ୍ତି । ୧୯୧୩ରେ ସେ ବାର୍ ଆସୋସିଏସନ୍‌ରେ ସ୍ଥାନ ପାଇ ଦେଶକୁ ଫେରନ୍ତି । ସେବେଠୁ ୧୯୫୦ ମୃତ୍ୟୁ ପର୍ଯ୍ୟନ୍ତ ସେ ଆଉ ଭାରତ ଛାଡ଼ି ଯାଇ ନଥିଲେ ।

ଜେଲ୍‌ରେ ୧୬ ବର୍ଷ

ଅହମଦାବାଦରେ ସେ ଥିଲେ ଜଣେ ପ୍ରତିଷ୍ଠିତ କ୍ରିମିନାଲ୍ ଓକିଲ । ୧୯୧୭ରେ ଅହମଦାବାଦ ପୌର ପରିଷଦକୁ ନିର୍ବାଚିତ ହୋଇଥିଲେ । ୧୯୨୪ରେ ହୋଇଥିଲେ ପୌରାଧ୍ୟକ୍ଷ । ୧୯୨୮ରେ ସେ ଅହମଦାବାଦ ପୌର ସଂସ୍ଥାରୁ ଇସ୍ତଫା ଦେଇ 'ଟିକସକୁ ନା' ଅଭିଯାନର ନେତୃତ୍ଵ ନେଇଥିଲେ ।

ଏଥିସହ ପଢ଼ନ୍ତୁ: ଜଙ୍ଗଲ ମଧ୍ୟରୁ ମିଳିଲା ଅଧା ପୋତା କଙ୍କାଳ, ଏଣେତେଣେ ପଡ଼ିଛି ହାଡ଼ ଓ ଖପୁରି

ଗାନ୍ଧୀଜୀଙ୍କ ଦ୍ଵାରା ଅନୁପ୍ରାଣିତ ହୋଇ ଭାରତ ଛାଡ଼ ଆନ୍ଦୋଳନରେ ସାମିଲ୍ ହୋଇ ୧୯୩୦ରେ ଜେଲ୍ ଯାଇଥିଲେ ସର୍ଦ୍ଦାର ବଲ୍ଲଭଭାଇ ପଟେଲ । ଆଉ ତା'ପରବର୍ତ୍ତୀ ୧୬ ବର୍ଷ ଅର୍ଥାତ୍ ଜୀବନର ଅର୍ଦ୍ଧାଧିକ ସମୟ ଜେଲରେ କାଟିଥିଲେ ।

୨୦୧୪ ମସିହାରୁ ଦେଶର ଶକ୍ତି ଓ ସ୍ଥିରତାକୁ ପୁନଃ ନିର୍ଦ୍ଦିଷ୍ଟ କରିବା ପାଇଁ ତାଙ୍କର ଜନ୍ମ ଦିନକୁ ଆନୁଷ୍ଠନିକ ଭାବରେ 'ଜାତୀୟ ଏକତା ଦିବସ' ଭାବେ ପାଳନ କରାଯାଏ । ଏହି ଦିନଟିକୁ ତାଙ୍କର ଦୃଷ୍ଟିକୋଣ, ସାହସ ଓ ଏକତା ଏବଂ ମିଳିତ ରାଷ୍ଟ୍ର ଗଠନର ପ୍ରୟାସକୁ ନେଇ ସ୍ମରଣ କରାଯାଏ । ଯେଉଁଥିରେ ସାରା ଦେଶରେ 'ଏକତା ପାଇଁ ଦୌଡ଼ କାର୍ଯ୍ୟକ୍ରମ' ଏବଂ ଶପଥ ଗ୍ରହଣ ସମାରୋହ ପାଳନ କରାଯାଏ ।