ନିର୍ବାଚନ ପ୍ରତିଶ୍ରୁତି ପାଇଁ ୫୦୦ କୁକୁରଙ୍କ ବଳି। ତେଲେଙ୍ଗାନାର ୨ଟି ଜିଲ୍ଲାରେ ଜଘନ୍ୟ କାଣ୍ଡ। କାମାରେଡି ଏବଂ ହମନକୋଣ୍ଡା ଜିଲ୍ଲାରେ ଘଟିଛି ଏଭଳି ଘଟଣା। ନୃଶଂସତାର ସବୁ ସୀମା ପାର୍ କରିଗଲେ ସରପଞ୍ଚ। ଥାନାରେ ପହଞ୍ଚିଲା ମାମଲା। ଷ୍ଟ୍ରିଟ୍ ଡଗ୍‌ ଙ୍କୁ ନେଇ ସୁପ୍ରିମକୋର୍ଟରେ ଶୁଣାଣି ଚାଲୁଥିବା ବେଳେ ସମସ୍ତଙ୍କୁ ଚକିତ କରିଛି ଏହି ଘଟଣା।

ସୂଚନାନୁଯାୟୀ, ୨୦୨୬ ଜାନୁଆରୀ ୧୨ ତାରିଖରେ ଷ୍ଟ୍ରେ ଆନିମଲ୍ ଫାଉଣ୍ଡେସନ୍ ଅଫ୍ ଇଣ୍ଡିଆ ସହ ଜଡ଼ିତ ଆନିମଲ୍ କ୍ରୁଏଲିଟି ନିବାରଣ ପରିଚାଳକ ଆଦୁଲାପୁରମ୍ ଗୌତମ ମାଚାରେଡି ଥାନାରେ ଏକ ଲିଖିତ ଅଭିଯୋଗ କରିଛନ୍ତି। ଗୌତମଙ୍କ ଅଭିଯୋଗ ଅନୁଯାୟୀ, ମାଚାରେଡି ଥାନା ଅଞ୍ଚଳର ଭାବନିପେଟ, ପଲବାଞ୍ଚା, ଫରିଦପେଟ, ୱାଡି ଏବଂ ବୃନ୍ଦାରମେଶ୍ୱରପାଲ୍ଲୀ ଗାଁରେ ଗତ ଦୁଇରୁ ତିନି ଦିନ ଭିତରେ ପ୍ରାୟ ୨୦୦ ବୁଲା କୁକୁରଙ୍କୁ ନିର୍ମମ ଭାବେ ହତ୍ୟା କରାଯାଇଛି। ଏହି ଗାଁ ଗୁଡ଼ିକର ସରପଞ୍ଚଙ୍କ ନିର୍ଦ୍ଦେଶ କ୍ରମେ କୁକୁରଙ୍କୁ ବିଷ ଇଞ୍ଜେକ୍ସନ ଦେଇ ହତ୍ୟା କରାଯାଇଛି। ପୁଲିସ ଏହି ଘଟଣାରେ ତଦନ୍ତ ଆରମ୍ଭ କରିଛି। ଅଭିଯୁକ୍ତଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ନିଆଯିବ ବୋଲି ପୁଲିସ କହିଛି।

ଏନେଇ ଗ୍ରାମବାସୀଙ୍କ କହିବା ଅନୁଯାୟୀ, ଡିସେମ୍ଵରରେ ହୋଇଥିବା ନିର୍ବାଚନରେ ବୁଲା କୁକୁର ସମସ୍ୟା ଦୂର କରିବା ପାଇଁ ସରପଞ୍ଚ ପ୍ରାର୍ଥୀମାନେ ପ୍ରତିଶ୍ରୁତି ଦେଇଥିଲେ। ନିର୍ବାଚନ ଜିତିବା ପରେ ଏହାକୁ ପୂରଣ କରିବା ପାଇଁ ଏତେ ସଂଖ୍ୟାରେ କୁକୁରଙ୍କୁ ସାମୂହିକ ଭାବେ ହତ୍ୟା କରାଯାଇଛି। ଗାଁ ବାହାରେ ଏହି କୁକୁରଙ୍କ ଶବ ପୋତା ଯାଇଛି। ପଶୁ ଚିକିତ୍ସକ ଟିମ୍ ଘଟଣାସ୍ଥଳରେ ପହଞ୍ଚି କୁକୁରଙ୍କ ଶବ ବାହାର କରି ବ୍ୟବଚ୍ଛେଦ କରିଛନ୍ତି।

ପ୍ରାଣୀ ଅଧିକାର କର୍ମୀମାନେ କହିଛନ୍ତି ଯେ ଏହା କେବଳ ଅମାନବୀୟ ନୁହେଁ ବରଂ ଆଇନର ଏକ ଖୋଲା ଉଲ୍ଲଂଘନ। ସେମାନେ ଅଭିଯୋଗ କରିଛନ୍ତି ଯେ ଯଦି ବୁଲା କୁକୁରଙ୍କ ସଂଖ୍ୟା ବୃଦ୍ଧିରେ କୌଣସି ସମସ୍ୟା ଥିଲା, ତେବେ ଏହାକୁ ମାନବିକ ଏବଂ ଆଇନଗତ ଭାବରେ ସମାଧାନ କରାଯିବା ଉଚିତ ଥିଲା, ବିଷ ଦେଇ ହତ୍ୟା କରି ନୁହେଁ।

ଅଭିଯୋଗ ଆଧାରରେ, ଶ୍ୟାମପେଟ ପୋଲିସ ଷ୍ଟେଶନରେ ପ୍ରାଣୀମାନଙ୍କ ପ୍ରତି ନିଷ୍ଠୁରତା ନିବାରଣ ଆଇନ, ୧୯୬୦ ଏବଂ ଅନ୍ୟାନ୍ୟ ପ୍ରାସଙ୍ଗିକ ଆଇନର ଧାରା ଅନୁଯାୟୀ ଏକ ମାମଲା ରୁଜୁ କରାଯାଇଛି। ପୋଲିସ ଅଧିକାରୀଙ୍କ ଅନୁଯାୟୀ, ସମସ୍ତ ଅଭିଯୋଗର ଗମ୍ଭୀରତାର ସହିତ ତଦନ୍ତ କରାଯାଉଛି। ପୋଲିସ କହିଛି ଯେ ତଦନ୍ତ ଦ୍ୱାରା କୁକୁରମାନଙ୍କୁ କିପରି ହତ୍ୟା କରାଯାଇଥିଲା, କିଏ ଏଥିରେ ଭୂମିକା ଗ୍ରହଣ କରିଥିଲା ଏବଂ ସ୍ଥାନୀୟ ପ୍ରଶାସନର କୌଣସି ପ୍ରତିନିଧି ସିଧାସଳଖ ସମ୍ପୃକ୍ତ ଥିଲେ କି ନାହିଁ ତାହା ନିର୍ଣ୍ଣୟ କରାଯିବ। ଦୋଷୀ ବ୍ୟକ୍ତିଙ୍କ ବିରୁଦ୍ଧରେ କଠୋର ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏହି ଘଟଣା ପରେ, ପ୍ରାଣୀ ପ୍ରେମୀ ଏବଂ ସାମାଜିକ ସଂଗଠନଗୁଡ଼ିକ ବ୍ୟାପକ କ୍ଷୋଭ ପ୍ରକାଶ କରିଛନ୍ତି, ଦୋଷୀମାନଙ୍କୁ କଠୋର ଦଣ୍ଡ ଦେବାକୁ ଦାବି କରିଛନ୍ତି।