ଜୀବନ ବୀମା ପଲିସି କରିଥିଲେ ପଢ଼ି ନିଅନ୍ତୁ ଏହି ଖବର, ସୁପ୍ରିମକୋର୍ଟ ଦେଲେ ବଡ଼ ନିର୍ଦ୍ଦେଶ

ଲାଇଫ୍ ଇନ୍ସୁରାନ୍ସ ବା ଜୀବନ ବୀମା । ଆଜିକା ଦିନରେ ପ୍ରାୟ ପ୍ରତ୍ୟେକ ଲୋକ ଅନ୍ୟ ବୀମା ସହ ଜୀବନ ବୀମା ତ କରୁଛନ୍ତି । କିନ୍ତୁ ଅନେକ ସମୟରେ ସଠିକ୍ ସୂଚନା ନ ପାଇଁ ତଥ୍ୟ ବି ଲୁଚାଉଛନ୍ତି । ଆଉ ପରେ ହଇରାଣ ବି ହେଉଛନ୍ତି । ଜୀବନ ବୀମା ପଲିସି କରୁଥିବା ଲୋକଙ୍କୁ ସାବଧାନ କରାଇଛନ୍ତି ସୁପ୍ରିମକୋର୍ଟ । କହିଛନ୍ତି, ପଲିସି ନେବା ବେଳେ ପ୍ରସ୍ତାବ ପତ୍ରରେ ପୂର୍ବରୁ ଥିବା ପଲିସି ବିଷୟରେ ତଥ୍ୟ ନ ଦେଲେ ଆପଣଙ୍କ କ୍ଲେମ୍ ଅଗ୍ରାହ୍ୟ ହୋଇପାରେ ।

ତେବେ ସର୍ବୋଚ୍ଚ ଅଦାଲତ ଏହି ମାମଲାର ଶୁଣାଣି କରି ଆବେଦନକାରୀଙ୍କ ପକ୍ଷରେ ରାୟ ଶୁଣାଇଛନ୍ତି । ବାର୍ଷିକ ୯ ପ୍ରତିଶତ ସୁଧ ହାରରେ ଆବେଦନକାରୀଙ୍କୁ ବୀମା ରାଶି ପ୍ରଦାନ କରି କ୍ଲେମ୍ ସାରିବାକୁ ନିର୍ଦ୍ଦେଶ ଦେଇଛନ୍ତି ସୁପ୍ରିମକୋର୍ଟ ।

ଜଷ୍ଟିସ୍ ବିବି ନାଗରତ୍ନା ଓ ଜଷ୍ଟିସ୍ ସତୀଶ ଚନ୍ଦ୍ର ଶର୍ମାଙ୍କ ଖଣ୍ଡପୀଠ ଜୀବନ ବୀମା ସମ୍ପର୍କିତ ଗୁରୁତ୍ଵପୂର୍ଣ୍ଣ ମାମଲାର ଶୁଣାଣି କରି କହିଛନ୍ତି, 'ପୂର୍ଣ୍ଣତଃ ବୀମା ଏକ ବୈଧ ଅନୁବନ୍ଧ' । ଏଥିପାଇଁ ଆବେଦନକାରୀଙ୍କ ଏହା କର୍ତ୍ତବ୍ୟ ହେବା ଉଚିତ୍ ଯେ, ପଲିସି ନେବା ବେଳେ ସମସ୍ତ ତଥ୍ୟ ଦିଅନ୍ତୁ । ଯାହା ବୀମା କମ୍ପାନୀ ଲାଗି ଗୁରୁତ୍ଵପୂର୍ଣ୍ଣ ।

ଖଣ୍ଡପୀଠ କହିଛନ୍ତି, ପ୍ରସ୍ତାବ ପତ୍ରରେ ଦିଆ ଯାଇଥିବା ତଥ୍ୟକୁ ବୀମା ଅନୁବନ୍ଧ ଲାଗି ମହତ୍ତ୍ଵପୂର୍ଣ୍ଣ ବିବେଚନା କରାଯାଏ । ଏବଂ ବୀମା ପ୍ରସ୍ତାବ ବେଳେ ତଥ୍ୟ ନ ଦେଲେ କ୍ଲେମ୍ ବେଳେ ଅଗ୍ରାହ୍ୟ କରି ଦିଆଯାଇ ପାରେ । ତେବେ ଅଦାଲତ ଆହୁରି କହିଛନ୍ତି ଯେ, କୌଣସି ତଥ୍ୟର ବାସ୍ତବିକତା ନିର୍ଦ୍ଧାରଣ ମାମଲାରୁ ମାମଲାରେ ଭିନ୍ନ ହୋଇପାରେ ।

ଲାଇଭ୍ ଲ୍ ରିପୋର୍ଟ ଅନୁସାରେ, ସୁପ୍ରିମକୋର୍ଟରେ ଶୁଣାଣି ହୋଇଥିବା ମାମଲାରେ ଆବେଦନକାରୀ ମହାବୀର ଶର୍ମାଙ୍କ ପିତା ରାମକରଣ ଶର୍ମା ୨୦୧୪ ଜୁନ୍ ୯ରେ ଏକ୍ସାଇଡ୍ ଲାଇଫ ଇନ୍ସୁରାନ୍ସ କମ୍ପାନୀରେ ୨୫ ଲକ୍ଷର ଜୀବନ ବୀମା ପଲିସି କରିଥିଲେ । ତେବେ ବୀମା ନେବାର ବର୍ଷକ ପରେ ୨୦୧୫ ଅଗଷ୍ଟ ୧୯ରେ ଏକ ସଡ଼କ ଦୁର୍ଘଟଣାରେ ରାମକରଣଙ୍କ ମୃତ୍ୟୁ ହୋଇଥିଲା ।

ପିତାଙ୍କ ମୃତ୍ୟୁ ପରେ ପୁଅ ମହାବୀର ଏକ୍ସାଇଡ୍ ଲାଇଫ୍ ଇନ୍ସୁରାନ୍ସ କମ୍ପାନରେ ଏକ ପଲିସି କ୍ଲେମ୍ ଆବେଦନ କରିଥିଲେ । କିନ୍ତୁ କମ୍ପାନୀ ଆବେଦନ ଅଗ୍ରାହ୍ୟ କରି କହିଥିଲା ରାମକରଣ ପଲିସି ନେବା ବେଳେ ପୁରୁଣା ପଲିସି ତଥ୍ୟ ଲୁଚାଇଥିଲେ । ରାମକରଣଙ୍କ କେବଳ ଗୋଟିଏ ପଲିସି ତଥ୍ୟ ଦେଇଥିବା ବେଳେ ଅନ୍ୟ ପଲିସି ତଥ୍ୟ ଦେଇ ନଥିଲେ ।

କମ୍ପାନୀ କ୍ଲେମ୍ ଆବେଦନ ଖାରଜ କରିବା ପରେ ମହାବୀର ରାଜ୍ୟ ଓ ରାଷ୍ଟ୍ରୀୟ ଉପଭୋକ୍ତା ଆୟଗର ଦ୍ଵାରସ୍ଥ ହୋଇଥିଲେ । ସେଠାରେ ବି ନିରାଶ ହେବାକୁ ପଡ଼ିଥିଲା । ଏହା ପରେ ସେ ସୁପ୍ରିମକୋର୍ଟ ଯାଇଥିଲେ । ଯେଉଁଠି ଜଣା ପଡ଼ିଥିଲା କ୍ଲେମ୍ ବାବଦକୁ ୪୦ ଲକ୍ଷ ମିଳିବାକୁ ଥିବା ବେଳେ ବିବରଣୀ ଦିଆ ଯାଇନଥିବା ବୀମାର ମୂଲ୍ୟ ମାତ୍ର ୨.୩ ଲକ୍ଷ ଟଙ୍କା । ଏହାଛଡ଼ା ଏହା ମେଡିକ୍ଲେମ୍ ପଲିସି ହୋଇ ନଥିବା ଏବଂ ମୃତ୍ୟୁ ଦୁର୍ଘଟଣାରେ ହୋଇଥିବାରୁ ସୁପ୍ରିମକୋର୍ଟ ଆବେଦନକାରୀଙ୍କ ପକ୍ଷରେ ରାୟ ଦେଇ ବୀମା ରାଶି ଦେବାକୁ ନିର୍ଦ୍ଦେଶ ଦେଇଛନ୍ତି ।