ଭାରତରେ ଅନେକ ପ୍ରାଚୀନ ଶିବ ମନ୍ଦିର ରହିଛି । ଆଉ ଅନେକ ମନ୍ଦିର ରହିଛି ପୌରାଣିକ ଯୁଗରୁ । ସେଭଳି ଏକ ମନ୍ଦିର ହେଉଛି ୟୁପି କାନପୁରରେ ଥିବା ଖେରେଶ୍ଵର ମନ୍ଦିର । ଯାହାର ଇତିହାସ ମହାଭାରତ ସହ ଜଡ଼ିତ । କାନପୁର ସହର ଠାରୁ ପ୍ରାୟ ୪୦ କିଲୋମିଟର ଦୂର ଶିବରାଜପୁରରେ ରହିଛି ଖେରେଶ୍ଵର ମନ୍ଦିର ।

କାନପୁରର ଗଙ୍ଗା ନଦୀ କୂଳରେ ରହିଛି ଖେରେଶ୍ଵର ମହାଦେବ ମନ୍ଦିର । ବିଶ୍ଵାସ ରହିଛି, ମହାଭାରତ ସମୟରୁ ଆଜି ଯାଏଁ ପ୍ରତିଦିନ ପ୍ରଥମେ ଅଶ୍ଵତ୍ଥାମା ଆସି ପୂଜା କରନ୍ତି ଏହି ମନ୍ଦିରରେ । ମନ୍ଦିରର କପାଟ ଖୋଲିବା ପୂର୍ବରୁ ହିଁ ଶିବଲିଙ୍ଗରେ ଅଦ୍ଭୂତ ଫୁଲ ଓ ଅନ୍ୟ ପୂଜା ସାମଗ୍ରୀ ଚଢ଼ା ଯାଇଥାଏ । ଆଉ ଆଜି ମହାଶିବରାତ୍ରୀରେ ଖେରେଶ୍ଵର ମନ୍ଦିରରେ ଲାଗିଛି ଲକ୍ଷ ଲକ୍ଷ ଶ୍ରଦ୍ଧାଳୁଙ୍କ ଭିଡ଼ ।

ବିଶେଷଜ୍ଞଙ୍କ ଅନୁସାରେ, ଏହି ମନ୍ଦିର ପ୍ରାୟ ୫୦୦୦ ବର୍ଷ ପୁରୁଣା ଅଟେ । ଏହି ମନ୍ଦିରର ସ୍ଥାପନା ମହାଭାରତ ସମୟରେ ହୋଇଥିଲା । ବିଶ୍ଵାସ ରହିଛି ଯେ, ଏବେ ବି ପ୍ରତିଦିନ ଅଶ୍ଵତ୍ଥାମା ସକାଳେ ପ୍ରଥମେ ମନ୍ଦିର ଆସି ପୂଜାର୍ଚ୍ଚନା କରିଥାଆନ୍ତି ।

ଏହି ରାଜ୍ ଖୋଲିବା ପାଇଁ ମନ୍ଦିରରେ କ୍ୟାମେରା ବି ଲଗା ଯାଇଥିଲା । ଏପରିକି ଏହି ରହସ୍ୟ ଖୋଜିବାରେ ବିଜ୍ଞାନ ବି ବିଫଳ ହୋଇଛି । କାରଣ ବ୍ରହ୍ମ ମୁହୂର୍ତ୍ତରେ ହିଁ ମନ୍ଦିର କପାଟ ଖୋଲିବା ପୂର୍ବରୁ ଶିବ ଲିଙ୍ଗ ପୂଜାର୍ଚ୍ଚନା ହୋଇଥିବା ଦେଖିବାକୁ ମିଳେ । ଶିବଲିଙ୍ଗରେ ଅଜଣା ଫୁଲ ଅର୍ପଣ ହୋଇଥିବା ବେଳେ ଚନ୍ଦନ ଓ ଧୂପ ଦିଆ ଯାଇଥାଏ । କିନ୍ତୁ, ଏ ଚମତ୍କାର କିଭଳି ହୁଏ ଏହା ଆଜି ଯାଏଁ କେହି ଦେଖି ନାହାନ୍ତି ।

ଖେରେଶ୍ଵର ମନ୍ଦିର ନିକଟରେ ଏକ ବହୁ ପୁରୁଣା ପୋଖରି ମଧ୍ୟ ରହିଛି । ବିଶ୍ଵାସ ଅଛି, ଉକ୍ତ ପୋଖରିରେ ସ୍ନାନ କଲେ କୁଷ୍ଠ ରୋଗ ଏବଂ ତ୍ଵଚା ସମ୍ପର୍କିତ ରୋଗ ଭଲ ହୋଇଯାଏ ।

Argus News | argus news | Odisha Latest News, Breaking News, Trending News, Live TV