ପଶ୍ଚିମବଂଗ ସରକାରଙ୍କୁ ଝଟ୍‌କା । ପଶ୍ଚିମବଂଗରେ ହୋଇଥିବା ୨୫ ହଜାର ନିଯୁକ୍ତିକୁ ଖାରଜ କରିଦେଇଛନ୍ତି ସୁପ୍ରିମକୋର୍ଟ । ନିଯୁକ୍ତି ପ୍ରକ୍ରିୟାରେ ବ୍ୟାପକ ଅନିୟମିତତା ଓ ଜାଲିଆତି ହୋଇଥିଲା । ସମସ୍ତ ପ୍ରକ୍ରିୟାକୁ ଅଣଦେଖା କରାଯାଇ ୨୫ହଜାରରୁ ଅଧିକ ନିଯୁକ୍ତି ଦିଆଯାଇବା ସୁପ୍ରିମକୋର୍ଟଙ୍କ ଦୁଇଜଣିଆ ଖଣ୍ଡପୀଠ ରାୟ ଦେଇଛନ୍ତି । ନିଯୁକ୍ତି ପ୍ରକ୍ରିୟା ବିରୋଧରେ କିଛି ଆବେଦନକାରୀ କୋଲକାତା ହାଇକୋର୍ଟରେ ଆବେଦନ କରିଥିଲେ । ମାମଲାର ଶୁଣାଣି କରି ନିଯୁକ୍ତି ପ୍ରକ୍ରିୟାକୁ ହାଇକୋର୍ଟ ଖାରଜ କରିଥିଲେ । ଏହା ବିରୋଧରେ ପଶ୍ଚିମବଂଗ ସରକାର ସୁପ୍ରିମକୋର୍ଟଙ୍କ ଦ୍ବାରସ୍ଥ ହୋଇଥିଲେ ।

ମାମଲାର ଶୁଣାଣି କରି ପଶ୍ଚିମବଂଗ ସରକାରଙ୍କ ୨୫ ହଜାରରୁ ଅଧିକ ଶିକ୍ଷକ ଓ ଅଣଶିକ୍ଷକ ନିଯୁକ୍ତି ପ୍ରକ୍ରିୟାକୁ ଖାରଜ କରିଛନ୍ତି । ଏଥିସହ ସାନି ନିଯୁକ୍ତି ପ୍ରକ୍ରିୟାକୁ ତିନି ମାସ ମଧ୍ୟରେ ଶେଷ କରିବାକୁ ନିର୍ଦ୍ଦେଶ ଦେଇଛନ୍ତି । ଯେଉଁମାନେ ପରୀକ୍ଷାରେ ଉତ୍ତୀର୍ଣ୍ଣ ହେବେ ସେମାନେ ଦରମା ଫେରାଇବେ ନାହିଁ । କିନ୍ତୁ ଯେଉଁମାନେ ପରୀକ୍ଷାରେ ବିଫଳ ହେବେ ସେମାନେ ୨୦୧୬ ପରଠାରୁ ପାଇଥିବା ଦରମା ଫେରାଇବା ବାଧ୍ୟତାମୂଳକ । ପଶ୍ଚିମବଂଗ ସରକାରଙ୍କ ପକ୍ଷରୁ ୨୪ ହଜାର ୬୪୦ ପଦବୀ ପାଇଁ ବିଜ୍ଞପ୍ତି ପ୍ରକାଶ ପାଇଥିଲେ ମଧ୍ୟ ୨୫ ହଜାର ୭୫୩ଜଣଙ୍କୁ ନିଯୁକ୍ତି ଦିଆଯାଇଥିଲା ।