ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୁପ୍ରିମକୋର୍ଟ ପରିସରରେ ମୁଖ୍ୟ ବିଚାରପତି ବି.ଆର୍. ଗଭାଇଙ୍କ ଉପରେ ହୋଇଥିବା ଜୋତା ମାଡ଼ ଘଟଣାର ନିନ୍ଦା କରିଛନ୍ତି। ସୋମବାର ଏକ୍ସରେ ସେ ଲେଖିଛନ୍ତି, “ଏହି ଘଟଣା ପ୍ରତ୍ୟେକ ଭାରତୀୟଙ୍କୁ କ୍ଷୁବ୍ଧ କରିଛି। ଏହା ସମ୍ପୂର୍ଣ୍ଣ ନିନ୍ଦନୀୟ।”

ଘଟଣାରେ ଜଣେ ବୟସ୍କ ଓକିଲ ରାକେଶ କିଶୋର କୋର୍ଟ ଚାଲିଥିବା ବେଳେ ମୁଖ୍ୟ ବିଚାରପତିଙ୍କ ଆଡ଼କୁ ଜୋତା ଫିଙ୍ଗିଥିଲେ, ଯାହା ବେଞ୍ଚ ପାଖରେ ପହଞ୍ଚି ନଥିଲା। ସୁରକ୍ଷା କର୍ମୀ ତାଙ୍କୁ ତୁରନ୍ତ ଧରି ବାହାରକୁ ନେଇଥିଲେ। ରାକେଶ “ସନାତନ ଧର୍ମର ଅପମାନ ସହିବୁ ନାହିଁ” ବୋଲି ଚିତ୍କାର କରିଥିବା ପ୍ରତ୍ୟକ୍ଷଦର୍ଶୀ କହିଛନ୍ତି।

ଶୁଣାଣି ସମୟରେ ସୁପ୍ରିମକୋର୍ଟରେ ମୁଖ୍ୟ ବିଚାରପତିଙ୍କ ଉପରକୁ ଜୋତା ଫିଙ୍ଗିଲେ ଜଣେ ଓକିଲ

ମୁଖ୍ୟ ବିଚାରପତି ଗଭାଇ ଶାନ୍ତ ରହି କୋର୍ଟ କାର୍ଯ୍ୟ ଜାରି ରଖିଥିଲେ ଓ ରାକେଶଙ୍କୁ ଚେତାବନୀ ଦେଇ ଛାଡ଼ିବାକୁ ନିର୍ଦେଶ ଦେଇଥିଲେ। ଦିଲ୍ଲୀ ପୋଲିସ ତାଙ୍କୁ ୩ ଘଣ୍ଟା ଜେରା ପରେ ଛାଡ଼ି ଦେଇଥିଲା, କାରଣ କୌଣସି ଆନୁଷ୍ଠାନିକ ଅଭିଯୋଗ ଦାୟର ହୋଇନଥିଲା।

ବାର୍ କାଉନସିଲ୍ ଅଫ୍ ଇଣ୍ଡିଆ ରାକେଶଙ୍କୁ ତୁରନ୍ତ ନିଲମ୍ବିତ କରି କୌଣସି କୋର୍ଟରେ ଓକିଲାତି କରିବାକୁ ବାରଣ କରିଛି ଓ ୧୫ ଦିନ ମଧ୍ୟରେ କାରଣ ଦର୍ଶାଇବା ନୋଟିସ୍ ଜାରି କରିଛି। ଏହି ଘଟଣା ଗତ ମାସରେ ମଧ୍ୟପ୍ରଦେଶର ଖଜୁରାହୋରେ ବିଷ୍ଣୁ ମୂର୍ତ୍ତି ପୁନଃସ୍ଥାପନ ମାମଲାରେ ଗଭାଇଙ୍କ ମନ୍ତବ୍ୟ ପରେ ସୋସିଆଲ ମିଡିଆରେ ବିବାଦ ପରେ ଘଟିଛି।

ମୋତେ ଭଗବାନ କହିଲେ ଜୋତା ଫିଙ୍ଗିବାକୁ… ମୋ କାର୍ଯ୍ୟରେ ମୁଁ ଅନୁତପ୍ତ ନୁହେଁ” ସାମ୍ନାକୁ ଆସିଲା ଓକିଲଙ୍କ ବୟାନ

ସୂଚନା ଥାଉ କି, ସୋମବାର ସୁପ୍ରିମକୋର୍ଟରେ ଏକ ଆଶ୍ଚର୍ଯ୍ୟଜନକ ଘଟଣା ଘଟିଛି। ଶୁଣାଣି ସମୟରେ ଜଣେ ଓକିଲ ସୁପ୍ରିମକୋର୍ଟର ମୁଖ୍ୟ ବିଚାରପତି ବି.ଆର. ଗଭାଇଙ୍କ ଉପରକୁ ଜୋତା ଫିଙ୍ଗିବାକୁ ଚେଷ୍ଟା କରିଥିଲେ। ରିପୋର୍ଟ ଅନୁଯାୟୀ, ସେହି ବ୍ୟକ୍ତି କୋର୍ଟ ଭିତରେ ମଧ୍ୟ ସ୍ଲୋଗାନ ଦେଇଥିଲେ। ପରେ ସୁରକ୍ଷା କର୍ମୀମାନେ ତାଙ୍କୁ ବାହାରକୁ ନେଇଯାଇଥିଲେ, ଯାହା ଫଳରେ କିଛି ସମୟ ପାଇଁ କୋର୍ଟ କାର୍ଯ୍ୟ ବାଧାପ୍ରାପ୍ତ ହୋଇଥିଲା।

ଅଧିକ ପଢ଼ନ୍ତୁ ଭାରତ ସମ୍ପର୍କିତ ଲାଟେଷ୍ଟ ଖବର...

ଲାଇଭ ଲ ୱେବସାଇଟ ଅନୁଯାୟୀ, କୋର୍ଟରେ ଉପସ୍ଥିତ ଲୋକମାନେ ରିପୋର୍ଟ କରିଥିଲେ ଯେ ସେହି ବ୍ୟକ୍ତି ଚିତ୍କାର କରିଥିଲେ, ‘ହିନ୍ଦୁସ୍ତାନ ସନାତନ ଧର୍ମର ଅପମାନକୁ ସହ୍ୟ କରିବ ନାହିଁ।’ କେତେଜଣ ପ୍ରତ୍ୟକ୍ଷଦର୍ଶୀ ୱେବସାଇଟକୁ କହିଛନ୍ତି ଯେ ସେହି ବ୍ୟକ୍ତି ମୁଖ୍ୟ ବିଚାରପତିଙ୍କ ଉପରକୁ ଜୋତା ଫିଙ୍ଗିବାକୁ ଚେଷ୍ଟା କରିଥିଲେ, ଯେତେବେଳେ ଅନ୍ୟମାନେ କହିଛନ୍ତି ଯେ ମୁଖ୍ୟ ବିଚାରପତିଙ୍କ ଉପରକୁ କାଗଜର ଏକ ରୋଲ ଫିଙ୍ଗାଯାଇଥିଲା। ଏହା ମଧ୍ୟ ଦାବି କରାଯାଇଛି ଯେ ସେହି ବ୍ୟକ୍ତି ଜଣେ ଓକିଲଙ୍କ ପୋଷାକ ପିନ୍ଧିଥିଲେ।

ଅନ୍ୟପକ୍ଷରେ, ଆଇନଗତ ୱେବସାଇଟ ବାର ଆଣ୍ଡ ବେଞ୍ଚ, ସୂତ୍ରକୁ ଉଦ୍ଧୃତ କରି ଦାବି କରିଛି ଯେ ଯେତେବେଳେ ମୁଖ୍ୟ ବିଚାରପତିଙ୍କ ନେତୃତ୍ୱରେ ଖଣ୍ଡପୀଠ ମାମଲା ବିଷୟରେ ଓକିଲମାନଙ୍କଠାରୁ ଶୁଣାଣି କରୁଥିଲେ, ଜଣେ ଓକିଲ ଆଗକୁ ଦୌଡ଼ି ମୁଖ୍ୟ ବିଚାରପତିଙ୍କୁ ଆକ୍ରମଣ କରିବା ପାଇଁ ତାଙ୍କ ପାଦରୁ ଜୋତା କାଢ଼ିବାକୁ ଚେଷ୍ଟା କରିଥିଲେ। ତଥାପି, ତାଙ୍କୁ ସୁରକ୍ଷା କର୍ମୀମାନେ ତୁରନ୍ତ ଧରି କୋର୍ଟରୁ ବାହାରକୁ ନେଇଯାଇଥିଲେ।