Workplace Dispute / ଅଫିସରେ ଶୋଇବା ଅଭିଯୋଗରେ ମହିଳା ନିର୍ଦ୍ଦେଶିକାଙ୍କୁ ବିଦା, କମ୍ପାନୀକୁ ପଡ଼ିଲା ମହଙ୍ଗା

Key Points
‘ଅତ୍ୟନ୍ତ ଅଳସୁଆ’ କହି ଚାକିରିରୁ ବିଦା, କମ୍ପାନୀକୁ ଟ୍ରିବ୍ୟୁନାଲର ଝଟକା
ଡେସ୍କରେ ଶୋଇବା ଅଭିଯୋଗରେ ବରଖାସ୍ତ, ମହିଳା ନିର୍ଦ୍ଦେଶିକାଙ୍କ ସପକ୍ଷରେ ରାୟ
ମହିଳା ନିର୍ଦ୍ଦେଶିକାଙ୍କୁ ଅନ୍ୟାୟ ବରଖାସ୍ତ, କମ୍ପାନୀ ଦେବ ୪,୩୩୩ ପାଉଣ୍ଡ
ଅଫିସରେ ଡେସ୍କ ଉପରେ ଶୋଇବା, ନିର୍ଦ୍ଧାରିତ ସମୟ ପୂର୍ବରୁ ଘରକୁ ଚାଲିଯିବା ଏବଂ କାମ ସାରିବାରେ ଅଧିକ ସମୟ ନେବା । ଏଭଳି ଅଭିଯୋଗ ଆଣି ଜଣେ ମହିଳା ନିର୍ଦ୍ଦେଶିକାଙ୍କୁ ‘ଅତ୍ୟନ୍ତ ଅଳସୁଆ’ ବୋଲି କହିଥିଲେ ସହକର୍ମୀ ନିର୍ଦ୍ଦେଶକ । ଶେଷରେ ତାଙ୍କୁ କମ୍ପାନୀରୁ ବିଦା କରାଯାଇଥିଲା । ହେଲେ ମାମଲା ପହଞ୍ଚିଥିଲା ରୋଜଗାର ଟ୍ରିବ୍ୟୁନାଲରେ । ଏବେ ଲଣ୍ଡନ ସାଉଥ୍ ଏମ୍ପ୍ଲୟମେଣ୍ଟ ଟ୍ରିବ୍ୟୁନାଲ କମ୍ପାନୀର ଏହି ପଦକ୍ଷେପକୁ ଅନୁଚିତ ବୋଲି ଦର୍ଶାଇଛନ୍ତି । ଏଥିସହ ମହିଳାଙ୍କୁ ବକେୟା ଦରମା ଓ ଅନ୍ୟାନ୍ୟ ଆର୍ଥିକ ପ୍ରାପ୍ୟ ଦେବାକୁ କମ୍ପାନୀକୁ ନିର୍ଦ୍ଦେଶ ଦେଇଛନ୍ତି ।
ଡାକ୍ତରରୁ ଏଆଇ କମ୍ପାନୀର ନିର୍ଦ୍ଦେଶିକା
ଏହି ମାମଲା ୪୬ ବର୍ଷୀୟ ଡା. ଡାନ୍ ଲୁଓଙ୍କ ସହ ଜଡ଼ିତ । ସେ ପୂର୍ବରୁ ଚୀନ୍ରେ ଡାକ୍ତର ଭାବେ କାମ କରୁଥିଲେ । ୨୦୨୦ ମସିହାରେ ସେ ବ୍ରିଟେନ ଆସିଥିଲେ ଏବଂ ସେହି ବର୍ଷ ଅକ୍ଟୋବରରେ ବ୍ଲୁ ଷ୍ଟ୍ରବେରୀ ଏଆଇ କମ୍ପାନୀରେ ଯୋଗ ଦେଇଥିଲେ । ଏହି କମ୍ପାନୀ ପୂର୍ବରୁ କ୍ୟାଣ୍ଟରବେରୀ ଏଆଇ ନାମରେ ପରିଚିତ ଥିଲା । ଏହା ମିଡିଆ ମ୍ୟାନେଜମେଣ୍ଟ ଓ ମାର୍କେଟିଂ କ୍ଷେତ୍ରରେ କାମ କରେ ।
ଲୁଓ କମ୍ପାନୀରେ ବଡ଼ ଧରଣର ନିବେଶ ମଧ୍ୟ କରିଥିଲେ । ସେ ଏକାଧାରରେ କମ୍ପାନୀର ଶେୟାରହୋଲ୍ଡର, ନିର୍ଦ୍ଦେଶିକା ଏବଂ କର୍ମଚାରୀ ଥିଲେ । ଟ୍ରିବ୍ୟୁନାଲଙ୍କ କହିବା ଅନୁଯାୟୀ, ଲୁଓଙ୍କ ପୂର୍ବରୁ କୌଣସି ବ୍ୟବସାୟିକ ଅଭିଜ୍ଞତା ନଥିବା କଥା କମ୍ପାନୀ ଜାଣିଥିଲା ।
‘ଅତ୍ୟନ୍ତ ଅଳସୁଆ ମହିଳା’ ବୋଲି କହିଥିଲେ ନିର୍ଦ୍ଦେଶକ
୨୦୨୨ ଫେବୃଆରୀରେ କମ୍ପାନୀର ଅନ୍ୟ ଜଣେ ନିର୍ଦ୍ଦେଶକ ୱେସଲି ବେକର ଲୁଓଙ୍କ କାର୍ଯ୍ୟଦକ୍ଷତା ଉପରେ ପ୍ରଶ୍ନ ଉଠାଇଥିଲେ । ଏହାର କିଛି ଦିନ ପରେ ସେ କମ୍ପାନୀରେ ନିବେଶ କରିଥିବା ସଂସ୍ଥାକୁ ଏକ ଇମେଲ୍ ପଠାଇଥିଲେ । ସେଥିରେ ଲୁଓଙ୍କ କାର୍ଯ୍ୟଶୈଳୀ ଓ କାମ ପ୍ରତି ତାଙ୍କର ଆଗ୍ରହକୁ ସମାଲୋଚନା କରିବା ସହ ତାଙ୍କୁ ‘ଅତ୍ୟନ୍ତ ଅଳସୁଆ ମହିଳା’ ବୋଲି କହିଥିଲେ ।
ଏପରିକି ତାଙ୍କ କାମ ଜଣେ ସ୍କୁଲ ଛାଡ଼ିଥିବା ଛାତ୍ରଙ୍କ ସ୍ତରର ବୋଲି ମଧ୍ୟ ଅଭିଯୋଗ କରିଥିଲେ । ତାଙ୍କ ଯୋଗୁଁ କମ୍ପାନୀକୁ ବହୁତ କ୍ଷତି ହେଉଥିବା ବେକର ଦାବି କରିଥିଲେ । ତେବେ ଏସବୁ ବେକରଙ୍କ ବ୍ୟକ୍ତିଗତ ଅଭିଯୋଗ ଥିଲା, ଟ୍ରିବ୍ୟୁନାଲ ଏହାକୁ ପ୍ରମାଣିତ ତଥ୍ୟ ବୋଲି କହିନାହାନ୍ତି ।
ଡେସ୍କ ଉପରେ ଶୋଇବାର ମଧ୍ୟ ଅଭିଯୋଗ
୨୦୨୨ ଜୁଲାଇରେ ବେକର ଲୁଓଙ୍କୁ ସିଧାସଳଖ ଏକ ଇମେଲ୍ ପଠାଇଥିଲେ । ଏଥିରେ ସେ ଲୁଓଙ୍କୁ ଅଫିସରେ ଡେସ୍କ ଉପରେ ଶୋଇଥିବା ଦେଖିଥିବା ଅଭିଯୋଗ କରିଥିଲେ । ଏହା ବ୍ୟତୀତ ସେ ବାରମ୍ବାର ଅଫିସରୁ ଶୀଘ୍ର ଘରକୁ ଚାଲିଯାଉଥିବା ଏବଂ କାମ ସାରିବାକୁ ଅଧିକ ସମୟ ନେଉଥିବା ମଧ୍ୟ କହିଥିଲେ ।
ଜଣେ ପେସାଦାର ନିର୍ଦ୍ଦେଶିକାଙ୍କ ଭଳି ନିଜକୁ ସମ୍ଭାଳି କାମ କରିବାକୁ ସେ ଲୁଓଙ୍କୁ ପରାମର୍ଶ ଦେଇଥିଲେ । ଏହାର ଜବାବରେ ଲୁଓ ଏହି ମନ୍ତବ୍ୟଗୁଡ଼ିକୁ ବ୍ୟକ୍ତିଗତ ଆକ୍ରମଣ ବୋଲି କହିଥିଲେ । ଏହାପରେ ବେକର ତାଙ୍କ ସହ ଆଉ କାମ କରିବେ ନାହିଁ ବୋଲି ସ୍ପଷ୍ଟ କରିଦେଇଥିଲେ ।
ଅନୁପସ୍ଥିତିରେ ହେଲା ବୈଠକ, ପରେ ଚାକିରି ହରାଇଲେ
୨୦୨୨ ସେପ୍ଟେମ୍ବରରେ ଲୁଓଙ୍କ ଅନୁପସ୍ଥିତିରେ କମ୍ପାନୀର ଏକ ବୈଠକ ହୋଇଥିଲା । ତାଙ୍କୁ କୁହାଯାଇଥିଲା ଯେ, ତାଙ୍କ ଓ ଅନ୍ୟ ନିର୍ଦ୍ଦେଶକଙ୍କ ମଧ୍ୟରେ ସମ୍ପର୍କ ଖରାପ ହୋଇଯାଇଛି ଏବଂ ତାଙ୍କୁ ବୋର୍ଡ ନିର୍ଦ୍ଦେଶକ ପଦରୁ ହଟାଯିବ । ତେବେ ସେହି ସମୟରେ ଆଇନଗତ ଭାବେ ସେ କମ୍ପାନୀର ନିର୍ଦ୍ଦେଶିକା ରହିଥିଲେ । ୨୦୨୩ ଏପ୍ରିଲରେ ଲୁଓ ଦେଖିବାକୁ ପାଇଥିଲେ ଯେ, କମ୍ପାନୀ ତାଙ୍କ ନିର୍ଦ୍ଦେଶକ ପଦ ଶେଷ ହୋଇଥିବା ସମ୍ପର୍କିତ ଏକ ଫର୍ମ କମ୍ପାନୀଜ୍ ହାଉସ୍ରେ ଅପଲୋଡ୍ କରିଛି । ଏଥିରୁ ସେ ତାଙ୍କ ଚାକିରି ମଧ୍ୟ ଶେଷ ହୋଇଯାଇଥିବା ଭାବିଥିଲେ ।
ଟ୍ରିବ୍ୟୁନାଲ କହିଲେ, ‘ଲିମ୍ବୋ’ ସ୍ଥିତିରେ ରଖିଥିଲା କମ୍ପାନୀ
ଲଣ୍ଡନ ସାଉଥ୍ ଏମ୍ପ୍ଲୟମେଣ୍ଟ ଟ୍ରିବ୍ୟୁନାଲରେ ଏହି ମାମଲାର ଶୁଣାଣି କରି ଏମ୍ପ୍ଲୟମେଣ୍ଟ ଜଜ୍ ଜେମା କାଉଥ୍ରେ କହିଥିଲେ ଯେ, କମ୍ପାନୀ ଲୁଓଙ୍କ କାର୍ଯ୍ୟଦକ୍ଷତା ସମ୍ପର୍କିତ ଅଭିଯୋଗଗୁଡ଼ିକୁ ଠିକ୍ ଭାବେ ସମାଧାନ କରିବାକୁ ଆବଶ୍ୟକ ପଦକ୍ଷେପ ନେଇନଥିଲା । ଏଥିସହ ଲୁଓ ଓ ବେକରଙ୍କ ମଧ୍ୟରେ ଉପୁଜିଥିବା ବିବାଦର ସମାଧାନ ପାଇଁ ମଧ୍ୟ ଗମ୍ଭୀର ଉଦ୍ୟମ କରାଯାଇନଥିଲା ।
ଜଜ୍ କହିଥିଲେ ଯେ, କମ୍ପାନୀ ଲୁଓଙ୍କୁ ଏକ ପ୍ରକାର ‘ଲିମ୍ବୋ’ ବା ଅନିଶ୍ଚିତ ସ୍ଥିତିରେ ରଖିଥିଲା । ତାଙ୍କୁ କମ୍ପାନୀରୁ ଦୂରେଇ ରଖିବା, ଦରମା ନଦେବା ଏବଂ ତାଙ୍କ ଓକିଲଙ୍କ ଚିଠିର ଉପଯୁକ୍ତ ଉତ୍ତର ନଦେବା ଭଳି ଘଟଣାକୁ ଏକାଠି ବିଚାର କଲେ, ୨୦୨୩ ଏପ୍ରିଲ ସୁଦ୍ଧା କମ୍ପାନୀ ତାଙ୍କ ଚାକିରି ସମ୍ପର୍କ ଶେଷ କରିବାକୁ ଚାହୁଁଥିବା ସ୍ପଷ୍ଟ ହୋଇଥିଲା । ତେଣୁ ଟ୍ରିବ୍ୟୁନାଲ ଲୁଓଙ୍କ ଅନ୍ୟାୟ ବରଖାସ୍ତ ସମ୍ପର୍କିତ ଅଭିଯୋଗକୁ ଗ୍ରହଣ କରିଥିଲେ ।
୪,୩୩୩ ପାଉଣ୍ଡ ଦରମା ଦେବ କମ୍ପାନୀ
ଏହି ମାମଲାରେ ଟ୍ରିବ୍ୟୁନାଲ କମ୍ପାନୀକୁ ଚୁକ୍ତି ଉଲ୍ଲଂଘନ ପାଇଁ ମଧ୍ୟ ଦାୟୀ କରିଛନ୍ତି । କମ୍ପାନୀ ଲୁଓଙ୍କୁ ନୋଟିସ୍ ପେମେଣ୍ଟ ଦେଇନଥିଲା । ଏଥିସହ ତାଙ୍କ ଦରମାରୁ ବିନା ଅନୁମତିରେ ୪,୩୩୩ ପାଉଣ୍ଡ କାଟି ଦିଆଯାଇଥିଲା । ତେଣୁ ଏହି ଟଙ୍କା ପ୍ରଦାନ କରିବାକୁ କମ୍ପାନୀକୁ କୁହାଯାଇଛି । ତେବେ ଅନ୍ୟାୟ ବରଖାସ୍ତ ପାଇଁ ଲୁଓଙ୍କୁ କେତେ ଅତିରିକ୍ତ କ୍ଷତିପୂରଣ ମିଳିବ, ସେନେଇ ନିଷ୍ପତ୍ତି ଏପର୍ଯ୍ୟନ୍ତ ହୋଇନାହିଁ ।
ଏହି ମାମଲାର ସବୁଠାରୁ ଗୁରୁତ୍ୱପୂର୍ଣ୍ଣ ଦିଗ ହେଉଛି, ଟ୍ରିବ୍ୟୁନାଲ ଲୁଓଙ୍କ ଉପରେ ଲାଗିଥିବା ‘ଅଳସୁଆ’ କିମ୍ବା ‘ଡେସ୍କ ଉପରେ ଶୋଇବା’ ଅଭିଯୋଗକୁ ସତ କି ମିଛ ବୋଲି ରାୟ ଦେଇନାହାନ୍ତି । ବରଂ ତାଙ୍କୁ ଚାକିରିରୁ ବିଦା କରିବା ସମୟରେ କମ୍ପାନୀ ଆଇନ ଅନୁଯାୟୀ ଉଚିତ୍ ପ୍ରକ୍ରିୟା ଅନୁସରଣ କରିନଥିବାରୁ ଏହି ରାୟ ଦିଆଯାଇଛି।
📱 Get Argus News App
✨Related Topics
Explore more stories