ସାପ କାମୁଡାରେ ୪୭ ଜଣ ଲୋକଙ୍କୁ '୨୭୯'ଥର ମାରି ଲୁଟିନେଲେ ୧୧ କୋଟି ୨୬ ଲକ୍ଷ

ଜଣେ ବ୍ୟକ୍ତିକୁ ଥରେ ସାପ କାମୁଡିଲା । ତାକୁ ମୃତ ବୋଲି ଘୋଷଣା କରାଗଲା । ପୁଣି ସେ ବଞ୍ଚିଲା । ଆଉ ପୁଣି ତାକୁ ସାପ କାମୁଡିଲା ଆଉ ସେ ମରିଗଲା । ଏପରି ଥରେ ଦୁଇଥର ନୁହେଁ ୨୮ ଥର ମରିଥିବା ଘୋଷଣା କରାଗଲା । ସେହିପରି ଆଉ ଜଣେ ବ୍ୟକ୍ତିକୁ ମଧ୍ୟ ୨୯ ଥର ସାପ ଦଂଶିଥିବା ଆଉ ସବୁ ଥର ମରିକି ପୁଣି ଜୀବିତ ହେଉଥିବା କଥା ସାମ୍ନାକୁ ଆସିଥିଲା । ଆପଣ ମାନେ ଭାବୁଥିବେ, ଏମିତି ଅଦ୍ଭୁତ ଖବର ସମ୍ଭବ କେମିତି ? ହଁ, ଆଜ୍ଞା ସମ୍ଭବ, ଆଉ ତାହା କେବଳ କାଗଜରେ । ଜଣେ ବ୍ୟକ୍ତିକୁ ବାରମ୍ବାର ମୃତ ଦେଖାଇ ପାଖାପାଖି ୧୧ କୋଟି ଟଙ୍କା ଲୁଟି ନେଇଛନ୍ତି ସେହି ବ୍ୟକ୍ତିଙ୍କ ପରିବାର ଲୋକେ । ଏପରି ଘଟଣା ଦେଖିବାକୁ ମିଳିଛି ମଧ୍ୟପ୍ରଦେଶ ରାଜ୍ୟରେ ।
୪୭ ଜଣ ଲୋକଙ୍କୁ ୨୭୯ ଥର ମୃତ୍ୟୁ ଦିଆଯାଇଛି । କାରଣ ସରକାରଙ୍କ ତରଫରୁ ଏପରି ମୃତ୍ୟୁ ପାଇଁ ବିପର୍ଯ୍ୟୟ ପାଇଁ ୪ ଲକ୍ଷ ଟଙ୍କା ରିଲିଫ ପାଣ୍ଠି ଦେବାର ବ୍ୟବସ୍ଥା ରହିଛି । ସେଥିପାଇଁ ବାରମ୍ବାର ଲୋକଙ୍କୁ ମାରିବା ପ୍ରମାଣ ଦେଇ ପରିବାର ଲୋକେ ପାଖାପାଖି ୧୧ କୋଟି ୨୬ ଲକ୍ଷ ଟଙ୍କା ଲୁଟି ନେଇଛନ୍ତି । ଏପରି ଘୋଟାଲାରେ ଲୋକ କେବଳ ସାପ କାମୁଡା ନୁହେଁ, ବରି ପାଣିରେ ବୁଡି ମରିବା, ଘଡଘଡିରେ ମରିବା ନେଇ ଲୋକଙ୍କୁ ମୃତ ବୋଲି ଘୋଷଣା କରିଛନ୍ତି । ୨୦୨୨ରେ ରାଜସ୍ଵ ବିଭାଗର ଅଡିଟ୍‌ରେ ଜଣା ପଡିଥିଲା , ସିବନିର କେଓଲାରୀ ଅଞ୍ଚଳର ତହସିଲ କାର୍ଯ୍ୟଳୟର କ୍ଲର୍କ ସଚିନ ଦହାୟତ ୨୭୯ ଜଣ ଲୋକଙ୍କୁ ସାପ କାମୁଡା, ପାଣିରେ ବୁଡି ମରିବା, ବିଜୁଳି ଦ୍ଵାରା ମୃତ୍ୟୁ ହୋଇଥିବା ଦେଖାଇ ସମସ୍ତଙ୍କ ନାଁରେ ୪ ଲକ୍ଷ ଟଙ୍କା ସହାୟତା ରାଶି ଯୋଗାଇଛନ୍ତି ।

୨୭୯ ଜଣଙ୍କ ମୃତ୍ୟୁର ୧୧ କୋଟି ୨୬ ଲକ୍ଷ ଟଙ୍କା ମାତ୍ର ୪୭ଜଣଙ୍କ ଆକାଉଣ୍ଟକୁ ଯାଇଛି । ସେମାନଙ୍କ ମଧ୍ୟରୁ ଅଧିକାଂଶ ଏବେ ଯାଏଁ ଜୀବିତ ଥିବା ବେଳେ ଅଧିକାଂଶଙ୍କର ମୃତ କି ଜୀବିତ ନେଇ କୌଣସି ପ୍ରମାଣ ପତ୍ର ମିଳିପାରିନାହିଁ । ଏହି ମାମଲାରେ ମୁଖ୍ୟ ଆରୋପୀ କ୍ଲର୍କକୁ ବାହାର କରି ଦିଆଯାଇଛି । ଏଥିସହ ଯେଉଁମାନଙ୍କ ଆକାଉଣ୍ଟକୁ ଟଙ୍କା ଆସିଛି , ସେମାନଙ୍କ ନାଁରେ ମଧ୍ୟ FIR ଦାଖଲ କରାଯାଇଛି ।