Crime News / ସୁନା ଲୋଭରେ ସଇତାନ ଶାଶୁଙ୍କୁ ମାରିଦେଲା ଜ୍ୱାଇଁ ଆଉ ତା'ପରେ...

ଆନ୍ଧ୍ରପ୍ରଦେଶରେ ସୁନା ଗହଣା ପାଇଁ ଏମିତି ଏକ ଭୟଙ୍କର ଷଡ଼ଯନ୍ତ୍ର ରଚାଯାଇଥିଲା, ଯାହାର ଶିକାର ହେଲେ ଜଣେ ନିଜ ଶାଶୁ! ଟଙ୍କା ଓ ଅୟ୍ୟାଶୀର ନିଶାରେ ଅନ୍ଧ ହୋଇ ଜ୍ୱାଇଁ ନିଜ ପ୍ରେମିକା ସହ ମିଶି ଶାଶୁଙ୍କୁ ତକିଆରେ ମୁହଁ ଚାପି ହତ୍ୟା କରିବା ପରେ ସୁନା ଗହଣା ଲୁଟି ଫେରାର ହୋଇଥିଲା । କିନ୍ତୁ ଗହଣା ବିକ୍ରି କରିବା ପୂର୍ବରୁ ପୁଲିସ ଜାଲରେ ଫସିଗଲେ ଉଭୟ ଅଭିଯୁକ୍ତ ।

ଆନ୍ଧ୍ରପ୍ରଦେଶର ପ୍ରକାଶମ ଜିଲ୍ଲା ଚିମାକୁର୍ଥି ମଣ୍ଡଳର ଗଙ୍ଗାଭରମ ରୋଡ୍‌ରୁ ଏକ ଚାଞ୍ଚଲ୍ୟକର ହତ୍ୟାକାଣ୍ଡ ସାମ୍ନାକୁ ଆସିଛି । ଟଙ୍କା ଓ ସୁନା ଗହଣା ଲୋଭରେ ଜଣେ ଜ୍ୱାଇଁ ନିଜ ଶାଶୁଙ୍କୁ ହତ୍ୟା କରିଥିବା ଅଭିଯୋଗ ହୋଇଛି । ଏହି ଘଟଣାରେ ପୋଲିସ ଅଭିଯୁକ୍ତ ଜ୍ୱାଇଁ ଶେଖ ମସ୍ତାନୱାଲି ଓ ତାଙ୍କ ପ୍ରେମିକା କୁମାରୀଙ୍କୁ ଗିରଫ କରିଛି ।

ସୂଚନା ଅନୁସାରେ, ଅଗଷ୍ଟ ୨୧ ତାରିଖ ସନ୍ଧ୍ୟାରେ ଶେଖ ମୀରାବୀ ଘରେ ଏକୁଟିଆ ଥିଲେ। ତାଙ୍କ ସ୍ୱାମୀ ଶେଖ ମିରାୱାଲି କାମରେ ବାହାରକୁ ଯାଇଥିଲେ । ଏହାର ସୁଯୋଗ ନେଇ ମସ୍ତାନୱାଲି ଓ କୁମାରୀ ଘରେ ପ୍ରବେଶ କରି ମୀରାବୀଙ୍କ ଉପରେ ଆକ୍ରମଣ କରିଥିଲେ । ପରେ ତକିଆରେ ମୁହଁ ଚାପି ତାଙ୍କୁ ହତ୍ୟା କରିଥିବା ଅଭିଯୋଗ ହୋଇଛି ।

ହତ୍ୟା ପରେ ଅଭିଯୁକ୍ତମାନେ ମୀରାବୀଙ୍କ କାନରୁ ଦୁଇଟି ସୁନା କାନ ଫୁଲ ଓ ବେକରୁ ସୁନା ଚେନ୍ ନେଇ ଫେରାର ହୋଇଯାଇଥିଲେ । ସ୍ୱାମୀ ଘରକୁ ଫେରି ମୀରାବୀଙ୍କ ମୃତଦେହ ଦେଖିବା ପରେ ପୋଲିସରେ ଅଭିଯୋଗ କରିଥିଲେ ।

ପୋଲିସ ତଦନ୍ତରୁ ଜଣାପଡ଼ିଥିବା ଅନୁସାରେ, ମସ୍ତାନୱାଲି ଓ କୁମାରୀଙ୍କୁ ଅୟ୍ୟାଶୀ ଓ ପାର୍ଟି କରିବାର ଅଭ୍ୟାସ ଥିଲା । ଟଙ୍କାର ଆବଶ୍ୟକତା ଯୋଗୁଁ ମସ୍ତାନୱାଲି ନିଜ ଶାଶୁଙ୍କୁ ସୁନା ଗହଣା ବନ୍ଧକ ରଖିବାକୁ କହିଥିଲେ । ମୀରାବୀ ଏଥିରେ ରାଜି ନ ହେବାରୁ ଦୁହେଁ ମିଶି ହତ୍ୟାର ଯୋଜନା କରିଥିବା ପୋଲିସ କହିଛି ।

ଚୋରି କରିଥିବା ସୁନା ଗହଣା ବିକ୍ରି କରିବାକୁ ଯାଉଥିବା ବେଳେ ଏର୍ରାଗୁଡିପାଡୁ ବାଇପାସ ନିକଟରେ ପୁଲିସ ଉଭୟଙ୍କୁ କାବୁ କରିଥିଲା । ସେମାନଙ୍କ ନିକଟରୁ ମୃତକଙ୍କ ସୁନା ଗହଣା ମଧ୍ୟ ଜବତ କରାଯାଇଛି । ପରେ ଉଭୟଙ୍କୁ କୋର୍ଟରେ ହାଜର କରାଯାଇ ଜେଲ୍ ପଠାଯାଇଛି ।