Spy Arrested / ଗୁପ୍ତଚର ଗିରଫ: ଦୋକାନରେ CCTV କ୍ୟାମେରା ଲଗାଇ ପଠାଉଥିଲା ଲାଇଭ ଫିଡ୍ !

ଲୁଧିଆନା,୨୮/୦୮: ପଞ୍ଜାବରୁ ସାମ୍ନାକୁ ଆସିଛି ଏକ ସାଙ୍ଘାତିକ ଘଟଣା। ଜଣେ ଗୁପ୍ତଚରକୁ ଗିରଫ କରିଛି ପୋଲିସ। ଗୁପ୍ତଚର ରଚପାଲ ସିଂହ ଦୋକାନରେ CCTV କ୍ୟାମେରା ଲଗାଇ ଏହା ମାଧ୍ୟମରେ ସମ୍ବେଦନଶୀଳ ଅଞ୍ଚଳ ଉପରେ ନଜର ରଖିବା ସହ ଏହାର ଲାଇଭ୍ ଫିଡ୍ ପାକିସ୍ତାନକୁ ପଠାଯାଉଥିବା ଅଭିଯୋଗ ହୋଇଛି। ଏହି ଘଟଣାରେ ଲୁଧିଆନା ପୋଲିସ ରଚପାଲ ସିଂହକୁ ଗିରଫ କରିବା ସହ ତଦନ୍ତ ଜୋରଦାର କରିଛି। ଗିରଫ ଅଭିଯୁକ୍ତ ରଚପାଲ ସିଂହ ଗୁରଦାସପୁର ଜିଲ୍ଲାର ଫତେଗଡ଼ ଚୁରିଆନ ଅଞ୍ଚଳର।

ଗୁପ୍ତ ସୂଚନା ପରେ ପୋଲିସର ଚଢ଼ାଉ

ପୋଲିସର ସୂଚନା ଅନୁଯାୟୀ, ସବ୍-ଇନ୍ସପେକ୍ଟର ଅର୍ଶଦୀପ ସିଂହଙ୍କ ନେତୃତ୍ୱରେ ଏକ ପୋଲିସ ଟିମ୍ ଅଞ୍ଚଳରେ ପାଟ୍ରୋଲିଂ କରୁଥିଲା। ଏହି ସମୟରେ ନ୍ୟୁ ସୁନ୍ଦର ନଗରର ମେଡିସିଟି ହସ୍ପିଟାଲ ସମ୍ମୁଖରେ ଥିବା ଏକ ଦୋକାନ ବାହାରେ ସନ୍ଦେହଜନକ ଭାବେ ଅତ୍ୟାଧୁନିକ CCTV କ୍ୟାମେରା ଲାଗିଥିବା ନେଇ ପୋଲିସକୁ ସୂଚନା ମିଳିଥିଲା।

ସୂଚନା ମିଳିବା ପରେ ପୋଲିସ ଘଟଣାସ୍ଥଳରେ ପହଞ୍ଚି ଯାଞ୍ଚ କରିଥିଲା। ପ୍ରାଥମିକ ତଦନ୍ତରେ କ୍ୟାମେରାଗୁଡ଼ିକୁ ଦୂରରୁ ଡିଜିଟାଲ୍ ଭାବେ ନିୟନ୍ତ୍ରଣ କରାଯାଉଥିବା ନେଇ ସନ୍ଦେହ ପ୍ରକାଶ ପାଇଛି। ଏହାର ପଛରେ ପାକିସ୍ତାନରେ ଥିବା କିଛି ସନ୍ଦିଗ୍ଧ ଅପରେଟରଙ୍କ ଭୂମିକା ଥାଇପାରେ ବୋଲି ପୋଲିସ ଅନୁମାନ କରୁଛି।

ଆର୍ମି କ୍ୟାମ୍ପ ଉପରେ ନଜର ଥିଲା କି?
ତଦନ୍ତକାରୀଙ୍କ ସନ୍ଦେହ ଆହୁରି ଗମ୍ଭୀର ହୋଇଛି। ପୋଲିସ ଆଶଙ୍କା କରୁଛି ଯେ, ଏହି CCTV ନେଟୱାର୍କ ମାଧ୍ୟମରେ ଫିରୋଜପୁର ରୋଡ୍ ସମେତ ଆଖପାଖ ଅଞ୍ଚଳର ଗତିବିଧି ଉପରେ ନଜର ରଖାଯାଉଥିଲା। ବିଶେଷ କରି ବଡ଼ଦୋୱାଲ୍ ଆର୍ମି କ୍ୟାମ୍ପ ଏବଂ ଅନ୍ୟାନ୍ୟ ସମ୍ବେଦନଶୀଳ ସ୍ଥାନର ଗତିବିଧି ରେକର୍ଡ କରାଯାଉଥିଲା କି ନାହିଁ, ସେନେଇ ତଦନ୍ତ ଚାଲିଛି। ସେହିପରି ସାଧାରଣ ଲୋକଙ୍କ ଯାତାୟାତ ଓ ଅନ୍ୟାନ୍ୟ ସୂଚନା ମଧ୍ୟ ଏହି କ୍ୟାମେରା ମାଧ୍ୟମରେ ସଂଗ୍ରହ କରାଯାଉଥିଲା କି ନାହିଁ, ତାହାର ଖୋଳତାଡ଼ କରାଯାଉଛି। ତେବେ ଲାଇଭ୍ CCTV ଫିଡ୍ ପ୍ରକୃତରେ କିଏ ଆକ୍ସେସ୍ କରୁଥିଲା ଏବଂ ଏହି ଭିଡିଓ ଫିଡ୍ କେଉଁ ଉଦ୍ଦେଶ୍ୟରେ ବ୍ୟବହାର ହେଉଥିଲା, ତାହା ତଦନ୍ତ ଶେଷ ହେବା ପରେ ସ୍ପଷ୍ଟ ହେବ।

ପଢନ୍ତୁ ଏହି ଖବର: ବାର୍‌ରେ ଗୀତ ଗାଉଥିବା ଝିଅକୁ ହୋଟେଲକୁ ଆଣି ନିର୍ଯାତନା

ବିଦେଶୀ ସମ୍ପର୍କର ଖୋଳତାଡ଼

ରଚପାଲ ସିଂହଙ୍କୁ ଗିରଫ କରିବା ପରେ ପୋଲିସ ତାଙ୍କୁ ପଚରାଉଚରା କରୁଛି। ତାଙ୍କ ମୋବାଇଲ୍ ଫୋନ୍, ଡିଜିଟାଲ୍ ଡିଭାଇସ୍, ଯୋଗାଯୋଗ ଓ CCTVର ବୈଷୟିକ ସେଟଅପ୍ ସମ୍ପର୍କରେ ତଥ୍ୟ ଯାଞ୍ଚ କରାଯାଉଛି। ବିଦେଶରେ ଥିବା ସନ୍ଦିଗ୍ଧ ଅପରେଟରଙ୍କ ସହ ଅଭିଯୁକ୍ତଙ୍କ କୌଣସି ଯୋଗାଯୋଗ ଥିଲା କି ନାହିଁ, ସେନେଇ ମଧ୍ୟ ତଦନ୍ତ ହେଉଛି। ଏହାସହ ତାଙ୍କୁ କୌଣସି ଆର୍ଥିକ ସହାୟତା ମିଳୁଥିଲା କି ନାହିଁ ଏବଂ ଏହି ନେଟୱାର୍କରେ ଆଉ କେତେଜଣ ବ୍ୟକ୍ତି ସାମିଲ ଅଛନ୍ତି, ସେଥିପାଇଁ ପୋଲିସ ବିଭିନ୍ନ ଦିଗରୁ ତଦନ୍ତ ଜାରି ରଖିଛି।

ଏହି ମାମଲାରେ CCTV କ୍ୟାମେରାର ଟେକ୍ନିକାଲ୍ ସେଟଅପ୍, ଡାଟା ଟ୍ରାନ୍ସଫର୍ ଏବଂ ଡିଜିଟାଲ୍ ଆକ୍ସେସ୍ ସମ୍ପର୍କିତ ତଥ୍ୟକୁ ଯାଞ୍ଚ କରାଯାଉଥିବାରୁ ଆଗାମୀ ଦିନରେ ଏହି ମାମଲାରେ ଆହୁରି ବଡ଼ ଖୁଲାସା ହୋଇପାରେ।