ଜାଗର ବା ମହାଶିବରାତ୍ରୀକୁ ନେଇ ସମସ୍ତେ ଚଳ ଚଞ୍ଚଳ । ଶିବରାତ୍ରୀକୁ ଦିବ୍ୟ ଓ ଭବ୍ୟ କରିବା ଲାଗି ଆୟୋଜନ ଭିତରେ ବିବାଦ ସୃଷ୍ଟି ହୋଇଛି । ଧ୍ଵଜା ବା ପତାକା ଓ ମାଇକ୍ ଲଗାଇବାକୁ ଯାଇ ୨ ଗୋଷ୍ଠୀ ମୁହାଁମୁହିଁ ହୋଇଥିବା ବେଳେ ପଥରମାଡ଼ ବି ହୋଇଛି । ଏଭଳି ଘଟଣା ଦେଖିବାକୁ ମିଳିଛି ଝାଡ଼ଖଣ୍ଡର ହଜାରିବାଗରେ ।

ଶିବରାତ୍ରୀ ଲାଗି ପତାକା ବାନ୍ଧିବା ଏବଂ ମାଇକ୍ ଲଗାଇବାକୁ ନେଇ ୨ ଗୋଷ୍ଠୀ ମଧ୍ୟରେ ବିବାଦ ତୀବ୍ର ରୂପ ନେଇଛି । ପରସ୍ପର ଉପରକୁ ଢେଲା ମାଡ଼ ସହ ନିଆଁ ଲଗାଇ ଦେଇଛନ୍ତି । ପୋଲିସ ଘଟଣାସ୍ଥଳରେ ପହଞ୍ଚିବା ସହ ସ୍ଥିତିକୁ ନିୟନ୍ତ୍ରଣ କରିଥିବା ସୂଚନା ମିଳିଛି ।

ହଜାରିବାଗର ଇଚାକ ଥାନା ଡୁମରୌନର ହିନ୍ଦୁସ୍ତାନ ଛକରେ ଏହି ଉତ୍ତେଜନା ଦେଖିବାକୁ ମିଳିଛି । ସୂଚନା ଅନୁସାରେ, ଏକ ଗୋଷ୍ଠୀ ଶିବରାତ୍ରୀ ଲାଗି ପତାକା ବାନ୍ଧିବା ସହ ମାଇକ୍‌ ଲଗାଇବା ପାଇଁ ଉଦ୍ୟମ କରୁଥିଲେ । ଆଉ ସମୟରେ ଅନ୍ୟ ଏକ ଗୋଷ୍ଠୀ ବିରୋଧ କରିବାକୁ ବିବାଦ ସୃଷ୍ଟି ହୋଇଥିଲା । ଉଭୟ ପକ୍ଷ ପରସ୍ପରକୁ ଢେଲାମାଡ଼ କରିବା ସହ ୨ଟି ବାଇକ୍ ଏବଂ ଏକ ଅଟୋରେ ନିଆଁ ଲଗାଇ ଦେଇଥିଲେ ।

କୁହାଯାଉଛି, ଉତ୍ତେଜନାକାରୀ ଏକ ଦୋକାନ ବି ଜାଳି ଦେଇଛନ୍ତି । ଢେଲାମାଡ଼ରେ ଏକାଧିକ ଲୋକ ଆହତ ହୋଇଥିବା ବେଳେ ସେମାନଙ୍କୁ ହଜାରିବାଦ ସଦର ହସ୍ପିଟାଲ୍‌ରେ ଭର୍ତ୍ତି କରାଯାଇଛି । ଉତ୍ତେଜନାକୁ ଦେଖି ସ୍ଥାନୀୟ ଅଞ୍ଚଳରେ ବ୍ୟାପକ ପୋଲିସ କର୍ମୀଙ୍କୁ ମୁତୟନ କରିଛି ପ୍ରଶାସନ । ପୋଲିସ ପକ୍ଷରୁ, ଶାନ୍ତି ରକ୍ଷା ଲାଗି ଅନୁରୋଧ କରାଯାଇଛି । ଏବେ ପରିସ୍ଥିତି ଶାନ୍ତ ଥିବା କହିଛନ୍ତି ଏସ୍‌ପି ଶ୍ରୁତି ଅଗ୍ରୱାଲ୍ ।

Argus News | argus news | -Argusnews Home: Odisha Latest News, Breaking News, Trending News, Live TV and more