Viral Story / ପ୍ରେମ କାହାଣୀର ଅଜବ ମୋଡ଼: ରାତିରେ ପ୍ରେମିକାଙ୍କୁ ଭେଟିବାକୁ ଯାଇଥିଲେ, ଆଉ ପରଦିନ...

ବିହାରର ମୁଜଫ୍ଫରପୁରରୁ ଏକ ରୋଚକ ପ୍ରେମ କାହାଣୀ ସାମ୍ନାକୁ ଆସିଛି । ପ୍ରେମିକାଙ୍କୁ ରାତିର ଅନ୍ଧାରରେ ଚୁପଚାପ ଭେଟିବାକୁ ଯାଇଥିବା ଜଣେ ଯୁବକଙ୍କୁ ଗାଁଲୋକେ ଧରି ପକାଇଥିଲେ । ଏହାପରେ ଯାହା ଘଟିଲା, ତାହା ସମ୍ଭବତଃ ସେ ଯୁବକ ନିଜେ ମଧ୍ୟ କଳ୍ପନା କରିନଥିଲେ । ପରଦିନ ସେହି ଯୁବତୀଙ୍କ ମଥାରେ ସିନ୍ଦୂର ଭରି ସେ ତାଙ୍କ ସ୍ୱାମୀ ହୋଇଗଲେ। ଏହି ଘଟଣାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେଉଛି ।

ଘଟଣାଟି ମୁଜଫ୍ଫରପୁରର ବୋଚହା ଓ ଅହିୟାପୁର ଥାନା ଅଞ୍ଚଳ ସହ ଜଡ଼ିତ । ଯୁବକ ଜଣକ ବୋଚହା ଥାନା ଅଞ୍ଚଳର ବାସିନ୍ଦା ହୋଇଥିବା ବେଳେ ଯୁବତୀ ଅହିୟାପୁର ଥାନା ଅଞ୍ଚଳର ବୋଲି ଜଣାପଡ଼ିଛି ।

ସୂଚନା ଅନୁସାରେ, ଦୁହିଁଜଣଙ୍କ ପରିଚୟ ସୋସିଆଲ ମିଡିଆ ମାଧ୍ୟମରେ ହୋଇଥିଲା । ପ୍ରଥମେ ପରିଚୟ, ପରେ କଥାବାର୍ତ୍ତା ଏବଂ ଧୀରେ ଧୀରେ ବନ୍ଧୁତ୍ୱ ପ୍ରେମରେ ପରିଣତ ହୋଇଥିଲା । ପ୍ରାୟ ଏକ ବର୍ଷ ଧରି ଦୁହିଁଜଣଙ୍କ ମଧ୍ୟରେ ସମ୍ପର୍କ ଥିବା କୁହାଯାଉଛି ।

ସୋମବାର ରାତିରେ ଯୁବକ ଜଣକ ନିଜ ପ୍ରେମିକାଙ୍କୁ ଭେଟିବା ପାଇଁ ତାଙ୍କ ଗାଁରେ ପହଞ୍ଚିଥିଲେ । ରାତିରେ ଗୁପ୍ତ ଭାବେ ଦେଖା କରି କିଛି ସମୟ କଥା ହୋଇ ଫେରିଯିବା ତାଙ୍କ ଯୋଜନା ଥିବା କୁହାଯାଉଛି । କିନ୍ତୁ ତାଙ୍କ ଆସିବା ଖବର କୌଣସି ପ୍ରକାରେ ଯୁବତୀଙ୍କ ପରିବାର ଓ ଗାଁଲୋକଙ୍କ ପାଖରେ ପହଞ୍ଚିଗଲା ।

କିଛି ସମୟ ମଧ୍ୟରେ ଲୋକେ ସେଠାରେ ଜମା ହୋଇଗଲେ । ଯୁବକ ଓ ଯୁବତୀଙ୍କୁ ଧରାଯାଇଥିଲା । ଘଟଣାସ୍ଥଳରେ ଗହଳି ଓ ଉତ୍ତେଜନାର ପରିସ୍ଥିତି ସୃଷ୍ଟି ହୋଇଥିଲା । ଏହାପରେ ଗାଁଲୋକଙ୍କ ପକ୍ଷରୁ ଏକ ଅଜବ ପ୍ରସ୍ତାବ ଆସିଲା ଯେତେବେଳେ ଦୁହେଁ ପରସ୍ପରକୁ ଭଲ ପାଉଛନ୍ତି, ତେବେ ବିବାହ କରିନିଅ । ପରଦିନ ଯୁବତୀଙ୍କ ଘରେ ବିବାହ ପାଇଁ ପ୍ରସ୍ତୁତି ହେଲା । ସିନ୍ଦୂର ଅଣାଗଲା, ମହିଳାମାନେ ବିବାହ ଗୀତ ଗାଇଲେ ଏବଂ ଗାଁଲୋକଙ୍କ ଉପସ୍ଥିତିରେ ଯୁବକ ଜଣକ ଯୁବତୀଙ୍କ ମଥାରେ ସିନ୍ଦୂର ଭରିଥିବା ଭିଡିଓରେ ଦେଖିବାକୁ ମିଳୁଛି ।

ଏହି ସମୟରେ ଉପସ୍ଥିତ କେହି ଜଣେ ପୂରା ଘଟଣାର ଭିଡିଓ ରେକର୍ଡ କରିଥିଲେ । ଭିଡିଓରେ ଗାଁଲୋକଙ୍କ ଭିଡ଼, ମହିଳାମାନଙ୍କ ବିବାହ ଗୀତ ଏବଂ ଯୁବକଙ୍କ ଦ୍ୱାରା ଯୁବତୀଙ୍କ ମଥାରେ ସିନ୍ଦୂର ଭରିବା ଦୃଶ୍ୟ ଦେଖାଯାଉଛି । ପରେ ଏହି ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି ।

ତେବେ ଘଟଣାରେ ପରେ ପୋଲିସର ମଧ୍ୟ ଏଣ୍ଟ୍ରି ହୋଇଥିଲା। ଯୁବକ ଓ ଯୁବତୀଙ୍କୁ ଜୋରଜବରଦସ୍ତି ବିବାହ କରାଯାଉଥିବା ନେଇ ପୋଲିସକୁ ସୂଚନା ମିଳିଥିଲା । ସୂଚନା ପାଇ ଅହିୟାପୁର ଥାନା ପୋଲିସ ଘଟଣାସ୍ଥଳରେ ପହଞ୍ଚି ଯୁବକଙ୍କୁ ସେଠାରୁ ନେଇଯାଇଥିଲା। ପରେ ଉଭୟ ଯୁବକ ଓ ଯୁବତୀଙ୍କୁ ଥାନାକୁ ନିଆଯାଇଥିଲା ।

ଥାନାରେ ଦୁହିଁଜଣଙ୍କୁ ପଚରାଉଚରା କରାଯିବା ସହ ତାଙ୍କ ବୟସ ଯାଞ୍ଚ କରାଯାଇଥିଲା । ପୋଲିସ ଅନୁସାରେ, ଉଭୟେ ବାଲିଗ ଥିବା ଜଣାପଡ଼ିଥିଲା । ଏହାପରେ ଦୁହିଁଜଣଙ୍କୁ ପଚରାଯାଇଥିଲା ଯେ ସେମାନେ ପରସ୍ପର ସହ ରହିବାକୁ ଚାହୁଁଛନ୍ତି କି ନାହିଁ । ପୋଲିସ ସମ୍ମୁଖରେ ଯୁବକ ଓ ଯୁବତୀ ନିଜ ଇଚ୍ଛାରେ ସାଙ୍ଗେ ରହିବାକୁ ଚାହୁଁଥିବା କହିଥିଲେ । ପରେ ପରିବାରର ସମ୍ମତି ଏବଂ ସ୍ଥାନୀୟ ଜନପ୍ରତିନିଧିଙ୍କ ଉପସ୍ଥିତିରେ ଉଭୟଙ୍କୁ ପିଆର୍ ବଣ୍ଡ୍‌ରେ ଛାଡ଼ି ଦିଆଯାଇଥିବା ଜଣାପଡ଼ିଛି ।

ସୋସିଆଲ ମିଡିଆରେ ଆରମ୍ଭ ହୋଇଥିବା ଏହି ପ୍ରେମ କାହାଣୀ ରାତିର ଗୁପ୍ତ ସାକ୍ଷାତରୁ ଆରମ୍ଭ କରି ଗାଁଲୋକଙ୍କ ସାମ୍ନାରେ ସିନ୍ଦୂର ଭରିବା ପର୍ଯ୍ୟନ୍ତ ପହଞ୍ଚିଛି । ତେବେ ପୋଲିସର ପଚରାଉଚରାରେ ଉଭୟେ ବାଲିଗ ଏବଂ ନିଜ ଇଚ୍ଛାରେ ସାଙ୍ଗେ ରହିବାକୁ ଚାହୁଁଥିବା କହିଛନ୍ତି ।