ଆସନ୍ତାକାଲି ୧୪ ମାର୍ଚ୍ଚରେ ସାରା ଦେଶରେ ହୋଲି ପର୍ବ ପାଳନ କରାଯିବ। ଏଥର ହୋଲି ସମ୍ପର୍କରେ ଅନେକ ଭିନ୍ନ ଭିନ୍ନ ବକ୍ତବ୍ୟକୁ ନେଇ ବହୁତ ବିବାଦ ହୋଇଥିଲା। ଏବେ ହାଇଦ୍ରାବାଦ ପୋଲିସ ଦ୍ୱାରା ହୋଲି ସମ୍ପର୍କରେ ଜାରି କରାଯାଇଥିବା ନିର୍ଦ୍ଦେଶାବଳୀକୁ ନେଇ ବିବାଦ ଦେଖାଦେଇଛି। ପ୍ରକୃତରେ, ହାଇଦ୍ରାବାଦ ପୋଲିସ ହୋଲି ଉପରେ ଅନେକ କଟକଣା ଲଗାଇଛି। ଏଥିପାଇଁ ପୋଲିସ ପକ୍ଷରୁ ଏକ ବିଜ୍ଞପ୍ତି ଜାରି କରାଯାଇଛି। ଏହା ଅନୁଯାୟୀ, ଯଦି କାହା ଉପରେ ତାଙ୍କ ସମ୍ମତି ବିନା ରଙ୍ଗ ଲଗାଯାଏ, ତେବେ ଏପରି କରୁଥିବା ବ୍ୟକ୍ତିଙ୍କ ବିରୁଦ୍ଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ହାଇଦ୍ରାବାଦ ପୋଲିସ ଦ୍ୱାରା ଜାରି କରାଯାଇଥିବା ଏକ ବିଜ୍ଞପ୍ତି ଅନୁଯାୟୀ, ଦୁଇଚକିଆ ଯାନ ଏବଂ ଅନ୍ୟାନ୍ୟ ଯାନଗୁଡ଼ିକୁ ରାସ୍ତା କିମ୍ବା ସାର୍ବଜନୀନ ସ୍ଥାନରେ ଦଳବଦ୍ଧ ଭାବରେ ଚାଲିବାକୁ ଅନୁମତି ଦିଆଯିବ ନାହିଁ କାରଣ ଏହା ଶାନ୍ତି ଭଙ୍ଗ କରିପାରେ, ଅସୁବିଧା ସୃଷ୍ଟି କରିପାରେ କିମ୍ବା ବିପଦ ସୃଷ୍ଟି କରିପାରେ।

ଏହା ବ୍ୟତୀତ, ଅନୁମତି ବିନା କୌଣସି ବ୍ୟକ୍ତି, ସ୍ଥାନ କିମ୍ବା ଯାନବାହନ ଉପରେ ରଙ୍ଗ କିମ୍ବା ରଙ୍ଗୀନ ପାଣି ଫିଙ୍ଗିବା ନିଷେଧ। ଏହି ନିର୍ଦ୍ଦେଶଗୁଡ଼ିକ ୧୩ ମାର୍ଚ୍ଚ ସା ୬ଟାରୁ ୧୫ ମାର୍ଚ୍ଚ ସକାଳ ୬ଟା ପର୍ଯ୍ୟନ୍ତ କାର୍ଯ୍ୟକାରୀ ହେବ। ଏହା ବ୍ୟତୀତ ୧୪ ମାର୍ଚ୍ଚ ସକାଳ ୬ଟାରୁ ସା ୬ଟା ପର୍ଯ୍ୟନ୍ତ ମଦ ଦୋକାନ ଏବଂ ବାରଗୁଡ଼ିକୁ ବନ୍ଦ ରଖିବାକୁ ମଧ୍ୟ ନିର୍ଦ୍ଦେଶ ଜାରି କରାଯାଇଛି।

ଏହାକୁ ନେଇ ଭାରତୀୟ ଜନତା ପାର୍ଟି ତେଲେଙ୍ଗାନା ସରକାରଙ୍କୁ ଟାର୍ଗେଟ କରିଛି। ବିଜେପି ବିଧାୟକ ରାଜା ସିଂହ ଏହାକୁ ଏକ ତୁଗଲକି ଶାସନ ବୋଲି କହିଛନ୍ତି ଏବଂ ରେଭନ୍ତ ରେଡ୍ଡୀଙ୍କୁ ନିଜାମ ବୋଲି କହିଛନ୍ତି। ସେ କହିଥିଲେ, ‘ନିଜାମ ତାଙ୍କ ସମୟରେ ହିନ୍ଦୁମାନଙ୍କୁ ହଇରାଣ କରୁଥିଲେ।’ ରେଭନ୍ତ ରେଡ୍ଡୀ ନିଜାମ ପରି ବ୍ୟବହାର କରୁଛନ୍ତି।

ରାଜା ସିଂହ କହିଛନ୍ତି, ‘ମୁଁ ମୁଖ୍ୟମନ୍ତ୍ରୀ ଏବଂ ପୋଲିସ ଅଧିକାରୀମାନଙ୍କୁ ପଚାରିବାକୁ ଚାହୁଁଛି ଯେ, ରମଜାନର ୩୦ ଦିନ ମଧ୍ୟରେ ଲୋକମାନେ ରାତିରେ ବାଇକ ଏବଂ ଦଳବଦ୍ଧ ଭାବରେ କିପରି ବୁଲନ୍ତି, ଏହା କ’ଣ ତେଲେଙ୍ଗାନାର ନବମ ନିଜାମ ରେବନ୍ତ ରେଡ୍ଡୀ ଏବଂ ପୋଲିସ ଅଧିକାରୀମାନଙ୍କୁ ଦୃଶ୍ୟମାନ ନୁହେଁ।’ ଏହି ୩୦ ଦିନ ମଧ୍ୟରେ ହାଇଦ୍ରାବାଦରେ କେତେ ହିଂସା ଘଟୁଛି ବୋଲି ବି ସେ ପ୍ରଶ୍ନ କରିଛନ୍ତି।

Argus News | argus news | Odisha Latest News, Breaking News, Trending News, Live TV