ନୂଆଦିଲ୍ଲୀ: ଦକ୍ଷିଣ-ପଶ୍ଚିମ ମୌସୁମୀ ବାୟୁର ଆଗମନ ସତ୍ତ୍ଵେ ଜାରି ରହିଛି ଗରମ । ଅସ୍ତବ୍ୟସ୍ତ କରି ପକାଉଛି ଗୁଳୁଗୁଳି । ପ୍ରଚଣ୍ଡ ଗ୍ରୀଷ୍ମ ପ୍ରବାହକୁ ଦେଖି ସରକାର ସ୍କୁଲ୍ ଖରା ଛୁଟିକୁ ବୃଦ୍ଧି କରିଛନ୍ତି । ଫଳରେ ବିଦ୍ୟାଳୟ ଗୁଡ଼ିକ ଜୁନ୍ ୨୫ ତାରିଖରେ ଖୋଲିବ ।

ସ୍କୁଲ୍ ଖରା ଛୁଟି ନେଇ ବଡ଼ ନିଷ୍ପତ୍ତି ନେଇଛନ୍ତି ଉତ୍ତର ପ୍ରଦେଶ ସରକାର । ବେସିକ୍ ଶିକ୍ଷା ପରିଷଦ ଅଧିନରେ ପରିଚାଳିତ ସମସ୍ତ ବିଦ୍ୟାଳୟ ଓ ମାନ୍ୟତା ପ୍ରାପ୍ତ ସଂସ୍ଥା ଗୁଡ଼ିକ ଲାଗି ଖରା ଛୁଟି ବଢ଼ାଇ ଦିଆ ଯାଇଛି । ଫଳରେ ବେସିକ୍ ଶିକ୍ଷା ପରିଷଦ ଅଧିନରେ ଆସୁଥିବା ସ୍କୁଲ୍ ଜୁନ୍ ୨୫ରେ ଫିଟିବ ।

ଏଥିସହ ପଢ଼ନ୍ତୁ: ସରିଲା ଖରା ଛୁଟି; ଖୁବଶୀଘ୍ର ଖୋଲିବ ସ୍କୁଲ 

ଏନେଇ ମଙ୍ଗଳବାର ବେସିକ୍ ଓ ମାଧ୍ୟମିକ ଶିକ୍ଷା ବିଭାଗର ଅତିରିକ୍ତ ମୁଖ୍ୟ ସଚିବ ପାର୍ଥ ସାରଥୀ ସେନା ଶର୍ମା ନିର୍ଦ୍ଦେଶନାମା ଜାରି କରିଛନ୍ତି । ବିଜ୍ଞପ୍ତି ଅନୁସାରେ, ଚଳିତ ବର୍ଷ ଖରା ଛୁଟି ମେ ୨୦ରୁ ଜୁନ୍ ୨୪ ପର୍ଯ୍ୟନ୍ତ ହେବ । ଫଳରେ ନିୟମିତ ଶିକ୍ଷାଦାନ ଜୁନ୍ ୨୫ରୁ ଆରମ୍ଭ ହେବ ।

ପୂର୍ବରୁ ଜୁନ୍ ୧୬ ତାରିଖ ମଙ୍ଗଳବାର ବିଦ୍ୟାଳୟ ଖୋଲିବାର ଥିଲା । ହେଲେ ପ୍ରଚଣ୍ଡ ଖରା ପାଇଁ ସରକାର ସ୍କୁଲ୍ ଖରା ଛୁଟି ବଢ଼ାଇ ଦେଇଛନ୍ତି । ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ନିର୍ଦ୍ଦେଶକ୍ରମେ ଏହି ନିଷ୍ପତ୍ତି ନିଆଯାଇଛି ।

ଏଥିସହ ପଢ଼ନ୍ତୁ: ମୋହନ ସରକାରଙ୍କ ବଡ଼ ଘୋଷଣା; କେଜିରୁ ପିଜି ପର୍ଯ୍ୟନ୍ତ ମାଗଣାରେ ପଢ଼ିବେ ସମସ୍ତେ 

ରାଜ୍ୟରେ ବଢ଼ୁଥିବା ଗ୍ରୀଷ୍ମ ପ୍ରବାହ, ତାପମାତ୍ରା ବୃଦ୍ଧି ଭିତରେ ଛୁଆଙ୍କ ସୁରକ୍ଷା, ସ୍ଵାସ୍ଥ୍ୟ ଓ ଉତ୍ତମ ଶିକ୍ଷାକୁ ସରକାର ପ୍ରାଥମିକତା ଦେଉଛନ୍ତି । ଅଧିକାରୀଙ୍କ ଅନୁସାରେ, ବିଭାଗ ଦ୍ଵାରା ଛୁଟି ବୃଦ୍ଧି ଯୋଗୁଁ ଶୈକ୍ଷିକ କ୍ୟାଲେଣ୍ଡରରେ ସମାନତା ରହିବ । ବାରମ୍ବାର ଜିଲ୍ଲା ପ୍ରଶାସନକୁ ଛୁଟି ବଢ଼ାଇବାର ଆବଶ୍ୟକତା ନାହିଁ ।

ଜୁନ୍‌ ୨୧ରେ ସ୍କୁଲ୍ ଆସିବେ ଛାତ୍ରଛାତ୍ରୀ

ଜାରି ନିର୍ଦ୍ଦେଶ ଅନୁସାରେ, ନୂଆ ଶୈକ୍ଷିକ ବର୍ଷର ପ୍ରସ୍ତୁତି ପାଇଁ ଶିକ୍ଷକ, ଶିକ୍ଷା ମିତ୍ର ଏବଂ ଅନ୍ୟ କର୍ମଚାରୀ ୨୨ ଜୁନ୍‌ରୁ ୨୪ ଜୁନ୍ ମଧ୍ୟରେ କାର୍ଯ୍ୟରେ ଯୋଗ ଦେବେ । ସେହିଭଳି ଜୁନ୍ ୨୧ରେ ଶିକ୍ଷକ ଓ ଛାତ୍ରଛାତ୍ରୀ ମିଳିତ ଭାବେ ଅନ୍ତର୍ଜାତୀୟ ଯୋଗ ଦିବସ ପାଳନ କରିବେ ।