ମହାକାଶରେ ଫସି ରହିଥିବା ସୁନିତା ୱିଲିୟମ୍ସଙ୍କ ଫେରିବା ସମ୍ପର୍କରେ ଏକ ବଡ଼ ଅପଡେଟ ଆସିଛି । ନାସା ଦେଲା ସଠିକ ତଥ୍ୟ । ଗତ ବର୍ଷ ଜୁନ ମାସରୁ ମହାକାଶରେ ଫସି ରହିଛନ୍ତି ସୁନିତା। ଆଶା କରାଯାଉଛି ସେମାନେ ସମସ୍ତେ ସେଠାରେ ସୁରକ୍ଷିତ ଅଛନ୍ତି। ମହାକାଶଚାରୀମାନେ ବହୁତ ଦିନ ଧରି ସେମାନଙ୍କ ଫେରିବା ପାଇଁ ଅପେକ୍ଷା କରିଛନ୍ତି।

କେବେ ଫେରିବେ କେବେ ଫେରିବେ ତାକୁ ନେଇ ସମସ୍ତଙ୍କ ମନରେ ବଡ ପ୍ରଶ୍ନ ଥିଲା। ହେଲେ ନାସା ପକ୍ଷରୁ ଆସିଛି ଖୁସି ଖବର। ନାସା ଏବଂ ସ୍ପେସଏକ୍ସ ଏଜେନ୍ସିର ସ୍ପେସଏକ୍ସ କ୍ରୁ-୯ ମହାକାଶଚାରୀ ସୁନିତା ୱିଲିୟମ୍ସ ଏବଂ ବୁଚ ୱିଲମୋରଙ୍କୁ ଯଥାଶୀଘ୍ର ସୁରକ୍ଷିତ ଭାବରେ ଫେରାଇ ଆଣିବା ପାଇଁ ଦ୍ରୁତ ଗତିରେ କାମ କରୁଛନ୍ତି।

ନିର୍ଦ୍ଧାରିତ ସମୟ ପୂର୍ବରୁ ଉଭୟ ମହାକାଶଚାରୀଙ୍କୁ ପୃଥିବୀକୁ ଫେରାଇ ଅଣାଯାଇପାରିବ ବୋଲି ନାସା ସୂଚନା ଦେଇଛି। ନାସା ମଙ୍ଗଳବାର କହିଛି ଯେ ମିଶନ ପ୍ରସ୍ତୁତି ଏବଂ ଏଜେନ୍ସିର ଉଡ଼ାଣ ପ୍ରସ୍ତୁତି ପ୍ରକ୍ରିୟାର ବୈଧତା ସମାପ୍ତ ହେବା ପରେ ଏଜେନ୍ସିର କ୍ରୁ-୧୦ ଉତକ୍ଷେପଣକୁ ଏବେ ମାର୍ଚ୍ଚ ୧୨ ତାରିଖରେ ଲକ୍ଷ୍ୟ ରଖାଯାଇଛି। ମଙ୍ଗଳବାର ନାସା କହିଛି ଯେ ସ୍ପେସଏକ୍ସ ଆଗାମୀ ମହାକାଶଚାରୀ ଉଡ଼ାଣ ପାଇଁ କ୍ୟାପସୁଲକୁ ପରିବର୍ତ୍ତନ କରିବ ଯାହା ଦ୍ୱାରା ବୁଚ ୱିଲମୋର ଏବଂ ସୁନିତା ୱିଲିୟମ୍ସଙ୍କୁ ମାର୍ଚ୍ଚ ଶେଷ କିମ୍ବା ଏପ୍ରିଲ ଆରମ୍ଭ ବଦଳରେ ମାର୍ଚ୍ଚ ମଧ୍ୟଭାଗରେ ପୃଥିବୀକୁ ଫେରାଇ ଅଣାଯିବ। ବୁଚ ୱିଲମୋର ଏବଂ ସୁନିତା ୱିଲିୟମ୍ସ ଜୁନ ୨୦୨୪ରେ ବୋଇଂର ଷ୍ଟାରଲାଇନର୍‌ ମହାକାଶଯାନ ଯୋଗେ ଆଇଏସଏସ ପାଇଁ ଯାତ୍ରା କରିଥିଲେ। ଉଭୟ ମହାକାଶଚାରୀଙ୍କୁ ମହାକାଶରେ ମାତ୍ର ୧୦ ଦିନ ବିତାଇବାକୁ ପଡିଥିଲା।

ମହାକାଶ ଷ୍ଟେଶନରେ ପହଞ୍ଚିବା ପରେ, ନାସା ଏବଂ ବୋଇଂ ମହାକାଶଯାନର ସମସ୍ୟାଗୁଡ଼ିକୁ ଭଲ ଭାବରେ ବୁଝିବା ପାଇଁ ସପ୍ତାହେ ଧରି କାର୍ଯ୍ୟ କରିଥିଲେ କିନ୍ତୁ ଶେଷରେ ନିଷ୍ପତ୍ତି ନେଇଥିଲେ ଯେ ଷ୍ଟାରଲାଇନରକୁ ଦଳ ସହିତ ଫେରାଇବା ବହୁତ କଷ୍ଟକର।ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମଧ୍ୟ ସୁନିତା ୱିଲିୟମ୍ସଙ୍କ ଫେରିବା ବିଷୟରେ ସୂଚନା ନେଉଛନ୍ତି। ଡୋନାଲ୍ଡ ଟ୍ରମ୍ପ ’ଟ୍ରୁଥ ସୋସିଆଲ’ରେ କହିଥିଲେ ଯେ ସେ ଏଲୋନ ମସ୍କଙ୍କ କମ୍ପାନୀ ସ୍ପେସଏକ୍ସକୁ ମାର୍ଚ୍ଚ ଶେଷ ସୁଦ୍ଧା ଉଭୟ ମହାକାଶଚାରୀଙ୍କ ଫେରିବା ସୁନିଶ୍ଚିତ କରିବାକୁ କହିଥିଲେ।

Argus News | argus news | Odisha Latest News, Breaking News, Trending News, Live TV