Abortion Rights / “ମହିଳାଙ୍କୁ ବାଧ୍ୟ କରାଯାଇପାରିବ ନାହିଁ”: ନାବାଳିକାଙ୍କୁ ୩୦ ସପ୍ତାହର ଗର୍ଭପାତ ପାଇଁ ଅନୁମତି ଦେଲେ ସୁପ୍ରିମକୋର୍ଟ

ମହିଳାଙ୍କ ପ୍ରଜନନ ସ୍ଵାଧୀନତାକୁ ଗୁରୁତ୍ୱ ଦେଇ ମାନ୍ୟବର ସୁପ୍ରିମକୋର୍ଟ ଶୁକ୍ରବାର ଏକ ବଡ଼ ନିଷ୍ପତ୍ତି ଶୁଣାଇଛନ୍ତି। ଜଣେ ଯୁବତୀଙ୍କୁ ତାଙ୍କ ଇଚ୍ଛା ବିରୁଦ୍ଧରେ ମାତୃତ୍ୱ ଗ୍ରହଣ କରିବା ପାଇଁ କୋର୍ଟ ବାଧ୍ୟ କରିପାରିବେ ନାହିଁ ବୋଲି ସ୍ପଷ୍ଟ କରିଛନ୍ତି ଶୀର୍ଷ ଅଦାଲତ। ଏହା ସହିତ ୩୦ ସପ୍ତାହର ଗର୍ଭପାତ ପାଇଁ ଯୁବତୀଙ୍କୁ ଅନୁମତି ମିଳିଛି।

ଜଷ୍ଟିସ୍ ବି.ଭି. ନାଗରତ୍ନାଙ୍କ ନେତୃତ୍ୱରେ ଗଠିତ ଏକ ବେଞ୍ଚ ବମ୍ବେ ହାଇକୋର୍ଟଙ୍କ ପୂର୍ବ ନିଷ୍ପତ୍ତିକୁ ରଦ୍ଦ କରିଦେଇଛନ୍ତି। ବମ୍ବେ ହାଇକୋର୍ଟ ପୂର୍ବରୁ ଗର୍ଭପାତ ପାଇଁ ମନା କରିଥିଲେ ଏବଂ ଯୁବତୀଙ୍କୁ ସନ୍ତାନ ଜନ୍ମ କରି ପୋଷ୍ୟ ସନ୍ତାନ ଭାବେ ଅନ୍ୟକୁ ଦେଇଦେବାକୁ ପରାମର୍ଶ ଦେଇଥିଲେ। କିନ୍ତୁ ସୁପ୍ରିମକୋର୍ଟ କହିଛନ୍ତି ଯେ, “ଯଦି ଜଣେ ମହିଳାଙ୍କ ଗର୍ଭ ରଖିବାକୁ ଇଚ୍ଛା ନାହିଁ, ତେବେ ତାଙ୍କୁ ସନ୍ତାନ ଜନ୍ମ କରିବା ପାଇଁ କୋର୍ଟ ବାଧ୍ୟ କରିପାରିବେ ନାହିଁ।”

ସମ୍ପୃକ୍ତ ଯୁବତୀ ଜଣକ ୧୭ ବର୍ଷ ବୟସରେ ଜଣେ ବନ୍ଧୁଙ୍କ ସହ ସମ୍ପର୍କ ରଖି ଗର୍ଭବତୀ ହୋଇଥିଲେ। ଏବେ ତାଙ୍କ ବୟସ ୧୮ ବର୍ଷ ୪ ମାସ। ଯେହେତୁ ଗର୍ଭଧାରଣ ସମୟ ୩୦ ସପ୍ତାହ ଅତିକ୍ରମ କରିସାରିଥିଲା, ମେଡିକାଲ୍ ବୋର୍ଡର ରିପୋର୍ଟ ଅନୁସାରେ ଏଥିରେ ଯୁବତୀଙ୍କ ଜୀବନ ପ୍ରତି କୌଣସି ବଡ଼ ବିପଦ ନଥିବା ଦର୍ଶାଯାଇଥିଲା। ଯୁବତୀଙ୍କ ଓକିଲ ଯୁକ୍ତି ବାଢ଼ିଥିଲେ ଯେ, ସମାଜରେ ଅବୈଧ ସନ୍ତାନ ଜନ୍ମ ଦେବା କାରଣରୁ ଯୁବତୀଙ୍କୁ ମାନସିକ ଓ ଶାରୀରିକ ନିର୍ଯାତନା ସହିବାକୁ ପଡ଼ିବ।

ସୁପ୍ରିମକୋର୍ଟ ଏହି ମାମଲାର ଶୁଣାଣି କରି କହିଛନ୍ତି, “ଏଠାରେ ଗୁରୁତ୍ୱପୂର୍ଣ୍ଣ ପ୍ରଶ୍ନ ହେଉଛି ଆମେ କାହା ସ୍ୱାର୍ଥ ଦେଖିବା? ଏକ ଅଜନ୍ମା ଶିଶୁର ନା ସେହି ମା’ର ଯିଏ ଶିଶୁଟିକୁ ଜନ୍ମ ଦେବ? ମା’ର ପ୍ରଜନନ ସ୍ଵାଧୀନତାକୁ ସବୁବେଳେ ପ୍ରାଧାନ୍ୟ ଦିଆଯିବା ଉଚିତ।”

ଜଷ୍ଟିସ୍ ନାଗରତ୍ନା ଆହୁରି ମଧ୍ୟ କହିଛନ୍ତି ଯେ, ଯଦି କୋର୍ଟ ଏଭଳି କଠିନ ସମୟରେ ସହାୟତା ନକରିବେ, ତେବେ ଅସହାୟ ମହିଳାମାନେ ଅଣଅନୁମୋଦିତ ଡାକ୍ତର ବା ଅଣକୁଶଳୀ ବ୍ୟକ୍ତିଙ୍କ ପାଖକୁ ଗର୍ଭପାତ ପାଇଁ ଯାଇ ନିଜ ଜୀବନ ବିପଦରେ ପକାଇବେ।

ଭାରତୀୟ ଆଇନ ଅନୁସାରେ ଗର୍ଭପାତ ପାଇଁ କିଛି ନିର୍ଦ୍ଦିଷ୍ଟ ସୀମା ରହିଛି। ୨୦ ସପ୍ତାହ ପର୍ଯ୍ୟନ୍ତ ଜଣେ ମହିଳା ନିଜ ନିଷ୍ପତ୍ତିରେ ଗର୍ଭପାତ କରିପାରିବେ। ୨୦ ରୁ ୨୪ ସପ୍ତାହ ହୋଇଥିଲେ ଏଥିପାଇଁ ମେଡିକାଲ୍ ବୋର୍ଡର ପରାମର୍ଶ ଆବଶ୍ୟକ। ୨୪ ସପ୍ତାହ ପରେ କେବଳ କୋର୍ଟଙ୍କ ଅନୁମତି କ୍ରମେ ହିଁ ଗର୍ଭପାତ କରାଯାଇପାରିବ।