ଦିଲ୍ଲୀ-ଏନ୍‌ସିଆରରୁ ବୁଲା କୁକୁରଙ୍କୁ ହଟାଇବା ନେଇ ହେବ ସୁପ୍ରିମକୋର୍ଟରେ ଶୁଣାଣି

ବୁଲା କୁକୁରଙ୍କୁ ନେଇ ସୁପ୍ରିମକୋର୍ଟଙ୍କ ନିର୍ଦ୍ଦେଶ ପ୍ରସଙ୍ଗ । ଆଜି ହେବ ମାମଲାର ଶୁଣାଣି । ସୁପ୍ରିମକୋର୍ଟର ତିନି ଜଣିଆ ଖଣ୍ଡପିଠରେ ଆଜି ହେବ ଶୁଣାଣି । ପୂର୍ବରୁ ଏକ ଭିନ୍ନ ଖଣ୍ଡପୀଠ ଦ୍ୱାରା ଶୁଣାଣି କରାଯାଉଥିଲା । ଏହି ମାମଲା ଏବେ ବିଚାରପତି ବିକ୍ରମ ନାଥ, ସନ୍ଦୀପ ମେହେଟ୍ଟା ଏବଂ ଏନଭି ଅଞ୍ଜାରିଆଙ୍କୁ ନେଇ ଗଠିତ ଏକ ସ୍ୱତନ୍ତ୍ର ଖଣ୍ଡପୀଠ ଦ୍ୱାରା ବିଚାର କରାଯିବ ।

ପୂର୍ବରୁ ଦିଲ୍ଲୀ- ଏନ୍‌ସିଆରରେ ବୁଲା କୁକୁରଙ୍କୁ ଧରି ଅଲଗା ଜାଗାରେ ରଖବାକୁ ନିର୍ଦ୍ଦେଶ ହୋଇଥିଲା । ଆଠ ସପ୍ତାହ ମଧ୍ୟରେ ୫ ହଜାର କୁକୁରଙ୍କ ପାଇଁ ଆଶ୍ରୟସ୍ଥଳ ସୃଷ୍ଟି କରିବାକୁ କୋର୍ଟ ନିର୍ଦ୍ଦେଶ ଦେଇଥିଲେ । ତେବେ ଏହି ନିର୍ଦ୍ଦେଶକୁ ନେଇ ସାରା ଦେଶରେ ପ୍ରତିକ୍ରିୟା ଦେଖିବାକୁ ମିଳିଥିଲା । ଅନେକ ଲୋକ ଏହି ନିଷ୍ପତ୍ତିକୁ ବିରୋଧ କରିଥିଲେ । ଏହାରି ଭିତରେ ଏବେ ସିଜେଆଇ ସୁପ୍ରିମକୋର୍ଟର ଦୁଇ ଭିନ୍ନ ଭିନ୍ନ ଖଣ୍ଡପୀଠଙ୍କ ରାୟ ଉପରେ ବିଚାର କରିବେ । ସିଜେଆଇ ବିଆର୍ ଗଭାଇ କହିଛନ୍ତି ଯେ ସେ ନିଜେ ଏହି ମାମଲାକୁ ଦେଖିବେ ।

ସୁପ୍ରିମକୋର୍ଟ ବୁଧବାର ବୁଲା କୁକୁର ସଂପର୍କିତ ମାମଲାକୁ ସ୍ୱତନ୍ତ୍ର ଖଣ୍ଡପୀଠକୁ ସ୍ଥାନାନ୍ତର କରିଥିଲେ । ନବ ଗଠିତ ସ୍ୱତନ୍ତ୍ର ଖଣ୍ଡପୀଠ ଆଜି ୪ଟି ମାମଲାର ଶୁଣାଣି କରିବେ । ସେଗୁଡ଼ିକ ହେଉଛି ବୁଲା କୁକୁରଙ୍କୁ ଧରିବା, କୋର୍ଟ ନିଜେ କରିଥିବା ମାମଲା, ୨୦୦୪ ଆବେଦନ ହୋଇଥିବା ମାମଲା ଓ ବୁଧବାର ହୋଇଥିବା ଜନସ୍ୱାର୍ଥ ମାମଲା । ବୁଲା କୁକୁର ସଂପର୍କିତ ମାମଲାରେ ମିଡିଆ ରିପୋର୍ଟକୁ ନେଇ ସ୍ୱତଃସଜ୍ଞାନ ନେଇ ଜଷ୍ଟିସ ଜେବି ପାରଦିବାଲାଙ୍କ ଖଣ୍ଡ ପୀଠ କହିଥିଲେ ୮ ସପ୍ତାହ ଭିତରେ ଦିଲ୍ଲୀ ଏନସିଆରରୁ ସମସ୍ତ ବୁଲା କୁକୁରଙ୍କୁ ଉଠାଇ ନେଇ ବନ୍ଧ୍ୟାକରଣ କରିବା ସହ ଆଶ୍ରୟସ୍ଥଳୀରେ ରଖାଯାଉ ।

କିଛି ଲୋକ ଦିଲ୍ଲୀ-ଏନସିଆର ରାସ୍ତାକୁ କୁକୁର ମୁକ୍ତ କରିବା ନିଷ୍ପତ୍ତିକୁ ସ୍ୱାଗତ କରିଛନ୍ତି । ଅନ୍ୟପଟେ କିଛି ଲୋକ ଏହାକୁ ନିନ୍ଦା କରିବା ସହ ଏହା ମଣିଷ-କୁକୁର ସଂଘର୍ଷକୁ ବଢ଼ାଇପାରେ ବୋଲି ଚେତେଇ ଦେଇଛନ୍ତି । ବିବାଦ ବଢ଼ିବା ପରେ ସୁପ୍ରିମକୋର୍ଟ ମାମଲା ସ୍ୱତନ୍ତ୍ର ଖଣ୍ଡପୀଠକୁ ହସ୍ତାନ୍ତର କରିଛନ୍ତି ।