ୱାକଫକୁ ନେଇ ସୁପ୍ରିମକୋର୍ଟଙ୍କ ବଡ଼ ରାୟ । ୩ଟି ମୁଦ୍ଦାକୁ ନେଇ ଆସିଲା ଫୈସଲା । ପୂରା କାନୁନ୍‌ ଉପରେ ରୋକ୍‌ ଲଗାଇନାହାନ୍ତି ସୁପ୍ରିମ କୋର୍ଟ । କେବଳ କିଛି ଧାରାରେ ଲାଗିଲା ରୋକ୍ । ବହୁ ବିବାଦୀୟ ୱାକଫ ଆଇନର ପ୍ରମୁଖ ବ୍ୟବସ୍ଥା ଗୁଡ଼ିକୁ ସ୍ଥଗିତ କରିଛନ୍ତି ସୁପ୍ରିମକୋର୍ଟ । କେନ୍ଦ୍ରସରକାରଙ୍କ ୱାକଫ ଅଧିନିୟମକୁ ଚ୍ଯାଲେଞ୍ଜ କରି ସୁପ୍ରିମକୋର୍ଟରେ ହୋଇଥିଲା ମାମଲା ।

ସୁପ୍ରିମକୋର୍ଟର ମୁଖ୍ୟ ବିଚାରପତି ବି.ଆର. ଗାଭାଇ ଏବଂ ବିଚାରପତି ଏଜି ମସିହଙ୍କ ଗଠିତ ଖଣ୍ଡପୀଠ ୨୨ମେ ରେ ଏହି ମାମଲା ଉପରେ ଶୁଣାଣି କରି ରାୟକୁ ସଂରକ୍ଷିତ ରଖିଥିଲେ । ଆଜି ଏହି ରାୟ ପ୍ରକାଶ କରିଛନ୍ତି । ଏହି ରାୟ ଶୁଣାଇ ସୁପ୍ରିମକୋର୍ଟ କହିଛନ୍ତି ପୂରା କାନୁନ୍‌ ଉପରେ ରୋକ୍‌ ଲଗାଇବାର କୌଣସି ମାମଲା ନାହିଁ । କେବଳ କିଛି ଧାରାରେ ରୋକ୍ ଲଗାଯାଇଛି ।

କୋର୍ଟ କହିଛନ୍ତି ୱାକଫ ବୋର୍ଡର CEO ଜଣେ ମୁସଲିମ୍‌ ହେବା ଆବଶ୍ୟକ । ଏହାଛଡ଼ା ୱାକଫ ବୋର୍ଡରେ ୩ଜଣରୁ ଅଧିକ ଅଣ ମୁସଲିମ ରହିବେନି ବୋଲି କହିଛନ୍ତି ସୁପ୍ରିମକୋର୍ଟ । ତେବେ ନୂତନ ଆଇନରେ ଜିଲ୍ଲା କଲେକ୍ଟରଙ୍କୁ ଦିଆଯାଇଥିବା ବ୍ୟାପକ କ୍ଷମତା ବିଷୟରେ କୋର୍ଟ କହିଛନ୍ତି ବ୍ୟକ୍ତିଗତ ନାଗରିକଙ୍କ ଅଧିକାରର ବିଚାର କରିବାକୁ କଲେକ୍ଟରଙ୍କୁ ଅନୁମତି ଦିଆଯାଇପାରିବ ନାହିଁ, ଏବଂ ଏହା କ୍ଷମତା ପୃଥକୀକରଣକୁ ଉଲ୍ଲଂଘନ କରିବ ।

ଯେପର୍ଯ୍ୟନ୍ତ ଟ୍ରିବ୍ୟୁନାଲ ଦ୍ୱାରା ନିଷ୍ପତ୍ତି ନହୋଇଛି କଲେକ୍ଟରଙ୍କୁ ଏପରି କ୍ଷମତା ସହିତ ଜଡିତ ବ୍ୟବସ୍ଥା ସ୍ଥଗିତ ରହିବ । ସେହିପରି ଜଣେ ୫ ବର୍ଷ ଇସଲାମ ପାଳନ କରିଥିଲେ ହିଁ ୱାକଫକୁ ସମ୍ପତ୍ତି ଦେଇପାରିବା ପ୍ରାବଧାନ ଉପରେ ମଧ୍ୟ ରୋକ ଲଗାଇଛନ୍ତି କୋର୍ଟ । ସେହିପରି ଓ୍ବାକଫ୍‌ ଆଇନ୍‌ର ଅନୁଚ୍ଛେଦ ୩୭୪ ଉପରେ ବି ରୋକ୍‌ ଲଗାଇଛନ୍ତି । କୋର୍ଟ କହିଛନ୍ତି ଅନୁମାନ କରିବା ସବୁବେଳେ ଆଇନର ସାମ୍ବିଧାନକତା ସପକ୍ଷରେ ।

କେବଳ ବିରଳରୁ ବିରଳ ମାମଲାରେ ହିଁ ଏଥିରେ ହସ୍ତକ୍ଷେପ କରାଯିବା ଉଚିତ । ତେବେ କେନ୍ଦ୍ରସରକାର ଆଣିଥିବା ନୂତନ ୱକଫ ଆଇନରେ ୱାକଫ ସମ୍ପତ୍ତି ମାଲିକାନା ସହିତ ଜଡିତ ପ୍ରସଙ୍ଗରେ ଜିଲ୍ଲା କଲେକ୍ଟରଙ୍କୁ ଚୂଡ଼ାନ୍ତ ମଧ୍ୟସ୍ଥ ଭାବରେ କ୍ଷମତା ଦିଆଯାଇଥିଲା । ଯାହାକୁ ନେଇ ମୁସଲିମ ସଂଗଠନଗୁଡ଼ିକ ସୁପ୍ରିମକୋର୍ଟଙ୍କ ଦ୍ବାରସ୍ଥ ହୋଇଥିଲେ। ଆଜି ଏହାର ସୁପ୍ରିମ ରାୟ ପ୍ରକାଶ ପାଇଛି ।

Argus News | argus news | Odisha Latest News, Breaking News, Trending News, Live TV