କର୍ଣ୍ଣାଟକ ପୋଲିସର କଡ଼ା ଆକ୍ସନ । ଅପେରା ସୂର୍ଯ୍ୟ ମନ୍ଦିରର କର୍ମଚାରୀଙ୍କୁ ଆକ୍ରମଣ କରିଥିବା ଭଡ଼ାଟିଆ ଗୁଣ୍ଡାଙ୍କୁ ସେକିଲା ପୋଲିସ । ସୁଦୂର ଓଡ଼ିଶାରୁ ଯାଇଥିବା ଅପେରା ପାର୍ଟିକୁ ଡରେଇ ଧମକେଇ ପଇସା ନଦେଇ ଠକିଦେବାକୁ ଯୋଜନା କରିଥିଲେ କମିଟିର କିଛି ମୁଖିଆ । ସେଥିପାଇଁ ଭଡ଼ାଟିଆ ଗୁଣ୍ଡାଙ୍କୁ ଭଡ଼ାରେ ଆଣି ଅପେରା ପାର୍ଟିର କର୍ମଚାରୀଙ୍କୁ ମାଡ଼ ମାରି, ଡରେଇ ଧମକେଇ ଭଗେଇ ଦେବାକୁ ବସିଥିଲେ । କିନ୍ତୁ ସାହସର ସହ ଗୁଣ୍ଡା ବାହିନୀକୁ ସାମ୍ନା କରିଥିଲେ ମୁଖ୍ୟ ପରିଚାଳକ ବଙ୍କିମ ସ୍ବାଇଁ, ପରିଚାଳକ ଲୁଲୁ-ବିଜୁ ଓ ସାଉଣ୍ଡ ଅପରେଟର ଟୁନା ଦାସଙ୍କ ଭଳି ସଚ୍ଚୋଟ କର୍ମଚାରୀ ।

ସବୁ ପରେ ବି ଅନୁଷ୍ଠାନର କୋଟି କୋଟି ଟଙ୍କାର ସମ୍ପତ୍ତି ସୁରକ୍ଷିତ ରଖିବା ପାଇଁ ସାହସିକତାର ପରିଚୟ ଦେଇ ଆଗକୁ ଆସିଥିଲେ । ଏଥିସହିତ ସ୍ଥାନୀୟ ଓଡ଼ିଆ କମିଟିମାନଙ୍କ ସହାୟତା ଆଉ କର୍ଣ୍ଣାଟକ ପୋଲିସର ସହାୟତା ଏମାନଙ୍କ ପାଇଁ ବରଦାନ ସାବ୍ୟସ୍ତ ହୋଇଥିଲା । ବେଶୀ ବଡ଼ ଧରଣର ଅଘଟଣ ଘଟିବା ଆଗରୁ ଘଟଣାରେ ପୋଲିସ ହସ୍ତକ୍ଷେପ କରିଥିଲା ଏବଂ ଭଡ଼ାଟିଆ ଗୁଣ୍ଡାଙ୍କୁ ଉତ୍ତମ ମଧ୍ୟମ ଦେଇ ଯାତ୍ରା ଅନୁଷ୍ଠାନକୁ ସହଯୋଗର ହାତ ବଢ଼େଇ ଥିଲା । ବେଙ୍ଗାଳୁରୁର ଟି-କ୍ରସ ହ୍ବାଇଟ୍ ଫିଲ୍ଡରେ ୫ ରାତି ଯାତ୍ରା ପରିବେଷଣ କରିବା ପାଇଁ ଚୁକ୍ତିବଦ୍ଧ ହୋଇଥିଲା ଅପେରା ସୂର୍ଯ୍ୟ ମନ୍ଦିର । ସେଇ ଅନୁସାରେ ଅଗ୍ରୀମ ନେଇ ବେଙ୍ଗାଳୁରୁରେ ପହଞ୍ଚି ୪ ରାତି ଯାତ୍ରା ପରିବେଷଣ କରିବା ପରେ ବି ବାକି ପଇସା ବାହାର କରିବାର ନାଁ ଗନ୍ଧ ଧରି ନ ଥିଲେ କମିଟି ମୁଖିଆ ।

ଏଥିସହ ପଢ଼ନ୍ତୁ: IPL 2026: ପଥୁମଙ୍କ ଉପରେ ଟଙ୍କା ବର୍ଷା, ଏତିକି କୋଟିରେ କିଣିଲା ଦିଲ୍ଲୀ କ୍ୟାପିଟାଲ୍ସ

ଯେଉଁଥିପାଇଁ ପଞ୍ଚମ ରାତିରେ ଯାତ୍ରା ପରିବେଷଣ ନ କରିବା ପାଇଁ ନିଷ୍ପତ୍ତି ନେଇଥିଲେ ସୂର୍ଯ୍ୟମନ୍ଦିର ମ୍ୟାନେଜମେଣ୍ଟ । ହେଲେ ହଠାତ୍ ଗତକାଲି ସଂଧ୍ୟାରେ ଭଡ଼ାଟିଆ ଗୁଣ୍ଡାଙ୍କୁ ଧରି ପେଣ୍ଡାଲ ପାଖରେ ପହଞ୍ଚିବା ସହ କର୍ମଚାରୀଙ୍କୁ ଅତର୍କିତ ଆକ୍ରମଣ କରି ସାଉଣ୍ଡ ସେଟ୍ ଜୋରଜବରଦସ୍ତ ଉଠାଇ ନେଇଥିଲେ । ତେବେ ସୂର୍ଯ୍ୟ ମନ୍ଦିରରର କର୍ମଚାରୀମାନେ ସାହସର ସହ ସେମାନଙ୍କର ମୁକାବିଲା କରିଥିଲେ । ଯାହା ଫଳରେ ସୃଷ୍ଟି ହୋଇଥିଲା ହାତାହାତି ପରିସ୍ଥିତି ।

ପରେ ପ୍ରଯୋଜକ ପ୍ରମୋଦ ସ୍ବାଇଁ ନିଜର ଲୋକସମ୍ପର୍କକୁ ବିନିଯୋଗ କରି ଘଟଣାକୁ ନିଜ କଣ୍ଟ୍ରୋଲକୁ ନେଇଥିଲେ । ଫଳରେ ସେମାନେ ଜୋରଜବରଦସ୍ତ ନେଇଯାଇଥିବା ଜିନିଷ ଫେରାଇବା ପରେ ପୋଲିସ ସହଯୋଗରେ ସୂର୍ଯ୍ୟ ମନ୍ଦିର ଓଡ଼ିଶା ଲେଉଟିଛି । ତେବେ ବେଙ୍ଗାଳୁରୁରେ ଘଟିଥିବା ଏଇ ଘଟଣା ଆଗାମୀ ଦିନରେ ଓଡ଼ିଶାରୁ ସୀମା ଡେଇଁ ବାହାରକୁ ଯାତ୍ରା ପରିବେଷଣ ପାଇଁ ଯାଉଥିବା ପାର୍ଟିଗୁଡ଼ିକୁ ମାନସମନ୍ଥନ କରାଇବ ନିଶ୍ଚୟ ।

ଅଧିକ ପଢ଼ନ୍ତୁ ଦେଶ ଖବର: