ନିର୍ବାଚନ ପୂର୍ବରୁ ସରଗରମ ବିହାର ରାଜନୀତି । ପ୍ରାର୍ଥୀ ଘୋଷଣାରେ ଆଗୁଆ ରହିଛି NDA, ଆଜି କଣ୍ଠଶିଳ୍ପୀ ମୈଥିଳି ଠାକୁରଙ୍କ ସହ ଆଉ ୧୨ଜଣ ପ୍ରାର୍ଥୀଙ୍କ ନାଁ ଘୋଷଣା କରାଯାଇଛି । ସେପଟେ ଜେଡିୟୁ ପକ୍ଷରୁ ପ୍ରଥମ ପର୍ଯ୍ୟାୟରେ ୫୭ଜଣ ପ୍ରାର୍ଥୀଙ୍କ ନାଁ ଘୋଷଣା କରାଯାଇଛି ।

ବିହାରରେ ନିର୍ବାଚନ ପୂର୍ବରୁ ସରଗରମ ରାଜନୀତି । ପ୍ରାର୍ଥୀ ଘୋଷଣାରେ ଆଗୁଆ ରହିଛି ଏନଡିଏ । ଗତକାଲି ବିଜେପି ପକ୍ଷରୁ ପ୍ରଥମ ପର୍ଯ୍ୟାୟରେ ୭୧ ଜଣ ପ୍ରାର୍ଥୀଙ୍କ ନାଁ ଘୋଷଣା ପରେ ବୁଧବାର ଆଉ ୧୨ଜଣ ପ୍ରାର୍ଥୀଙ୍କ ନାଁ ଘୋଷଣା କରାଯାଇଛି । କଣ୍ଠଶିଳ୍ପୀ ମୈଥିଲି ଠାକୁରଙ୍କୁ ଅଲିନଗରରୁ ଓ ପୂର୍ବତନ ଆଇପିଏସ୍ ଅଧିକାରୀ ଆନନ୍ଦ ମିଶ୍ରଙ୍କୁ ବକ୍ସରୁ ପ୍ରାର୍ଥୀ କରିଛି ବିଜେପି ।

ସେପଟେ ଜନତା ଦଳ ୟୁନାଇଟେଡ୍ ପକ୍ଷରୁ ୫୭ଜଣ ପ୍ରାର୍ଥୀଙ୍କ ନାମ ଘୋଷଣା କରାଯାଇଛି । ଜେଡିୟୁ ମୁଖ୍ୟ ନୀତିଶ କୁମାରଙ୍କ ସ୍ବୀକୃତି ପରେ ପ୍ରଥମ ପର୍ଯ୍ୟାୟରେ ବିଧାନସଭା ନିର୍ବାଚନ ପ୍ରାର୍ଥୀଙ୍କ ନାଁ ଘୋଷଣା କରାଯାଇଛି । ଆସନ୍ତାକାଲି ପ୍ରଚାର ମଇଦାନକୁ ଓହ୍ଲାଇବେ ମୁଖ୍ୟମନ୍ତ୍ରୀ ନୀତୀଶ କୁମାର ।

ସେପଟେ ବିହାରରେ ଇଣ୍ଡି ମେଣ୍ଟରେ ବଡ଼ ଗଡ଼ବଡ଼ । ବାରମ୍ବାର ଆଲୋଚନା ସତ୍ତ୍ବେ ଛିଣ୍ଡୁନି ଆସନ ଭାଗବଣ୍ଟା । ବୈଠକରେ ଚୂଡ଼ାନ୍ତ ହୋଇପାରୁନି ପ୍ରାର୍ଥୀ ତାଲିକା । ପୂର୍ବ ଅପେକ୍ଷା କଂଗ୍ରେସର ଲୋକପ୍ରିୟତା କମୁଥିବାରୁ ୫୦ରୁ ଅଧିକ ସିଟ୍ ଦେବାକୁ ଆରଜେଡି ଅମଙ୍ଗ ହେଉଥିବା ଚର୍ଚ୍ଚା ହେଉଛି । ୨୦୨୦ ବିଧାନସଭା ନିର୍ବାଚନରେ କଂଗ୍ରେସ ଓ ଆରଜେଡି ମେଣ୍ଟ ହୋଇଥିଲା । କଂଗ୍ରେସ ୭୦ଟି ଆସନରେ ପ୍ରାର୍ଥୀ ଦେଇଥିଲେ ମଧ୍ୟ ମାତ୍ର ୧୯ଟି ଆସନରେ ବିଜୟୀ ହୋଇଥିଲା ।

୧୪୪ ଆସନରେ ପ୍ରାର୍ଥୀ ଦେଇଥିବା ଆରଜେଡି ୭୫ଟି ସିଟ୍ ପାଇଥିଲା । ଚଳିତ ନିର୍ବାଚନରେ ଆରଜେଡି କିନ୍ତୁ ଅଧିକ ସିଟରେ ଲଢିବାକୁ ଚାହୁଁଛି । ଏଥିପାଇଁ ଇଣ୍ଡି ମେଣ୍ଟର ସଂଖ୍ୟା ଗଣିତ ଛିଣ୍ଡୁନାହିଁ । ସେପଟେ ରାଘୋପୁର ଆସନରୁ ନାମାଙ୍କନ ଦାଖଲ କରିଛନ୍ତି ତେଜସ୍ୱୀ ଯାଦବ । ଆସନ୍ତା ନଭେମ୍ବର ୬ ଓ ୧୧ ତାରିଖରେ ଦୁଇଟି ପର୍ଯ୍ୟାୟରେ ବିହାରରେ ନିର୍ବାଚନ ହେବା ପରେ ନଭେମ୍ବର ୧୪ରେ ଗଣତି କରାଯିବ ।