ଅର୍ଗସ ବ୍ୟୁରୋ: ବିହାରରେ ଶାସନ ପରିବର୍ତ୍ତନ ନେଇ ଦେଶରେ ରାଜନୀତି ସରଗରମ । ଏନଡିଏକୁ ନୀତିଶଙ୍କ ପ୍ରତ୍ୟାବର୍ତ୍ତନ ନେଇ ଚର୍ଚ୍ଚା ଜୋର ଧରିଛି । ଆଜି ବିଜେପି ଓ ଆର୍‌ଜେଡି ନିଜର ବୈଠକ କରିବେ । ସେହିପରି ଆସନ୍ତାକାଲି ଜେଡିୟୁ ନେତାଙ୍କୁ ନେଇ ବୈଠକ ଡାକିଛନ୍ତି ମୁଖ୍ୟମନ୍ତ୍ରୀ ନୀତିଶ କୁମାର । ସେପଟେ ରାତାରାତି ବହୁ ଗୁରୁତ୍ବପୂର୍ଣ୍ଣ ପଦବୀରେ ଅଦଳବଦଳ କରିଛନ୍ତି ନୀତିଶ କୁମାର। 

୭୯ IPS, ୪୫ BASଙ୍କୁ ବଦଳି କରାଯାଇଛି । ନୀତିଶ ମହାଗଠବନ୍ଧନ ଛାଡ଼ି ପୁଣି NDAକୁ ଫେରିବା ସମ୍ଭାବନା ରହିଛି । ସୋମବାର ସୁଦ୍ଧା ଚିତ୍ର ସ୍ପଷ୍ଟ ନେଇ ଜାତୀୟ ଗଣମାଧ୍ୟମରେ ଚର୍ଚ୍ଚା ହେଉଛି । ଇଣ୍ଡି ଆଲାଏନ୍ସରୁ ଖପ୍ପା ନୀତୀଶ ପୁଣି ଏନଡିଏ ମୁହାଁ ହେବା ନେଇ ଚର୍ଚ୍ଚା ହେଉଛି । ମୋଦି ହାୱା, ଆଉ ଇଣ୍ଡି ଆଲାଏନ୍ସରେ ଭାଗ ନ ଛିଣ୍ଡିବାରୁ ବିମୁଖ ନୀତିଶ କୁମାର । ଗୁରୁବାର ସନ୍ଧ୍ୟାରେ ଅମିତ ଶାହଙ୍କ ସହ ବିହାର ବିଜେପି ମୁଖିଆଙ୍କ ବୈଠକ ଏବଂ ଆରଜେଡି- ଜେଡିୟୁ ମଧ୍ୟରେ ଦୂରତା ସ୍ପଷ୍ଟ କରୁଛି, ବିହାରରେ ପୁଣି ନୂଆ ସରକାର ବନିବାକୁ ଯାଉଛି। ଏପରିକି ଶୁକ୍ରବାର ରାଜଭବନରେ ଅନୁଷ୍ଠିତ ହାଇ-ଟି ସମାରୋହକୁ ଏକା ପହଞ୍ଚିଥିଲେ ନୀତିଶ । ନା ତାଙ୍କ ସାଙ୍ଗରେ ଥିଲେ ଉପ-ମୁଖ୍ୟମନ୍ତ୍ରୀ ତେଜସ୍ବୀ ଯାଦବ, ନା ଥିଲେ ଆରଜେଡିର କୌଣସି ବଡ଼ ନେତା । କୁହାଯାଉଛି ଯେ ନୀତୀଶ ଏବଂ ତେଜସ୍ବୀଙ୍କ ମଧ୍ୟରେ ଚରମସୀମାରେ ମତାନ୍ତର ଓ ମନାନ୍ତର। 

ଅଧିକ ପଢ଼ନ୍ତୁ ଭାରତ ଖବର