ତେଲେଙ୍ଗାନା ମୁଖ୍ୟମନ୍ତ୍ରୀ ରେବନ୍ତ ରେଡ୍ଡୀ ରାଜଧାନୀ ହାଇଦ୍ରାବାଦରେ କିଛି ପରିବର୍ତ୍ତନ କରିବାକୁ ନିଷ୍ପତ୍ତି ନେଇଛନ୍ତି। ହାଇଦ୍ରାବାଦ ସହରସ୍ଥିତ ଆମେରିକୀୟ ବାଣିଜ୍ୟ ଦୂତାବାସ ନିକଟ ଦେଇ ଯାଇଥିବା ରାସ୍ତାକୁ, ସେ ଡୋନାଲ୍ଡ ଟ୍ରମ୍ପ ଆଭେନ୍ୟୁ ନାମରେ ନାମିତ କରାଯିବ ବୋଲି ଘୋଷଣା କରିଛନ୍ତି । ଏହା ସହିତ, ଏକ ରାସ୍ତାକୁ ସ୍ୱର୍ଗତ ଭାରତୀୟ ଶିଳ୍ପପତି ରତନ ଟାଟାଙ୍କ ନାମରେ ନାମିତ କରାଯିବ ବୋଲି ମଧ୍ୟ ସେ କହିଛନ୍ତି । ରାଜ୍ୟ ସରକାରଙ୍କ ଅନୁଯାୟୀ, ଏହି ନିଷ୍ପତ୍ତି ଏପର୍ଯ୍ୟନ୍ତ ଆନୁଷ୍ଠାନିକ ଭାବରେ ଘୋଷଣା କରାଯାଇ ନାହିଁ। ଖୁବ୍ ଶୀଘ୍ର, ବୈଦେଶିକ ମନ୍ତ୍ରଣାଳୟ ଏବଂ ଆମେରିକୀୟ ଦୂତାବାସକୁ ଏ ବିଷୟରେ ଜଣାଇ ଏକ ଚିଠି ଲେଖାଯିବ।

ଏହି ପ୍ରସଙ୍ଗରେ ରାଜ୍ୟ ସରକାରଙ୍କ ଦ୍ୱାରା ଜାରି ଏକ ବିଜ୍ଞପ୍ତିରେ ଆହୁରି ଅନେକ ପରିବର୍ତ୍ତନ ଘୋଷଣା କରାଯାଇଛି। ଗୁଗୁଲ୍ ଏବଂ ଗୁଗୁଲ୍ ମ୍ୟାପ୍‌ର ଅବଦାନକୁ ସମ୍ମାନ ଜଣାଇବା ପାଇଁ, ହାଇଦ୍ରାବାଦର ଫାଇନାନ୍ସର ଡିଷ୍ଟ୍ରିକ୍ଟର ଏକ ପ୍ରମୁଖ ରାସ୍ତାକୁ ଗୁଗୁଲ୍ ଷ୍ଟ୍ରିଟ୍ ନାମରେ ନାମିତ କରାଯିବ। ଏହି ରାସ୍ତା ଗୁଗୁଲ୍‌ର ନୂଆ କ୍ୟାମ୍ପସ୍ ନିକଟରେ ବାହାରିବ, ଯାହା ଆମେରିକା ବାହାରେ କମ୍ପାନୀର ସବୁଠାରୁ ବଡ଼ ମୁଖ୍ୟାଳୟ ହେବାକୁ ଯାଉଛି।

ଏହା ବ୍ୟତୀତ, ପ୍ରମୁଖ ଆଇଟି କମ୍ପାନୀ ୱିପ୍ରୋ ଏବଂ ମାଇକ୍ରୋସଫ୍ଟକୁ ମଧ୍ୟ ସହରର ଭୌଗୋଳିକ ଗଠନରେ ସ୍ୱୀକୃତି ଦିଆଯିବ। ବିଜ୍ଞପ୍ତି ଅନୁଯାୟୀ, ସହରରେ ୱିପ୍ରୋ ଜଙ୍କସନ୍ ଏବଂ ମାଇକ୍ରୋସଫ୍ଟ ନାଁରେ ରୋଡ୍ ହେବ।

ସୂଚନାଯୋଗ୍ୟ ଯେ, ମୁଖ୍ୟମନ୍ତ୍ରୀ ରେବନ୍ତ ରେଡ୍ଡୀ ଏହି ବର୍ଷ ଆରମ୍ଭରୁ ହିଁ ଏହି ପ୍ରକ୍ରିୟା ଆରମ୍ଭ କରିବା ପାଇଁ ଘୋଷଣା କରିଥିଲେ। ଦିଲ୍ଲୀରେ ଆମେରିକା-ଭାରତ ରଣନୈତିକ ସହଭାଗୀତା ଫୋରମରେ ଭାଷଣ ଦେଇ, ସେ ହାଇଦ୍ରାବାଦର ପ୍ରମୁଖ ରାସ୍ତାଗୁଡ଼ିକୁ ବିଶ୍ୱସ୍ତରୀୟ କମ୍ପାନୀମାନଙ୍କ ନାମରେ ନାମିତ କରିବାକୁ ପ୍ରସ୍ତାବ ଦେଇଥିଲେ। ରାଜ୍ୟ ସରକାରଙ୍କ ଏହି ଅନନ୍ୟ ପଦକ୍ଷେପ ବିଶ୍ୱସ୍ତରୀୟ କମ୍ପାନୀଗୁଡ଼ିକର ଦୃଷ୍ଟି ଆକର୍ଷଣ କରିପାରିବ।