ବେଙ୍ଗାଲୁରୁ: ଆର୍ଟ ଅଫ୍ ଲିଭିଙ୍ଗ୍‌ର ଆନ୍ତର୍ଜାତୀୟ ମହିଳା ସମ୍ମିଳନୀର ଦଶମ ସଂସ୍କରଣକୁ ଉଦଘାଟନ କରିଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ । ଏହି କାର୍ଯ୍ୟକ୍ରମରେ ଯୋଗ ଦେଇଥିଲେ 50ଟି ଦେଶରୁ 500ରୁ ଅଧିକ ପ୍ରତିନିଧି । ରାଷ୍ଟ୍ରପତି ନିଜ ସମ୍ବୋଧନରେ ଏହା କହିଛନ୍ତି ଯେ ପ୍ରତ୍ୟେକ ମହିଳା ନିଜ ଭିତରେ ଥିବା ପ୍ରତିଭା, ଗୁଣ, ଆଧ୍ୟାତ୍ମିକ ଶକ୍ତିକୁ ଜାଣନ୍ତୁ । ଏହାକୁ ବ୍ୟବହାର କରି ସମାଜ ଉପରେ ଏକ ସକରାତ୍ମକ ଏବଂ ଦୀର୍ଘସ୍ଥାୟୀ ପ୍ରଭାବ ପକାନ୍ତୁ । ଯାହା ଅନ୍ୟ ମହିଳାଙ୍କୁ ଆଗକୁ ବଢିବାକୁ ପ୍ରେରଣା ଯୋଗାଇବ ।

ଗୁରୁଦେବ ଶ୍ରୀ ଶ୍ରୀ ରବିଶଙ୍କର ଏବଂ ଆର୍ଟ ଅଫ୍ ଲିଭିଙ୍ଗ୍ ବିଶ୍ୱର ଲୋକମାନଙ୍କୁ ଧ୍ୟାନ ଏବଂ ମାନବିକ ସେବା ମାଧ୍ୟମରେ ଆନ୍ତରିକ ଶାନ୍ତି ପାଇବା ପାଇଁ ପ୍ରେରଣା ଏବଂ ସାହାଯ୍ୟ କରିଛନ୍ତି । ରାଷ୍ଟ୍ରପତି କହିଛନ୍ତି, "ଆମେ ଏବେ ପ୍ରଯୁକ୍ତିବିଦ୍ୟା ବିଭ୍ରାଟ ସ୍ଥିତିରେ ଅଛୁ । ଏହି ପ୍ରତିଯୋଗିତାମୂଳକ ବିଶ୍ୱରେ ଆମକୁ ଏହା ସୁନିଶ୍ଚିତ କରିବାକୁ ହେବ ଯେମିତି ଆମର ମାନବୀୟ ମୂଲ୍ୟବୋଧ ନହଜିଯାଉ । କାରଣ ମହିଳାମାନଙ୍କ ମଧ୍ୟରେ କରୁଣା ଓ ଦୟା ଭାବ ଥାଏ । ମେଣ୍ଟାଲ ହେଲ୍ଥ ସମ୍ପର୍କରେ କହିବାକୁ ଯାଇ ରାଷ୍ଟ୍ରପତି କହିଛନ୍ତି ଯେ, ମହିଳାମାନେ ମୁହଁ ଖୋଲି କହିବା ଶିଖନ୍ତୁ । ମାନସିକ ସ୍ତରରେ ମହିଳାମାନେ ସୁରକ୍ଷା ରହିଲେ ହିଁ ସମାଜରେ ଥିବା ପ୍ରତିବନ୍ଧକକୁ ହଟାଇପାରିବେ । ଆଗକୁ ଯାଇପାରିବେ ।

ଏହି କାର୍ଯ୍ୟକ୍ରମରେ ଶ୍ରୀ ଶ୍ରୀ ରବିଶଙ୍କର ମହିଳାମାନଙ୍କୁ ସମ୍ବୋଧନ କରି କହିଥିଲେ ଯେ ଆମେ ଜଣେ ମହିଳାଙ୍କ ଆଖିରୁ ଗୋଟିଏ ଲୁହ ଝରିବାକୁ ଦେଇପାରିବୁ ନାହିଁ। ଏହି କଥାଟି ସମସ୍ତଙ୍କ ମନକୁ ଖୁବ ଛୁଇଁଥିଲା । ମହିଳାମାନଙ୍କ ମଧ୍ୟରେ ଦୟା ଭାବ ଥାଏ । ସେମାନେ ତାଙ୍କ ଭାବପ୍ରବଣ ଶକ୍ତି ଯୋଗୁଁ ସମସ୍ତଙ୍କୁ ଏକାଠି ବାନ୍ଧି ରଖିଥାନ୍ତି । ଯଦି ମହିଳାମାନେ ବିସ୍ୱର ପ୍ରମୁଖ ରାଷ୍ଟ୍ରଗୁଡିକରେ ନେତୃତ୍ତ୍ୱ ଗ୍ରହଣ କରନ୍ତି ତେବେ ଆଜି ଆମେ ଦେଖୁଥିବା ଦ୍ୱନ୍ଦ୍ୱ, ବିବାଦ, ଯୁଦ୍ଧ ଏବଂ ବିଭିନ୍ନ ସାମାଜିକ ବିକୃତି ହ୍ରାସ ପାଇପାରେ କିମ୍ବା ବନ୍ଦ ମଧ୍ୟ ହୋଇପାରେ ବୋଲି କହିଥିଲେ ରବିଶଙ୍କର ।

ପ୍ରାୟ ଦୁଇ ଦଶନ୍ଧି ଧରି ଏବଂ 10 ସଂସ୍କରଣ ପର୍ଯ୍ୟନ୍ତ, IWC 115 ଟି ଦେଶର ଅନେକ ପ୍ରସିଦ୍ଧ ବକ୍ତା ଏବଂ 6,000 ପ୍ରତିନିଧିଙ୍କୁ ଏକତ୍ରିତ କରିଛି । 50 ରୁ ଅଧିକ ଦେଶରୁ 60+ ବକ୍ତା ଏବଂ 500 ରୁ ଅଧିକ ପ୍ରତିନିଧିଙ୍କ ସହିତ ଏହି ବର୍ଷର ସମ୍ମିଳନୀ ମହିଳାମାନଙ୍କ ପାଇଁ ପ୍ରତିଫଳିତ, ପ୍ରେରଣାଦାୟକ, ଅର୍ଥପୂର୍ଣ୍ଣ ଆଲୋଚନା ଏବଂ ସେମାନଙ୍କର ଜୀବନ ସଂଘର୍ଷ ବାଣ୍ଟିବା ପାଇଁ ଏକ ପବିତ୍ର ସ୍ଥାନ । ଏହି ଆର୍ଟ ଅଫ୍ ଲିଭିଙ୍ଗ୍ ଇଣ୍ଟରନ୍ୟାସନାଲ୍ ସେଣ୍ଟରର ଶାନ୍ତ ପରିବେଶ ମଧ୍ୟରେ ଧ୍ୟାନ, ଶ୍ୱାସକ୍ରିୟା ଏବଂ ଯୋଗ ମାଧ୍ୟମରେ ଗଭୀର ଭାବରେ ବୁଡ଼ି ରହିପାରିବେ ।