ଅର୍ଗସ ବ୍ୟୁରୋ: ରାତି ପାହିଲେ ପୁରା ଦେଶ ପାଳିବ 78ତମ ସ୍ବାଧୀନତା ଦିବସ । ତା ପୂର୍ବରୁ ସବୁଠି ତ୍ରିରଙ୍ଗା ଶୋଭାଯାତ୍ରା କରାଯାଇଛି । ଜମ୍ମୁକାଶ୍ମୀରର ବାରମୂଳରେ 2.5 କିମି ଲମ୍ବା ତ୍ରିରଙ୍ଗା ରାଲି କରାଯାଇଛି । ଶହ ଶହ ସଂଖ୍ୟାରେ ଲୋକେ ସାମିଲ୍ ହୋଇପଦଯାତ୍ରାରେ ବାହାରିଥିଲେ । ସେହିପରି ରିଆସୀର ଚେନ୍ନାବ ନଦୀ ଉପରେ ଥିବା ପୃଥିବୀର ସବୁଠୁ ବଡ଼ ରେଲୱେ ବ୍ରିଜ୍ ଉପରେ ତ୍ରିରଙ୍ଗା ଯାତ୍ରା କରାଯାଇଛି । ସେହିପରି ଅଯୋଧ୍ୟାରେ ବି ବାହାରିଲା ତ୍ରିରଙ୍ଗା ରାଲି ।

କେବଳ ଦେଶ ନୁହେଁ ଓଡ଼ିଶାରେ ବି ତ୍ରିରଙ୍ଗାକୁ ସମ୍ମାନ ଦିଆଯାଇଛି । ଭୁବନେଶ୍ବରରେ ବିଶାଳ ତ୍ରିରଙ୍ଗା ଶୋଭାଯାତ୍ରା ଆୟୋଜିତ ହୋଇଥିଲା । ଏଥିରେ ମୁଖ୍ୟମନ୍ତ୍ରୀ ମୋହନ ମାଝୀ, ଉପମୁଖ୍ୟମନ୍ତ୍ରୀ ପ୍ରଭାତି ପରିଡାଙ୍କ ସମେତ ବିଧାୟକ ମାନେ ଯୋଗ ଦେଇଥିଲେ । ଲିଙ୍ଗରାଜ ମନ୍ଦିରରୁ ମୁକ୍ତେଶ୍ଵର ମନ୍ଦିର ପର୍ଯ୍ୟନ୍ତ ତ୍ରିରଙ୍ଗା ଯାତ୍ରା ଯାଇଥିଲା । ଜାତୀୟ ପତାକା
ଆମେ ଗୌରବ ଓ ପରିଚୟ ବୋଲି କହିଛନ୍ତି ମୁଖ୍ୟମନ୍ତ୍ରୀ ।

ସେହିପରି କଟକରେ ମହାନଦୀର ଗଭୀର ସ୍ରୋତରେ ତ୍ରିରଙ୍ଗା ଯାତ୍ରାର ନିଆରା ଦୃଶ୍ୟ ଦେଖିବାକୁ ମିଳିଛି । ଜାତୀୟ ପତାକା ଧରି ଶାନ୍ତି ମୈତ୍ରୀର ବାର୍ତ୍ତା ବାଣ୍ଟିଛନ୍ତି ସ୍କୁବା ଡାଇଭର ସବୀର ବକ୍ସ ଓ ୟୁପିର 24 ଜଣ ପ୍ରଶିକ୍ଷିତ ଏସଡିଆରଏଫ୍ ଯବାନ ।

ଖାଲି ଟ୍ବିନସିଟି ନୁହେଁ ଉପକୂଳଠୁ ଉପାନ୍ତ ଯାଏଁ ସବୁଠି ଛାଇଲା ତ୍ରିରଙ୍ଗା । କେଉଁଠି ପଦଯାତ୍ରା ତ କେଉଁଠି ବାଇକ୍ ଯାତ୍ରା । ନେତାଙ୍କଠୁ ଆରମ୍ଭ କରି ସାଧାରଣ ଲୋକେ ସାମିଲ୍ ହେଲେ ତ୍ରିରଙ୍ଗା ଶୋଭାଯାତ୍ରାରେ । ଦେଶପ୍ରତି ଦେଖାଇଲେ ଭଲପାଇବା ଓ ଜାତୀୟ ପତାକାକୁ ଦେଲେ ବଡ଼ ସମ୍ମାନ । ଦେଶଭକ୍ତି ସଙ୍ଗୀତରେ ଗୁଞ୍ଜରିତ ହେଲା ଚାରିଆଡ଼ ।

ରାତି ପାହିଲେ ଦେଶ ସ୍ବାଧୀନତାର 78ତମ ବର୍ଷପୂର୍ତ୍ତି ପାଳନ କରିବ । ଏହି ଅବସରରେ `ହର୍ ଘର୍ ତ୍ରିରଙ୍ଗା' ଅଭିଯାନରେ ସାମିଲ୍ ହୋଇ ଦେଶପ୍ରତି ନିଜ ଭାବନାକୁ ଜାଗୃତ ଏବଂ ଜୀବନ୍ତ କରିବାକୁ ଆହ୍ବାନ ଦେଇଛନ୍ତି ପ୍ରଧାନମନ୍ତ୍ରୀ ମୋଦି । ସମସ୍ତେ ନିଜ ଘରେ ଜାତୀୟ ପତାକା ଉତ୍ତୋଳନ କରନ୍ତୁ ଏବଂ ନିଜର ସେଲ୍‌ଫି harghartiranga.comରେ ଅପଲୋଡ କରିବାକୁ ଅନୁରୋଧ କରିଛନ୍ତି ପିଏମ୍ । ଦେଶବାସୀଙ୍କୁ ଜାତୀୟ ପତାକାର ମହତ୍ତ୍ବକୁ ଉପଲବ୍ଧ କରାଇବା ଏହି ଅଭିଯାନର ଉଦ୍ଦେଶ୍ୟ ।